“MADANIYaT KARVONI” LOYIHASI DOIRASIDA MANGʻITDAGI MADANIYaT VA ISTIROHAT BOGʻIDA GALA KONTsERT BOʻLIB OʻTDI

Prezidentimiz tashabbusi bilan respublikamiz boʻylab oʻtkazilayotgan “Madaniyat karvoni” loyihasi bugunga kelib koʻpchilikning qalbidan joy oldi. Har yili oʻtkazilishi anʼanaga aylangan ushbu tadbir doirasida joylarda el suygan ijodkorlar, sanʼat va madaniyat namoyandalari, yozuvchi va shoirlar, ilm ahli yurtimizning barcha tumanlarida boʻlishib, aholi bilan uchrashmoqda, yuzma yuz muloqotlar diltortar kontsert dasturlariga ulanmoqda. “Madaniyat karvoni” loyihasi doirasidagi tadbirlar aholining koʻngilli hordiq chiqarishiga xizmat qilayotgani barobarida madaniyat va sanʼat vakillariga, ijodkorlar qalbida yangi ijodiy ishlarga ragʻbat uygʻotmoqda.

5-sentyabr kuni Amudaryo tumanining Olmazor mahallasi hududidagi Madaniyat va istirohat bogʻida “Madaniyat karvoni” festivali doirasida bir guruh sanʼatkorlar “Yangi hayot uchun, Yangi Oʻzbekiston uchun!” shiori ostida gala kontsert dasturini namoyish etishdi.

Gala kontsertda xalqimiz sevgan madaniyat va sanʼat xodimlari, estrada yulduzlari Hamdambek Toʻrayev, Saidahmad Xolmadov, Samandar Hamroqulov, Vohidjon Isoqov, Sharof Muqimov va boshqalar ishtirok etishdi.

Keyingi yillarda mamlakatimizda xalqimizning maʼnaviy-maʼrifiy saviyasini yuksaltirish, madaniyat va sanʼatga boʻlgan qiziqishlarini yanada oshirish hamda soha vakillarini qoʻllab-quvvatlash boʻyicha kompleks chora-tadbirlar amalga oshirilmoqda.

Aholi, xususan, yoshlarning madaniy saviyasini yuksaltirish, ularni milliy va umumbashariy madaniyatning eng yaxshi namunalaridan bahramand etish, shu asosda maʼnaviy yetuk, barkamol shaxslarni tarbiyalash, yosh isteʼdod egalarining qobiliyati va salohiyatini roʻyobga chiqarish borasida keng koʻlamli saʼy-harakatlar olib borilayotir. “Madaniyat karvoni” loyihasi doirasida amalga oshirilayotgan tadbirlar ham aynan shu maqsadga xizmat qilayotgani bilan ahamiyatlidir.

Aytish joizki, Oʻzbekiston Respublikasi Prezidentining 2022-yil 2-fevraldagi qarori bilan Madaniyat vazirligi tomonidan “Madaniyat karvoni” shaklida hududlarda kontsert-tomosha tadbirlarini oʻtkazish reja-jadvali tasdiqlangan edi. Mazkur qarorda Madaniyat vazirligiga mazkur loyiha uchun moʻljallangan, tegishli musiqa texnikasi va sahnaga ega 2 dona maxsus avtotransport vositasini xarid qilish, vazirlik tizimidagi kontsert-tomosha muassasalari, tsirk va teatr xodimlari orasidan “Madaniyat karvoni” tarkibiga kiritiladigan ijodkorlar roʻyxatini shakllantirish vazifalari topshirilgan edi. Ushbu topshiriqlardan kelib chiqqan holda oʻtgan yildan beri mamlakatimizning barcha hududlarida “Madaniyat karvoni” shaklidagi kontsert-tomosha tadbirlari oʻtkazib kelinmoqda.

Mangʻit shahrida ochiq osmon ostidagi soʻlim bogʻda boʻlib oʻtgan kontsert dasturi davomida yoshlarning sevimli xonandalari oʻzlarining shoʻx kuy-qoʻshiqlari bilan barchaga xush kayfiyat ulashdi.

Taʼkidlanganidek, musiqa inson maʼnaviy dunyosiga, badiiy-estetik didi va ehtiyojlari oʻsishiga ijobiy taʼsir etadi. Musiqa sanʼati boshqa sanʼat turlariga qaraganda yoshlar tarbiyasiga koʻproq va kuchliroq taʼsir koʻrsatadi. Yaxshi kuy-qoʻshiq inson qalbining nozik torlarini chertib, unga maʼnaviy quvvat bagʻishlaydi. Agar u Vatan madhiga, yurt shaʼniga bagʻishlangan boʻlsa, ahamiyati yanada yuksaladi. Shu maʼnoda olib qaraydigan boʻlsak, amudaryoliklar miriqib hordiq chiqargan mazkur gala kontsertning ahamiyati juda yuqori boʻldi, deyish mumkin.

 Sevara ISMOILOVA