BOYOVUL MAHALLASIDA XOTIN-QIZLAR IShTIROKIDA SPORT-SOGʻLOMLAShTIRISh TADBIRI OʻTKAZILDI
Yurtimizda jismoniy tarbiya va sportni yanada rivojlantirish, uning ommaviyligini oshirish, shuningdek, sogʻlom turmush tarzini keng targʻib qilishga eʼtibor tobora kuchaymoqda. Barcha joylarda aholining, ayniqsa, xotin-qizlarning jismoniy tarbiya va ommaviy sport bilan muntazam shugʻullanishi uchun zarur sharoitlar yaratilmoqda. Amudaryo tumanida ham sport inshootlari va majmualari, oʻyingohlar bunyod etilib, foydalanishga topshirilmoqda. Ovul va mahallalarda esa xotin-qizlar ishtirokida turli tadbirlar, musobaqalar va bellashuvlar muntazam ravishda tashkil etilmoqda.
Mangʻit shahrining Boyovul mahallasida joylashgan sport maydonchasida mahalla xotin-qizlar faoli Husnida Abdurahmonova tashabbusi bilan mahalla xotin-qizlari ishtirokida sport-sogʻlomlashtirish tadbiri oʻtkazildi. Unda mahalla ayol-qizlari ertalabki ommaviy badantarbiya mashqlari hamda sportning basketbol, voleybol turlari boʻyicha mashgʻulotlar amalga oshirildi. Tadbirda mahallaning koʻchaboshchi ayollari, faol xotin-qizlar qatnashdilar.
Mamlakatimizda jismoniy tarbiya va sportni ommalashtirish ijtimoiy siyosatning muhim yoʻnalishlaridan biri etib belgilangan.
Mohiyatan, sport salomatlik garovi ekanini barchamiz yaxshi bilamiz. Shu bois, barcha hududlarda boʻlgani kabi tumanimizda ham sport bilan shugʻullanish ommaviy tus olmoqda. Bugungi kunda sogʻlom turmush tarziga amal qilayotgan yurtdoshlarimiz soni kun sayin koʻpayib borayotgani ham fikrimiz dalili.
Sport-sogʻlomlashtirish mashgʻulotlari xotin-qizlarni qoʻllab-quvvatlashga doir davlat siyosatini samarali amalga oshirish, hayotdagi roli va faolligini qoʻllab-quvvatlash, shu bilan birga xotin-qizlarni har tomonlama sogʻlom va jismonan baquvvat boʻlishlarini taʼminlashga xizmat qiladi.
Sport tadbirlarini oʻtkazishdan asosiy maqsad – “Sogʻlom ayol — sogʻlom jamiyat” gʻoyasini ilgari surish, ayollarni sogʻlom hayot kechirishga oʻrgatish, onalar salomatligini mustahkamlash, xotin-qizlarni sport uchun vaqt ajratishga jalb qilishdan iborat. Shuningdek, tadbirda ishtirok etishni istagan barcha xotin-qizlar uchun sport maydonchalari, sport anjomlaridan foydalangan holda salomatliklarini tiklashlari uchun barcha imkoniyatlar yaratilgan.
Ishtirokchilar mashqlar davomida oʻyingoh maydoni boʻylab yugurib, turli xil badantarbiya mashqlarini bajarishdi. Soʻngra ikki guruhga ajralib, sportning voleybol, basketbol turlari boʻyicha oʻzaro kuch sinashdilar.
Xotin-qizlar salomatligi uchun qaygʻurish har qanday davrda ham dolzarb mavzu boʻlib kelgan. Negaki, sogʻlom avlodning dunyoga kelishi va kamolga yetishida ayollarimiz, onalarimizning oʻrnini hech narsaga tenglashtirib boʻlmaydi. Shuning uchun ular oʻrtasida sport va jismoniy madaniyatni targʻib etish,sogʻlom turmush tarzining barqaror boʻlishiga erishish bugungi kunning asosiy vazifalaridandir.
Shu maʼnoda olib qaraydigan boʻlsak, mehnat jamoalarida, ovul va mahallalarda oʻtkazilayotgan ommaviy sport-sogʻlomlashtirish tadbirlarining oʻrni ulkan.
Boyovul mahallasida oʻtkazilgan sport-sogʻlomlashtirish tadbirlarida ham mahallada istiqomat qiluvchi turli yoshdagi ayol-qizlar ishtirok etib, sport turlari boʻyicha oʻz iqtidorlarini sinovdan oʻtkazdilar va mashgʻulotlardan keyin jismonan tetiklikni his qildilar.
Sevara Ismoilova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
