МАНЗИЛЛИ ҚЎЛЛАБ-ҚУВВАТЛАШ ДАФТАРЛАРИГА КИРИТИЛГАН ЁШЛАР УЧУН ОЧИҚ ДАРС ЎТКАЗИЛДИ

Амударё туманида фаолият юритаётган “Жайхун илҳомлари” нодавлат нотижорат ташкилоти томонидан “Беш ташаббус – беш имконият!” лойиҳасининг иш режаси асосида аҳолининг маънавиятини юксалтириш, ёшларнинг истеъдодларини юзага чиқариш, уларнинг бўш вақтларини мазмунли ўтказиш, турли зарарли иллатлардан ишончли ҳимоя қилиш мақсадида турли тадбирлар, учрашувлар, танловлар ўтказилиб келинмоқда.

Лойиҳанинг иш режаси бўйича Президентимиз илгари сурган беш муҳим ташаббуснинг учинчи ташаббуси доирасида туманнинг Манғит шаҳри ҳудудида яшовчи, манзилли қўллаб-қувватлаш дафтарларига киритилган ёшлар учун 40-сонли мактабда “Компьютер технологиялари ва интернетдан самарали фойдаланиш” мавзусида очиқ дарс ташкил қилинди.

Айтиш жоизки, туманнинг барча умумтаълим мактабларидаги компьютер синфларида ўқувчиларга энг тажрибали мутахассис ўқитувчилар сабоқ бериб келмоқда. Биз ҳикоя қилаётган 40-сонли мактабда ҳозирги кунда 1520 нафар ўқувчи билим олмоқда. Уларга 102 нафар педагог устозлар билим сирларини ўргатиб келишмоқда.

Мактабда иккита компьютер синфхоналари бўлиб, ўқувчиларга информатика фани ўқитувчилари Дилшода Абдиқодиров, Инобат Арслонова, Нурбек Холбоев, Нилуфар Соатбоевалар компьютер технологиялари ва интернетдан самарали фойдаланиш бўйича дарс машғулотлари ўтиб келмоқдалар.

“Жайхун илҳомлари” нодавлат нотижорат ташкилоти томонидан “Беш ташаббус – беш имконият!” лойиҳасининг иш режаси асосида шунингдек, Президентимиз илгари сурган беш муҳим ташаббуснинг биринчи ташаббуси доирасида ёшларнинг мусиқа, рассомлик, адабиёт, театр ва санъатнинг бошқа турларига қизиқишларини оширишга, истеъдодини юзага чиқаришга қаратилган танловлар, давра суҳбатлари, тадбирлар ўтказилмоқда.

Иккинчи ташаббус доирасида эса ёшларни жисмоний чиниқтириш, уларнинг спорт соҳасида қобилиятини намоён қилишлари учун зарур шароитлар яратиш мақсадида махсус тренажёр хонаси ташкил қилинган.

Учинчи ташаббус доирасида ёшлар ўртасида компьютер технологиялари ва интернетдан самарали фойдаланишга қаратилган тадбирлар ташкил қилинаётган бўлса, тўртинчи ташаббус доирасида ёшлар маънавиятини юксалтириш, улар ўртасида китобхонликни кенг тарғиб қилиш бўйича танловлар, учрашувлар ва тадбирлар ўтказиб келинмоқда.

Шунингдек, бешинчи ташаббус доирасида ёш аёл-қизларни ишга жойлаштириш мақсадида учрашувлар ташкил қилиниб, ўзини ўзи банд қилган ва тадбиркорлик билан шуғулланиб, даромад топаётган аёл-қизларнинг тажрибаларини оммалаштириш борасида кенг кўламли ишлар амалга оширилмоқда.

Грант лойиҳаси доирасида ташкил қилинган навбатдаги амалий дарс ҳам манзилли қўллаб-қувватлаш дафтарларига киритилган ёшлар учун фойдали бўлди. Замонавий ўқув ускуналарига эга мактабда дарс ўтиб, информатика ва ахборот технологиялари соҳасига ҳавас қилган ўқувчиларнинг кўнглига шу йўналишдаги олий ўқув юртларига ўқишга кириб, етук мутахассис бўлиб етишиш орзуси жойланган бўлса ажаб эмас.

Ўрозали РЕЙИМОВ, “Жайхун илҳомлари” ННТ раиси.