Аянчли йўл-транспорт ҳодисаси сабаблари муҳокама қилиниб, жиноятчилик ва ҳуқуқбузарликларнинг олдини олиш бўйича чоралар белгиланди

Мамлакатимизда тинчлик ва осойишталикни сақлаш, жиноят ва ҳуқуқбузарликларнинг олдини олиш, фуқароларнинг ҳуқуқлари, эркинликлари ва қонуний манфаатларини ҳимоя қилиш энг асосий устувор вазифалардан бири ҳисобланади.

19 сентябрь куни Амударё тумани ҳокимлиги биносида жиноятчилик ва ҳуқуқбузарликни олдини олиш бўйича фуқароларга тушунтириш ишлари олиб бориш мақсадида йиғилиш бўлиб ўтди.

Йиғилишда Қорақалпоғистон Республикаси Вазирлар Кенгаши раиси Фарҳод Эрманов, туман ҳокими Собир Хўжаметов, Қорақалпоғистон Республикаси Ички ишлар вазири, полковник Бахтияр Торебеков, Ўзбекистон Республикаси Миллий гвардиясининг Қорақалпоғистон Республикаси бўйича бошқармаси бошлиғи, полковник Мухторжон Юсупов, тумандаги секторлар раҳбарлари, ҳоким ўринбосарлари, профилактика инспекторлари, маҳалла раислари, ҳоким ёрдамчилари, хотин-қизлар фаоллари ҳамда ёшлар етакчилари иштирок этди.

Президентимиз Шавкат Мирзиёев ўзининг ҳар бир чиқишларида соҳага масъул бўлган идораларнинг асосий вазифаси жиноятчини топиш ва жазолаш эмас, балки жиноят содир этилишига шароит яратиб берган ҳолатларни аниқлаш, айниқса тизимли муаммолар билан ишлашга алоҳида урғу қаратишни кўп бора таъкидлаб ўтган.

Йиғилишда Қорақалпоғистон Республикаси Вазирлар Кенгаши раиси Фарҳод Эрманов сўзга чиқиб, иштирокчиларга Республикамиз миқёсидаги умумий жиноятчилик тўғрисида маълумотлар берди ва туманда жиноятлар сони ошган 12 та “қизил” тоифадаги маҳаллалар тўғрисида гапириб ўтиб. Шунингдек, туманда жиноятчилик натижасида тан-жароҳат олиш, фирибгарлик ва йўл транспорт ҳодисалари билан боғлиқ жиноятлар сони ошганлиги алоҳида қайд этилди.

Қорақалпоғистон Республикаси Ички ишлар вазири, полковник Бахтияр Торебеков Ўзбекистон Республикаси миқёсида жорий йилнинг 8 ойи давомида 5500 дан ортиқ-йўл транспорти билан боғлиқ жиноятлар содир қилинганлигини, шундан, 60 фоизи тезликни ошириш, 20 фоизи спиртли ичимлик ичиб автотранспорт воситасини бошқариш орқали, 15 фоизи йўл ҳаракати қоидаларига амал қилмаслик ҳамда қолган 5 фоизи эҳтиётсизлик оқибатида содир бўлаётганлигини тушунтириб ўтди.

Хусусан, Ички ишлар вазири яқинда содир бўлган даҳшатли йўл-транспорт ҳодисаси ҳақида ҳам тўхталиб ўтди. 2023 йил 16 сентябрь куни эрталаб соат 8:00лар атрофида Амударё тумани Назархан овули ҳудудидан ўтувчи А-380 автомобиль йўлининг 748-километрида ҳаракатланиб бораётган транспорт воситаси Амударё туманидан Нукус шаҳри томонга бир томонлама ҳаракатланувчи ўз йўлидан келаётганида унинг орқа томонидан ҳаракатланиб келаётган яна бир фуқаро бошқарувидаги автомашина қувиб ўтишни амалга ошираётиб, қарама-қарши томондан ҳаракатланишга рухсат этилмаган йўналишда Нукус шаҳридан Хоразм вилояти томонга ҳаракатланаётган бошқа фуқаро бошқарувидаги автомашина билан тўқнашиб, йўл-транспорт ҳодисасини содир қилган. Натижада битта автомашина ёниб кетиб, автомашина ҳайдовчиси ва 3 нафар йўловчилар ҳодиса содир бўлган жойда вафот этган. Иккинчи автомашинадаги ҳайдовчи ва йўловчи ҳам касалхонага олиб кетаётганида йўлда вафот этган. Яна бир фуқаро эса оғир тан жароҳати олиб, касалхонада вафот этган. Мазкур ҳолат юзасидан Қорақалпоғистон Республикаси  ИИВ  Тергов  бошқармаси томонидан  Жиноят Кодексининг 266-моддаси 3-қисми “а” банди билан жиноят иши қўзғатилган.

Йиғилишда ушбу аянчли йўл-транспорт ҳодисаси сабаблари ва оқибатлари ҳақида сўз бориб, келгусида бу каби нохушликларнинг олдини олиш бўйича мунозара юритилди.

Умумий жиноятчилик муҳокамаси чоғида эса фуқаролар йиғинлари раисларига овул ва маҳаллалар ҳудудида жиноятчилик ва ҳуқуқбузарликлар содир қилишга мойил бўлган фуқароларнинг рўйхатини шакллантириб, улар билан профилактик суҳбатлар ўтказиш, аниқланган муаммолари бўйича профилактика инспектори ёки сектор раҳбарларини хабардор қилиш лозимлиги таъкидлаб ўтилди.

Йиғилиш давомида туман Ёшлар ишлари агентлиги туман бўлими масъулларига тумандаги барча 14 ёшдан 30 ёшгача бўлган ёшларнинг рўйхатини шакллантириб, жиноят содир қилишга мойил ёшларни аниқлаш ва улар билан тизимли профилактик ишларни ташкил қилиш топширилди.

Туман ИИБ бошлиғи, подполковник Жамоладдин Юсупов ҳам сўзга чиқиб, туманда фирибгарлик жиноятининг ошишига асосий сабаб кўпчилик фуқароларнинг ҳуқуқий билимга эга бўлмаслиги натижасида уяли алоқа телефонларига келган смс кодларни ишониб бошқаларга бериш ҳоллари кўп учраётгани, натижада кўпчилик одамлар фирибгарларнинг тузоғига тушиб қолаётганини айтиб, бу жиноятларнинг олдини олиш мақсадида тарғибот тадбирларини кўпайтириш зарурлигини таъкидлади.

Йиғилиш якунида жиноятчилик ва ҳуқуқбузарликларнинг олдини олиш бўйича тегишли масъулларга топшириқлар берилди.

Туман ҳокимлиги Ахборот хизмати