QANGLI OVULIDAGI TIBBIYoT MASKANIDA AHOLIGA SIFATLI TIBBIY XIZMAT KOʻRSATILMOQDA

Yurtimizda tibbiyotning birlamchi boʻgʻinini kuchaytirish, ayniqsa, olis va chekka hududlarda aholining malakali tibbiy xizmat olishi uchun sharoit yaratishga jiddiy eʼtibor qaratilib, oilaviy poliklinika va qishloq shifokorlik punktlari tashkil etildi. Hozirgi kunda hududlarda faoliyat olib borayotgan ushbu tibbiyot maskanlari zaruriy jihozlar va bepul dori-darmonlar bilan taʼminlanganligi hamda ularda muolajalar olish uchun kunduzgi oʻrinlar mavjudligi bois fuqarolarning oddiy muolajalar uchun tuman markaziga sarson boʻlib borishlariga barham berildi.

Amudaryo tumanining chekka hududida joylashgan Qangli ovulida ham oilaviy shifokorlik punkti faoliyati yoʻlga qoʻyilgan boʻlib, 8228 nafar aholi tuman markaziga borib yurmasdan, shu yerning oʻzida malakali tibbiyot xodimlari tomonidan koʻrsatilayotgan sifatli tibbiy xizmatdan foydalanmoqda. Ushbu maskanda turli kasalliklarni barvaqt aniqlash, maqsadli skrining tadbirlarini amalga oshirish, profilaktik maxsus preparatlar bilan bepul taʼminlash hamda sogʻlom turmush tarzini keng targʻib etishga doir chora-tadbirlar amalga oshirilib kelinmoqda.

Qangli oilaviy shifokorlik punkti zarur tibbiy asbob-anjomlar, laboratoriya jihozlari, EKG apparati bilan taʼminlangan. Qolaversa, shifokorlarning samarali faoliyat yuritishi, shuningdek, tashrif buyuruvchilar uchun ham barcha sharoitlar yaratilgan. Tibbiyot maskanidagi 5 nafar, shundan 3 nafari oliy toifali tajribali shifokorlar, 23 nafar, shundan 14 nafari oliy toifali oʻrta tibbiyot xodimlari aholi salomatligi yoʻlida xizmat koʻrsatib kelmoqda.

Maskanda tibbiy xizmat koʻrsatish sifatini yaxshilash, oila salomatligini, onalik va bolalikni muhofaza qilish tizimini yanada takomillashtirish, alohida ehtiyojli oilalarga eʼtibor va gʻamxoʻrlikni kuchaytirish kabi vazifalarga muhim ahamiyat qaratilmoqda. Hudud aholisining salomatligi muassasa xodimlarining doimiy nazoratida boʻlib, muntazam ravishda zarur tibbiy yordam koʻrsatib kelinmoqda.

Tibbiyot xodimlari tomonidan kalendar reja asosida oyning belgilangan kunlarida ovul hududidagi bolalarda 13 turdagi yuqumli kasalliklarning oldini olish boʻyicha ehtiyotdan emlash muolajalari olib borilmoqda. Shunga koʻra joriy yilning 6 oyi davomida 1164 nafar bolalar turli yuqumli kasalliklarga qrashi emlandi. Shuningdek, 2-10 yoshli bolalarni oʻrtasidagi kasalliklarni erta aniqlash maksadida oʻtgan 6 oy davomida jami 1278 nafar bola gijja kasalligiga qarshi tekshiruvdan oʻtkazildi. Ulardan 21 nafarida kasallik aniqlanib, ambulator sogʻlomlashtirildi. 3-18 yoshgacha boʻlgan 2081 nafar bolalardan 2058 nafari ankogematologik kasalliklarni erta aniqlash maqsadida ommaviy va selektiv skrinigdan oʻtkazildi va 2 nafari dispanser nazoratiga olinib, gematolog bilan hamkorlikda sogʻlomlashtirildi.

Undan tashqari, 40 yosh va undan yuqori boʻlgan 2525 nafar aholidan 2223 nafari yuqumli boʻlmagan kasalliklarni erta aniqlash maqsadida skrining tekshiruvidan oʻtkazildi. Ulardan 2 nafarida qandli diabet, 18 nafarida gipertoniya, 12 nafarida endokrin kasalligi aniqlangan boʻlsa, hozirgi kunda ushbu bemorlar nazoratga olinib sogʻlomlashtirilmoqda.

Bachadon boʻyni saratoni kasalligini erta aniqlash maqsadida 35-55 yoshdagi 1078 nafar ayol-qizlardan 635 nafari skrining tekshiruvidan oʻtkazildi va 2 nafar ayolda bachadon boʻyni saratoni aniqlandi. Koʻkrak saratoni kasalliklarini aniqlash maqsadida 866 nafar 45-65 yosh ayollardan 42 nafari mammografiya tekshiruvidan oʻtkazilgan boʻlsa, ulardan 1 nafarida saraton belgilari aniqlandi. Hozirda ushbu ayollar Respublika onkologiya dispanserida davolanishmoqda.

Ovul hududidagi 18-40 yoshgacha boʻlgan 3080 aholidan 2045 nafari profilaktik tibbiy koʻrikdan oʻtkazilganida esa 22 nafar fuqaroda kasallik aniqlandi va ularni ham sogʻlomlashtirish choralari koʻrildi. Tugʻish yoshidagi 2113 nafar ayol-qizlardan 2108 nafari tibbiy koʻrikdan oʻtkazilganida 444 nafarida ekstragenital kasalliklar aniqlandi. Ushbu ayollarning 51 nafari statsionar sharoitda, 360 nafari ambulatoriya sharoitida sogʻlomlashtirildi.

Qangli oilaviy shifokorlik punktida joriy yilning 6 oyi davomida homilador ayollarga va 1596 nafar tuqqan ayollarga, 3-15 yoshli 46386 nafar bolalarga antistrumin tabletkalari berilgan. Shuningdek, 18-35 yoshli 1154 nafar ayol-qizlarga foliy kislota tabletkasi tarqatilgan.

Ushbu tibbiyot maskanida umumiy amaliyot shifokori, patronaj hamshiralar sogʻligidan shikoyat qilib kelgan bemorlarga xizmat koʻrsatadi. Hududga biriktirilgan hamshiralar ham uyma-uy yurib, aholi salomatligini muntazam nazorat qiladi. Uning tavsiyasi asosida shifokor bevosita tegishli xonadonga borib, tibbiy muolajalar oʻtkazadi, ehtiyoj boʻlsa, shifoxonaga yotish uchun yoʻllanma beradi.

Ovul aholisi shu yerning oʻzida malakali va sifatli tibbiy xizmatdan foydalanish imkoniyati yaratilganidan mamnun va xonadonlariga kelib, holidan xabar olib, sogʻlom turmush kechirishiga koʻmaklashayotgan tibbiyot xodimlaridan juda minnatdor.

O.Xudoyberganova