“Серикбоев Солий” фермер хўжалиги пахтакорлари туманда биринчи бўлиб пахта тайёрлаш бўйича контрактация шартномаси шартларини бажарди

Деҳқонлар учун куз фаслининг ҳар дақиқаси ғанимат. Боиси, шу фаслда йил-ўн икки ой қишнинг қаҳратони-ю ёзнинг жазирамасида далаларда қилинган машаққатли меҳнатлар самараси – етиштирилган ҳосил йиғиб-териб олинади.

Республикамизнинг барча ҳудудларида бўлгани каби Амударё туманидаги фермер хўжаликларида ҳам йиғим-терим ишлари кун сайин авж олмоқда. Далаларда оппоқ бўлиб очилган пахталарни чевар қўлли, чаққон теримчилар имкон қадар тезроқ йиғиб-териб олишга интилмоқдалар. Кузнинг қуёшли, илиқ кунларини ғанимат билиб, бугун кечагидан унумли ишлашга ҳаракат қилмоқдалар.

Ана шундай саъй-ҳаракатлар туфайли Тошёп овулидаги Солий Серикбоев раҳбарлик қилаётган “Серикбоев Солий” фермер хўжалиги пахтакорлари жорий йилнинг 24 сентябрида контрактация шартномаси шартларини ортиғи билан бажардилар. 17 гектар пахта майдонидан илк теримнинг ўзидаёқ 55 тоннадан зиёд пахта ҳосили териб олинди.

24 сентябрь куни хўжаликда эришилган меҳнат натижасига бағишлаб тантанали тадбир ташкил этилди. Унда туман ҳокими Собир Хўжаметов, секторлар раҳбарлари, Қорақлпоғистон Республикаси Жўқорғи Кенгеси депутатлари, қишлоқ хўжалиги, овул фуқаролар йиғини масъуллари иштирок этдилар. Туман ҳокими, секторлар раҳбарлари йиғим-теримда фаол иштирок этган барчани эришган меҳнат ғалабаси билан қизғин қутладилар, илғорларга қимматбаҳо совғалар ҳадя этдилар.

фермер хўжалигининг бу ютуғи ўз-ўзидан бўлмади. 12 нафар пудратчилар эрта баҳордан пахта далаларда тўлиқ ниҳол олишга, униб чиққан ғўзаларни агротехника қоидалари асосида парвариш қилишга алоҳида эътибор қаратдилар. Натижада кузга келиб, ҳар бир ниҳолда мўл ҳосил тўпланишига эришилди.

Йиғим-терим мавсумини юқори кайфиятда бошлаган 12 нафар пудратчиларга ҳудуднинг 48 нафар уюшмаган аҳолиси яқиндан кўмакдош бўлиб, хўжалик пахта хирмонининг барвақт юксалишига муносиб ҳисса қўшдилар. Олмагул Рейимова, Насиба Ўрозбоева, Умида Камолова, Қарлиғаш Ибодуллаева, Санобар Жапақова, Жумабика Холбоева, Зебогул Юсупова, Умида Юсупова, Муқаддас Оллоберганова, Пардагул Қозоқбоевалар пахта теримида илғорликни қўлдан бермай келмоқдалар.

Эришилган муваффақиятга теримчилар учун тушда дала бошида иссиқ овқат, чой ташкил этилиб, унумли ишлашга шароит яратилгани муҳим асос бўлди. Терим пуллари ўз вақтида ҳисоб-китоб қилиб борилгани ҳам теримчиларни моддий жиҳатдан рағбатлантириб, янада фаол бўлишга чорлади.

Туманимизнинг барча фермер хўжаликлари пахта далаларида ҳам ҳосил йиғим-терими кун сайин авжига чиқаяпти. Пудратчилар билан бир сафда иш билан банд бўлмаган аҳоли ҳам пахта териб, оиласи учун даромад топаётир. Терилган пахта айни вақтнинг ўзида тарозида тортилиб, терим ҳақи ҳисоб-китоб қилинаяпти.

Амалга оширилаётган бунингдек саъй-ҳаракатлар пахта терими кунлик суръати ошишини таъминлаётир. Контрактация шартномалари шартларини бажариш учун ҳаракат қилиб, маррадан ошаётган хўжаликлар сони эса тобора кўпаймоқда. Далаларда ҳамжиҳатликда қилинаётган меҳнат туфайли қимматбаҳо хомашё – оппоқ пахталардан залворли хирмонлар бунёдга келмоқда.

Туманда биринчилардан бўлиб пахта тайёрлаш режаси адо этилган хўжаликда йиғим-терим ҳали қизғин давом этаётир.

Ойгул РАЖАБОВА