“МАДАНИЯТ КАРВОНИ” ЛОЙИҲАСИ ДОИРАСИДА МАНҒИТДАГИ МАДАНИЯТ ВА ИСТИРОҲАТ БОҒИДА ГАЛА КОНЦЕРТ БЎЛИБ ЎТДИ
Президентимиз ташаббуси билан республикамиз бўйлаб ўтказилаётган “Маданият карвони” лойиҳаси бугунга келиб кўпчиликнинг қалбидан жой олди. Ҳар йили ўтказилиши анъанага айланган ушбу тадбир доирасида жойларда эл суйган ижодкорлар, санъат ва маданият намояндалари, ёзувчи ва шоирлар, илм аҳли юртимизнинг барча туманларида бўлишиб, аҳоли билан учрашмоқда, юзма юз мулоқотлар дилтортар концерт дастурларига уланмоқда. “Маданият карвони” лойиҳаси доирасидаги тадбирлар аҳолининг кўнгилли ҳордиқ чиқаришига хизмат қилаётгани баробарида маданият ва санъат вакилларига, ижодкорлар қалбида янги ижодий ишларга рағбат уйғотмоқда.
5 сентябрь куни Амударё туманининг Олмазор маҳалласи ҳудудидаги Маданият ва истироҳат боғида “Маданият карвони” фестивали доирасида бир гуруҳ санъаткорлар “Янги ҳаёт учун, Янги Ўзбекистон учун!” шиори остида гала концерт дастурини намойиш этишди.
Гала концертда халқимиз севган маданият ва санъат ходимлари, эстрада юлдузлари Ҳамдамбек Тўраев, Саидаҳмад Холмадов, Самандар Ҳамроқулов, Воҳиджон Исоқов, Шароф Муқимов ва бошқалар иштирок этишди.
Кейинги йилларда мамлакатимизда халқимизнинг маънавий-маърифий савиясини юксалтириш, маданият ва санъатга бўлган қизиқишларини янада ошириш ҳамда соҳа вакилларини қўллаб-қувватлаш бўйича комплекс чора-тадбирлар амалга оширилмоқда.
Аҳоли, хусусан, ёшларнинг маданий савиясини юксалтириш, уларни миллий ва умумбашарий маданиятнинг энг яхши намуналаридан баҳраманд этиш, шу асосда маънавий етук, баркамол шахсларни тарбиялаш, ёш истеъдод эгаларининг қобилияти ва салоҳиятини рўёбга чиқариш борасида кенг кўламли саъй-ҳаракатлар олиб борилаётир. “Маданият карвони” лойиҳаси доирасида амалга оширилаётган тадбирлар ҳам айнан шу мақсадга хизмат қилаётгани билан аҳамиятлидир.
Айтиш жоизки, Ўзбекистон Республикаси Президентининг 2022 йил 2 февралдаги қарори билан Маданият вазирлиги томонидан “Маданият карвони” шаклида ҳудудларда концерт-томоша тадбирларини ўтказиш режа-жадвали тасдиқланган эди. Мазкур қарорда Маданият вазирлигига мазкур лойиҳа учун мўлжалланган, тегишли мусиқа техникаси ва саҳнага эга 2 дона махсус автотранспорт воситасини харид қилиш, вазирлик тизимидаги концерт-томоша муассасалари, цирк ва театр ходимлари орасидан “Маданият карвони” таркибига киритиладиган ижодкорлар рўйхатини шакллантириш вазифалари топширилган эди. Ушбу топшириқлардан келиб чиққан ҳолда ўтган йилдан бери мамлакатимизнинг барча ҳудудларида “Маданият карвони” шаклидаги концерт-томоша тадбирлари ўтказиб келинмоқда.
Манғит шаҳрида очиқ осмон остидаги сўлим боғда бўлиб ўтган концерт дастури давомида ёшларнинг севимли хонандалари ўзларининг шўх куй-қўшиқлари билан барчага хуш кайфият улашди.
Таъкидланганидек, мусиқа инсон маънавий дунёсига, бадиий-эстетик диди ва эҳтиёжлари ўсишига ижобий таъсир этади. Мусиқа санъати бошқа санъат турларига қараганда ёшлар тарбиясига кўпроқ ва кучлироқ таъсир кўрсатади. Яхши куй-қўшиқ инсон қалбининг нозик торларини чертиб, унга маънавий қувват бағишлайди. Агар у Ватан мадҳига, юрт шаънига бағишланган бўлса, аҳамияти янада юксалади. Шу маънода олиб қарайдиган бўлсак, амударёликлар мириқиб ҳордиқ чиқарган мазкур гала концертнинг аҳамияти жуда юқори бўлди, дейиш мумкин.
Севара ИСМОИЛОВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
