ҚИЛИЧБОЙ ОВУЛИ АҲОЛИСИ УЧУН БEПУЛ ТИББИЙ КЎРИК ТАШКИЛ ЭТИЛДИ
Ўзбекистон Республикаси Президентининг 2022 йил 18 март куни соғлиқни сақлаш соҳаси вакиллари билан “Тиббиётдаги ислоҳотлар – инсон қадри учун” мавзусидаги очиқ мулоқотида тиббий хизмат сифатини ошириш ва ҳудудлардаги оилавий поликлиникалар сонини ошириш бўйича вазифалар белгилаб берилган эди. Ушбу вазифалар ижросини таъминлаш мақсадида Ўзбекистон Республикаси Президентининг 2022 йил 25 апрелдаги “Бирламчи тиббий санитария ёрдамини аҳолига яқинлаштириш ва тиббий хизматлар самарадорлигини ошириш бўйича қўшимча чора-тадбирлар тўғрисида”ги 215-сонли қарори қабул қилинди. Ушбу қарорда 2022 йил 1 майдан бошлаб бирламчи тиббий санитария муассасаларидан узоқда жойлашган ҳудудлар аҳолиси учун профилактик тиббий кўриклар ўтказиб турилиши ҳам вазифа қилиб белгиланган.
Қарор ижросини таъминлаш мақсадида Республика ишчи гуруҳи аъзолари томонидан аҳолининг муаммолари ва ижтимоий аҳволини ўрганиш жараёнида 25 сентябрь куни Амударё туманининг Қиличбой овули ҳудудида жойлашган 7-сонли оилавий поликлиникада чуқурлаштирилган тиббий кўрик ташкил этилди.
Тадбирда Республика муассасаларидаги барча ихтисослашган марказларнинг кардиолог, травматолог, невропатолог, жарроҳ, педиатр, офтальмолог, ЛОР, уролог, эндокринолог, акушер-гинеколог, фтизиатр, педиатр мутахассислари томонидан аҳоли тиббий кўрикдан ўтказилди.
Шунингдек аҳолига қулайлик яратиш мақсадида шу куни УТТ, ЭКГ ускуналари, кўчма лаборатория, Республика ихтисослашган кўз микрохирургияси маркази Қорақалпоғистон Республикаси филиалининг “Мобиль поликлиника”си ҳам овул аҳли хизматида бўлди.
Тадбирга ҳудуднинг 358 нафар аҳолиси жалб этилиб, чуқурлаштирилган тиббий кўрикдан ўтказилди. Шундан 231 нафар фуқароларда турли касалликлар аниқланди.
Тиббий кўрик жараёнида турли касаллик аниқланган 228 нафар беморларга амбулатор шароитда даволанишга тавсия берилди, юқори технологик операцияга муҳтож 2 нафар беморга туман шифохонасида даволаниш учун йўлланма берилиб, 19 нафар беморлар эса 46 турдаги бепул дори-дармонлар билан таъминланди.
Мамлакатимизда сўнгги йилларда соғлиқни сақлаш соҳасини тубдан такомиллаштириш, тиббиёт муассасаларини энг илғор тиббий жиҳозлар билан таъминлаш, туман марказларидан узоқда яшовчи аҳолига сифатли тиббий хизмат кўрсатиш ва мураккаб амалиётларни туман даражасида бажариш борасида амалга оширилаётган ишлардан кўзланган асосий мақсад инсон қадрини улуғлаш, аҳолининг турмуш сифати ва саломатлик даражасини янада яхшилашдир.
Тадбирда асосий эътибор аҳоли ўртасида соғлом турмуш тарзини кенг тарғиб қилиш, фуқароларнинг тиббий билим ва маданиятини ошириш, касалликларни илк даврида аниқлаш ва даволаш чораларини кўришга қаратилди ҳамда тадбир иштирокчиларига бу борада кенг тушунчалар берилди.
Шунингдек тиббий кўрик якунида мутахассислар томонидан касалликларни даволаш ва саломатликка эътибор қаратиш юзасидан зарур тиббий тавсиялар берилди.
Шуни алоҳида таъкидлаш керакки, аҳолининг саломатлигини сақлаш, касалликларни илк босқичда аниқлаш ва олдини олиш борасида ҳудудларда, айниқса чекка қишлоқларда ўтказилаётган бу каби тиббий кўриклар муҳим аҳамият касб этади.
Туман ҳокимлиги Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
