ОЧИҚ ДАРС ЎТКАЗИЛДИ

Бутун мамлакатимиз бўйлаб мактаб ўқувчиларининг ҳар томонлама билимли, зеҳнли, замонавий таълим технологияларидан унумли фойдалана олувчи авлод бўлиб етишуви учун катта эътибор қаратилмоқда. Ёш авлод замонавий мактабларда, замонавий ўқув қуролларидан фойдаланган ҳолда таълим-тарбия олмоқда.

Мамлакатимиз Президенти томонидан ёшлар маънавиятини юксалтириш ва уларнинг бўш вақтини мазмунли ташкил этиш бўйича 5 та муҳим ташаббус эълон қилинган эди. Биринчи ­­­– ташаббус ёшларнинг мусиқа, рассомлик, адабиёт, театр ва санъатнинг бошқа турларига қизиқишларини оширишга, истеъдодини юзага чиқаришга хизмат қилади. Иккинчи ташаббус эса ёшларни жисмоний чиниқтириш, уларнинг спорт соҳасида қобилиятини намойиш қилишлари учун зарур шароитлар яратишга йўналтирилган. Учинчи ташаббус доирасида аҳоли ва ёшлар ўртасида компьютер технологиялари ва интернетдан самарали фойдаланишни ташкил этишга эътибор қаратилади. Тўртинчи ташаббус ёшлар маънавиятини юксалтириш, улар ўртасида китобхонликни кенг тарғиб қилиш бўйича тизимли ишларни ташкил қилишга йўналтирилган бўлса, бешинчи ташаббус хотин-қизларни иш билан таъминлаш масалаларини назарда тутади.

Республикамизнинг барча жойларида ана шу муҳим беш ташаббус доирасида вазифаларни амалга ошириш учун муҳим лойиҳалар амалга оширилиб, амалий ишлар олиб борилмоқда.

Амударё туманида фаолият юритаётган “Жайхун илҳомлари” нодавлат нотижорат ташкилоти томонидан амалга оширилаётган, “Беш ташаббус ­– беш имконият!” номли лойиҳа асосида аҳолининг маънавиятини юксалтириш, ёшларнинг истеъдодларини юзага чиқариш, уларни турли зарарли иллатлардан ишончли ҳимоя қилиш учун ташкилотларда, овул ва маҳалла фуқаролар йиғинларида, мактабларда турли тадбирлар, учрашувлар, давра суҳбатлари ўтказиб келинмоқда.

Яқинда лойиҳа доирасида Президентимиз томонидан эълон қилинган беш муҳим ташаббуснинг учинчи ташаббуси доирасида Назархон овули ҳудудида яшовчи ёшлар учун 3-сонли мактабда “Компьютер технологиялари ва интернетдан самарали фойдаланиш” мавзусида очиқ дарс ўтказилди.

Айтиш жоизки, Назархон овули ҳудудида жойлашган ушбу мактабда юқори малакали икки нафар мутахассис ўқитувчи информатика фанидан ўқувчиларига сабоқ беради. Замонавий синфхоналарда билим олаётган ёшлар устозлари Қирмизи Камолова, Гулшод Рейпназаровалардан компьютер технологиялари ва интернетдан самарали фойдаланиш сирларини пухта ўрганмоқдалар.

Лойиҳанинг асосий мақсади манзилли қўллаб-қувватлаш дафтарларига киритилган ёшларга ҳар томонлама ёрдам кўрсатишдир. Лойиҳа доирасида “Тараққиёт кўзгуси”, “Менинг оилам” газеталари ва Амударё телевидениеси таҳририятлари билан ҳамкорликда ўтказилаётган тадбирлар ўзининг жуда катта самарасини бермоқда.

Ташкилот томонидан лойиҳа асосида мактаб ўқувчилари ўртасида “Мен ҳавас қиладиган бадиий қаҳрамон”, “Орол – менинг тақдиримда”, “Наврўз – умумхалқ байрами”, “Мустақиллик – олий неъмат” мавзуларида иншолар танловлари, “Рангларда ватан манзаралари” мавзусида расмлар танлови эълон қилиниб, танлов ғолиблари совғалар, “Фахрий ёрлиқ”лар билан тақдирланди. Туманнинг олис ҳудудларида яшовчи ёшлар учун театр томошалари, концертлар, “Китоблар карвони” ташкил этилди.

Мактабда беш муҳим ташаббус доирасида турли тадбирлар ташкил қилиб келинмоқда. Жумладан, учинчи ташаббус доирасида ҳам компьютер технологиялари воситасида турли мусобақалар, очиқ дарслар ўтказилмоқда. Зеро, ҳозирги ҳаётимизни компьютер технологияларисиз тасаввур қилиш қийин. Шунинг учун ҳам мактаб ўқувчилари компьютер сабоқларини астойдил ўрганмоқдалар.

Ўтказилган очиқ дарс мобайнида мактаб ўқувчилари информатика фани сирларини пухта эгаллаётганлигини яна бир бор намойиш қилдилар.

Ўрозали РЕЙИМОВ