УСТОЗЛАР МИЛЛИЙ ФОРУМИ БЎЛИБ ЎТДИ

Мамлакатимиз мактаб ўқувчиларининг билими ва кўникмаларини шакллантириш, уларни миллий ҳамда умуминсоний қадриятларга содиқлик руҳида тарбиялаш, ўқитувчи касби нуфузини ва педагогларнинг сифат таркибини яхшилаш, дарсликлар ва ўқув методик мажмуаларни бугунги кун талаблари асосида такомиллаштиришга хизмат қилувчи 2022-2026 йилларда халқ таълимини ривожлантириш бўйича қабул қилинган Миллий дастур соҳада улкан ижобий ўзгаришлар ясалишига замин бўлаётир.

Бу ҳақда 21 август куни Амударё туманидаги 76-сонли мактабда бўлиб ўтган Устозлар миллий форумида батафсил сўз борди.

Бугунги кунда ўқитувчиларнинг нуфузи ошириш, таълим сифатини юксалтиришга қаратилган тизимли ислоҳотлар туманимизда ҳам ўзининг ижобий самараларини бераётгани қувонарли. Шундай шароитда “Сифатли таълим – кучли жамият” шиори остида туманда ўтказилган иккинчи Устозлар миллий форуми янги ўқув йили олдидан халқ таълими ходимлари учун олдда турган долзарб вазифаларни белгилаб олиш учун ўзига хос минбар бўлди, дейиш мумкин.

Айтиш жоизки мактабларни муқаддас даргоҳга айлантирадиган куч устозлар фидойи меҳнати, маҳоратидир. Мазкур форум туманимизда фаолият юритаётган 4000 нафардан ортиқ ўқитувчи, 700 нафарга яқин мактабгача таълим ташкилотларида меҳнат қилаётган тарбиячилар учун тажриба алмашиш, янги билимларни эгаллашига шароит яратди.

Иккинчи марта ўтказилаётган Устозлар миллий форумини туман Мактабгача ва мактаб таълими бўлимининг мактаблар фаолиятини мувофиқлаштириш шўъбаси мудири Ибрагим Ражабов очди ва форум иштирокчиларини яқинлашаётган янги ўқув йили билан қутлади. Шунингдек, 2023-2024 ўқув йилида таълим соҳасида жорий этилаётган янгиликлар ҳақида батафсил гапирди ва миллий форумда муҳокама этиладиган масалалар, ўзаро тажриба алмашувлар бошланаётган ўқув йили сифатли ва самарали бўлишига пойдевор бўлишини таъкидлади.

Икки сменада ташкил этилган форумда туманимиздаги мактаблар директорлари, ўқув ишлари бўйича ўринбосарлари ҳамда 12та фан ўқитувчилари иштирок этишди. Ҳар бир фандан тренер ўқитувчилар томонидан 2023-2024 ўқув йилида жорий этилаётган янгиликлар, жумладан, мезонларга асосланган янги баҳолаш тизими, ўқувчиларда XXI аср кўникмаларини ривожлантириш, лойиҳага асосланган таълим мавзулари бўйича тренинг машғулотлари ўтказилди ва янги ўқув йили ўқув режаси ва дарсликлар ҳақида маълумотлар берилди.

Шуни эътироф этиш керакки, Ўзбекистон Республикаси Вазирлар Маҳкамаси ҳузуридаги таълим сифатини назорат қилиш давлат инспекциясининг 2022 йил октябрь ойида эълон қилинган “Миллий рейтинг – 2021” натижаларига кўра, туманимиз Қорақалпоғистон Республикасида 7 ўринни эгаллаган. Албатта ёмон кўрсаткич эмас.

Бироқ туманда бу кўрсаткични яхшилаш учун кадрлар, педагогларнинг салоҳияти етарли. Мактаблар қуввати 32 минг 635 ўринли. Таълим олаётган ўқувчилар эса 38 минг 476 нафарни ташкил этади. 4064 нафар ўқитувчиларнинг 3798 нафари олий маълумотли, 282 нафари олий тоифали, 284 нафари халқаро ва миллий сертификатга эга эканлиги бу фикримизни аниқ далиллайди.

Ўтган ўқув йилида 81 нафар ўқувчиларнинг турли халқаро ва миллий сертификатлар олишга эришгани – дарслар самарадорлигига эришиш, иқтидорли ўқувчиларни ўқитишга ижодий ёндошиш давр тақозоси эканлигини кўрсатади.

Бўлиб ўтган Устозлар миллий форумида булар атрофлича муҳокама қилинди, таълим сифатини ошириш юзасидан чора- тадбирлар белгиланди.

Ойгул РАЖАБОВА.