Халқ депутатлари Амударё туман Кенгашининг 63-сессияси тўғрисида ахборот

2023 йил 25 август куни Амударё тумани ҳокимлигининг мажлислар залида Халқ депутатлари туман Кенгашининг навбатдаги – 63-сессияси бўлиб ўтди.

Сессияни Халқ депутатлари туман Кенгаши раисининг ўринбосари Ғуломжон Ешниёзов очди ва олиб борди.

Сессия котиблигига 22-Жумуртов сайлов округидан депутат Бахрам Шерманов сайланди.

Сессияда депутатлар, туман ҳокими ўринбосарлари, ҳокимлик масъул ходимлари, бўлимлар, ташкилотлар раҳбарлари, фуқаролар йиғинлари раислари ҳамда оммавий ахборот воситалари вакиллари иштирок этди.

Сессияда дастлаб ҳудудни ижтимоий-иқтисодий ривожлантириш дастурининг ижроси, “Инсонга эътибор ва сифатли таълим йили” туман дастурининг бажарилиши, ёшлар муаммоларини ҳал этиш, уларнинг истеъдоди ва қобилиятларини ривожлантириш борасидаги ишлар ва қонунчилик ҳужжатларининг ўз вақтида ижро этилиши тўғрисида туман ҳокими вазифасини бажарувчи Рашид Салаевнинг ҳисоботи тингланди.

Ҳисоботда қайд этилганидек, жорий йилнинг биринчи ярмида асосий ижтимоий-иқтисодий кўрсаткичлар сезиларли даражада ўсган. Жумладан, саноат ҳажми 368,1 млрд., халқ истеъмол моллари ҳажми 92,9 млрд., қишлоқ хўжалиги ҳажми 755,4 млрд., инвестициялар ҳажми 238,7 млрд., қурилиш ишлари ҳажми 167,3 млрд., чакана савдо ҳажми 376,3 млрд., хизматлар ҳажми эса 311,3 млрд. сўмни ташкил қилиб, барча соҳаларда ўсиш қайд этилган.

Ҳудудий инвестиция лойиҳалари дастури бўйича 2023 йилда туманда 200,7 млрд. сўмлик 65та лойиҳалари амалга оширилиши ва 924 та янги иш ўринлари яратилиши белгиланган.

Сессия ишида туман Фуқаролик ишлари бўйича суди раиси Қайрулла Атамуратов одил судловни амалга ошириш борасида 2023 йил 2 январдан 30 июнгача амалга оширилган ишлар тўғрисида ахборот берди.

Ахборотда таъкидланганидек, Фуқаролик ишлари бўйича туман суди томонидан ушбу давр ҳолатига кўра фуқароларнинг ҳуқуқ ва қонуний манфаатларини суд орқали ҳимояланишини таъминлаш, ишларни қонунда белгиланган муддатларда сифатли кўриб чиқиш ва аҳоли ўртасида ҳуқуқий тарғибот ишларини олиб бориш бўйича қатор амалий ишлар қилинди. Ушбу даврда суд томонидан 2467та иш кўриб тамомланган.

Туман Молия бўлими маҳаллий бюджет ижроси ва ҳисоби сектор бошлиғи Абай Сағинбаев сессияда туман маҳаллий бюджети маблағларининг 2023 йил 6 ойи давомида сарфланиши тўғрисида ҳисобот берди. Таъкидланганидек, 2023 йил 6 ойи давомида маҳаллий бюджетнинг даромадлар қисми режаси 35 миллиард 429,1 миллион сўмга белгиланган бўлиб, 41 миллиард 219,7 миллион сўмга, яъни режага нисбатан 116,3 фоизга ёки 5 миллиард 790,7 миллион сўм ортиғи билан бажарилишига эришилган. Шу билан бирга, бюджет харажатлари режаси киритилган ўзгаришлардан кейин жами 173 миллиард 71,5 миллион сўмни ташкил қилган. Ушбу давр мобайнида бюджет маблағлари харажатлари ҳисобидан жами 154 миллиард 766,1 миллион сўмлик маблағлар сарфланган.

Сессияда туман Халқ қабулхонаси мудири Эркин Ражабов аҳолидан келиб тушаётган мурожаатларни таҳлил қилган ҳолда, ҳоким ёрдамчилари фаолиятининг натижадорлигини ўрганиш якунлари тўғрисидаги масала юзасидан ахборот берди. Ахборотда таъкидланганидек, Ўзбекистон Республикаси Президентининг Виртуал қабулхонасига 2023 йил 31 июль санасига қадар туман аҳолиси томонидан жами 2463та масалалар бўйича мурожаатлар келиб тушган. Шундан 2433таси кўриб чиқилган бўлиб, 1956таси қаноатлантирилган, 1209таси ижобий ҳал қилинган.

Сессияда заҳирадаги ер майдонларини очиқ электрон танловга чиқариш бўйича туман Фермер, деҳқон хўжаликлари ва томорқа ер эгалари Кенгаши раиси Илҳом Палванов ҳисобот берди. Ҳисоботда бугунги кунда «e-auksion» электрон платформасига қўйилган ер майдонларига фуқаролар томонидан ҳужжатлар тақдим қилинмасдан қайта савдога чиқарилаётгани, шуни инобатга олиб, туманнинг баъзи ҳудудларида ер майдонларини 2 гектаргача бўлган ўлчамларда катталаштириб электрон савдоларга чиқариш таклиф қилинди. Таклиф депутатлар томонидан тасдиқланди.

Сессияда Кенгаш ваколатига кирувчи бошқа масалалар ҳам муҳокама қилинди. Кун тартибидаги барча масалалар атрофлича кўриб чиқилиб, туман Кенгашининг тегишли қарорлари қабул қилинди.

Шунинг билан сессия ўз ишини якунлади.

Туман ҳокимлигининг Ахборот хизмати