ҚАНГЛИ ОВУЛИДАГИ ТИББИЁТ МАСКАНИДА АҲОЛИГА СИФАТЛИ ТИББИЙ ХИЗМАТ КЎРСАТИЛМОҚДА

Юртимизда тиббиётнинг бирламчи бўғинини кучайтириш, айниқса, олис ва чекка ҳудудларда аҳолининг малакали тиббий хизмат олиши учун шароит яратишга жиддий эътибор қаратилиб, оилавий поликлиника ва қишлоқ шифокорлик пунктлари ташкил этилди. Ҳозирги кунда ҳудудларда фаолият олиб бораётган ушбу тиббиёт масканлари зарурий жиҳозлар ва бепул дори-дармонлар билан таъминланганлиги ҳамда уларда муолажалар олиш учун кундузги ўринлар мавжудлиги боис фуқароларнинг оддий муолажалар учун туман марказига сарсон бўлиб боришларига барҳам берилди.

Амударё туманининг чекка ҳудудида жойлашган Қангли овулида ҳам оилавий шифокорлик пункти фаолияти йўлга қўйилган бўлиб, 8228 нафар аҳоли туман марказига бориб юрмасдан, шу ернинг ўзида малакали тиббиёт ходимлари томонидан кўрсатилаётган сифатли тиббий хизматдан фойдаланмоқда. Ушбу масканда турли касалликларни барвақт аниқлаш, мақсадли скрининг тадбирларини амалга ошириш, профилактик махсус препаратлар билан бепул таъминлаш ҳамда соғлом турмуш тарзини кенг тарғиб этишга доир чора-тадбирлар амалга оширилиб келинмоқда.

Қангли оилавий шифокорлик пункти зарур тиббий асбоб-анжомлар, лаборатория жиҳозлари, ЭКГ аппарати билан таъминланган. Қолаверса, шифокорларнинг самарали фаолият юритиши, шунингдек, ташриф буюрувчилар учун ҳам барча шароитлар яратилган. Тиббиёт масканидаги 5 нафар, шундан 3 нафари олий тоифали тажрибали шифокорлар, 23 нафар, шундан 14 нафари олий тоифали ўрта тиббиёт ходимлари аҳоли саломатлиги йўлида хизмат кўрсатиб келмоқда.

Масканда тиббий хизмат кўрсатиш сифатини яхшилаш, оила саломатлигини, оналик ва болаликни муҳофаза қилиш тизимини янада такомиллаштириш, алоҳида эҳтиёжли оилаларга эътибор ва ғамхўрликни кучайтириш каби вазифаларга муҳим аҳамият қаратилмоқда. Ҳудуд аҳолисининг саломатлиги муассаса ходимларининг доимий назоратида бўлиб, мунтазам равишда зарур тиббий ёрдам кўрсатиб келинмоқда.

Тиббиёт ходимлари томонидан календарь режа асосида ойнинг белгиланган кунларида овул ҳудудидаги болаларда 13 турдаги юқумли касалликларнинг олдини олиш бўйича эҳтиётдан эмлаш муолажалари олиб борилмоқда. Шунга кўра жорий йилнинг 6 ойи давомида 1164 нафар болалар турли юқумли касалликларга қраши эмланди. Шунингдек, 2-10 ёшли болаларни ўртасидаги касалликларни эрта аниқлаш максадида ўтган 6 ой давомида жами 1278 нафар бола гижжа касаллигига қарши текширувдан ўтказилди. Улардан 21 нафарида касаллик аниқланиб, амбулатор соғломлаштирилди. 3-18 ёшгача бўлган 2081 нафар болалардан 2058 нафари анкогематологик касалликларни эрта аниқлаш мақсадида оммавий ва селектив скринигдан ўтказилди ва 2 нафари диспансер назоратига олиниб, гематолог билан ҳамкорликда соғломлаштирилди.

Ундан ташқари, 40 ёш ва ундан юқори бўлган 2525 нафар аҳолидан 2223 нафари юқумли бўлмаган касалликларни эрта аниқлаш мақсадида скрининг текширувидан ўтказилди. Улардан 2 нафарида қандли диабет, 18 нафарида гипертония, 12 нафарида эндокрин касаллиги аниқланган бўлса, ҳозирги кунда ушбу беморлар назоратга олиниб соғломлаштирилмоқда.

Бачадон бўйни саратони касаллигини эрта аниқлаш мақсадида 35-55 ёшдаги 1078 нафар аёл-қизлардан 635 нафари скрининг текширувидан ўтказилди ва 2 нафар аёлда бачадон бўйни саратони аниқланди. Кўкрак саратони касалликларини аниқлаш мақсадида 866 нафар 45-65 ёш аёллардан 42 нафари маммография текширувидан ўтказилган бўлса, улардан 1 нафарида саратон белгилари аниқланди. Ҳозирда ушбу аёллар Республика онкология диспансерида даволанишмоқда.

Овул ҳудудидаги 18-40 ёшгача бўлган 3080 аҳолидан 2045 нафари профилактик тиббий кўрикдан ўтказилганида эса 22 нафар фуқарода касаллик аниқланди ва уларни ҳам соғломлаштириш чоралари кўрилди. Туғиш ёшидаги 2113 нафар аёл-қизлардан 2108 нафари тиббий кўрикдан ўтказилганида 444 нафарида экстрагенитал касалликлар аниқланди. Ушбу аёлларнинг 51 нафари стационар шароитда, 360 нафари амбулатория шароитида соғломлаштирилди.

Қангли оилавий шифокорлик пунктида жорий йилнинг 6 ойи давомида ҳомиладор аёлларга ва 1596 нафар туққан аёлларга, 3-15 ёшли 46386 нафар болаларга антиструмин таблеткалари берилган. Шунингдек, 18-35 ёшли 1154 нафар аёл-қизларга фолий кислота таблеткаси тарқатилган.

Ушбу тиббиёт масканида умумий амалиёт шифокори, патронаж ҳамширалар соғлигидан шикоят қилиб келган беморларга хизмат кўрсатади. Ҳудудга бириктирилган ҳамширалар ҳам уйма-уй юриб, аҳоли саломатлигини мунтазам назорат қилади. Унинг тавсияси асосида шифокор бевосита тегишли хонадонга бориб, тиббий муолажалар ўтказади, эҳтиёж бўлса, шифохонага ётиш учун йўлланма беради.

Овул аҳолиси шу ернинг ўзида малакали ва сифатли тиббий хизматдан фойдаланиш имконияти яратилганидан мамнун ва хонадонларига келиб, ҳолидан хабар олиб, соғлом турмуш кечиришига кўмаклашаётган тиббиёт ходимларидан жуда миннатдор.

О.Худойберганова