МАНҒИТДА ЯНГИ САВДО МАРКАЗИ ИШГА ТУШИРИЛДИ

Амударёликлар мамлакатимиз мустақиллигимизнинг 32 йиллигини муносиб қарши олиш учун тайёргарлик қизғин тус олаётган шукуҳли дамларда – шу йилнинг 20 августида қувончли воқеанинг гувоҳи бўлдилар: Манғит шаҳрининг Бойовул маҳалласи ҳудудида “Шоҳжаҳон” савдо маркази иш бошлади.

Илгари тўла фойдаланилмай турган икки қаватли замонавий услубда қурилган бинони ижрага олиб иш бошлаган тадбиркор Достонбек Бобожонов туманимиз аҳолисига замонавий талаблар асосида савдо хизмати кўрсатишни мақсад қилган. Савдо маркази ташқаридан салобатли кўринади ва ичкариси ҳам шинам, кўркам бўлиб, бу ерда харидорлар учун ҳам, сотувчилар учун ҳам муносиб шароитлар яратилган. Мазкур савдо марказининг очилиш маросими манғитликлар учун эсда қоларли воқеа бўлди.

Тадбирда туман ҳокими ўринбосари Фахриддин Юсупов, Бойовул маҳалла фуқаролар йиғини раиси Эркин Ҳусаинов, маҳалла фаоллари, тадбиркорлар, “Юсуф Эшон бобо” жомъе масжиди ва ҳудудлар имомлари иштирок этдилар.

Тадбирни Бойовул маҳалла фуқаролар йиғини раиси Эркин Ҳусаинов очди ва янги фаолият бошлаётган тадбиркорни савдо марказини ишга тушираётгани билан қутлади. Табриклардан сўнг Достонбек Бобожонов барча йиғилганларни савдо маркази ичкарисига таклиф этди ва марказ фаолияти билан таништирди.

Таъкидланганидек, савдо марказида маиший техникалар, уй жиҳозлари, мебеллар, смартфон ва гаджетлар, компьютер техникалари арзон ва мақбул нархларда сотилади.

Марказда машҳур ва ишончли ишлаб чиқарувчиларнинг жами 30 мингдан ортиқ турдаги маҳсулотлари сотуви йўлга қўйилган.

Эътиборли жиҳати шундаки, маҳсулотларга тўловларни 3 ойдан 3 йилгача бўлган муддатда бўлиб тўлаш имконияти мавжуд. Бунинг учун ортиқча оворагарчиликларсиз саноқли дақиқаларда ҳужжатлар расмийлаштирилади. Юртдошларимизга байрам арафасида фойдали харидларни таклиф этаётган “Шоҳжаҳон” савдо маркази ходимлари харидорларга сифатли хизмат кўрсатишга ҳаракат қилишаяпти.

Савдо маркази ишга туширилиши муносабати билан бу ерда 11 нафар юртдошларимиз доимий иш билан таъминланди.

Шуниси эътиборлики, халқимиз турмуши фаровонлашиб бораётгани сари уларнинг замонавий ахборот технологиялари ва маиший техникаларга, уй жиҳозларига талаби ҳам ортиб бормоқда. Шу маънода олиб қарайдиган бўлсак, “Шоҳжаҳон” савдо марказининг ишга туришилиши юртдошларимизга харид қилишда танлаш имкониятини кенгайтиргани билан ҳам аҳамиятли бўлди.

Очилиш маросимига ташриф буюрган меҳмонлар ва илк харидорларга расталардаги маҳсулотлар ҳақида батафсил маълумотлар берилди. Ўз навбатида меҳмонлар ҳам янгидан тадбиркорлик фаолиятини бошлаётган Достонбек Бобожоновга ва унинг ҳамкорларига ишлари ўнгидан келишини тилаб дуо қилдилар.

Севара ИСМОИЛОВА.