ТАРАҚҚИЁТ АСОСИ БЎЛГАН ТИНЧЛИКНИ АСРАБ-АВАЙЛАШ – МАСЪУЛИЯТЛИ ВАЗИФА

Тинч ва осойишта ҳаётнинг энг муҳим жиҳатларидан бири – бу ҳар бир маҳаллани жиноятчиликдан ҳоли ҳудудга айлантириш, аҳоли ўртасида жиноятчиликка муросасиз муносабатни шакллантириш ва жиноятчиликни кескин камайтиришдир. Ушбу мақсадни рўёбга чиқариш мақсадида Амударё тумани Ички ишлар бўлими ходимлари томонидан 2023 йил давомида туман ҳокимлиги, сектор раҳбарлари ва жамоатчилик вакиллари билан ҳамкорликда жиноятчилик ва ҳуқуқбузарликларнинг барвақт олдини олиш борасида бир қатор ижобий ишлар амалга оширилди.

Бу борада ўтказилиб келинаётган “Хавфсиз ҳудуд”, “Турмуш”, “Назорат”, “Тўр”, “Тун”, “Давомат” ва “Қорадори” каби бир қанча тадбирлар давомида жиноятчилик ва ҳуқуқбузарликларнинг олдини олишга эришилди. Мазкур тадбирлар натижасида туман ҳудудида жорий йилнинг 9 ойи давомида жиноятчилик ҳолати ўтган йилга нисбатан 190тадан 184тага, яъни 3,16 фоизга, жиноят-қидирув йўналишидаги жиноятлар эса 132тадан 126тага, яъни 4,55 фоизга камайди. Шунингдек, жиноят турларидан қотиллик жинояти 100 фоизга, ўғирлик жинояти 31тадан 17тага, яъни 45,2 фоизга, безорилик жинояти 6тадан 2тага, яъни 66,7 фоизга, одам ўлими билан боғлиқ йўл-транспорт ҳодисалари 11тадан 5тага, яъни 54,5 фоизга камайди.

Тезкор тадбирлар натижасида 9та гиёҳвандлик воситаси ва психотроп моддаларнинг ноқонуний айланмаси билан боғлиқ ҳолатлар аниқланиб, жами 209 грамм опий ва героин гиёҳвандлик воситалари ашёвий далил сифатида олинди, 13та фош этилмаган жиноятлар фош этилди, 11 нафар қидирувдаги шахслар ушланди.

Ҳуқуқбузарликлар профилактикаси йўналишида амалга оширилган ишлар натижасига эътибор қаратсак, тумандаги профилактика инспекторлари томонидан жорий йилнинг ўтган 9 ойи мобайнида жами 1198 нафар шахслар турли хилдаги ҳуқуқбузарликларни содир этганлиги учун профилактик ҳисобга олиниб, 626 нафари белгиланган тартибда ҳисобдан чиқарилган ва 1207таси Ички ишлар бўлимининг профилактик ҳисобида қолган. Шунингдек, тумандаги муқаддам судланган 39 нафар шахсларнинг барчаси суд қарорига асосан назоратга олинган бўлса, шундан 13 нафари маъмурий назорат қоидасини бузганлиги учун Маъмурий жавобгарлик тўғрисидаги Кодекснинг 206-моддаси тартибида, 1 нафари эса Жиноят Кодексининг 226-моддаси тартибида жавобгарликка тортилди.

Бундан ташқари, туманда спиртли ичимликка ружу қўйган 173 нафар шахсларнинг 76 нафарини соғлом ҳаётга қайтаришга кўмаклашиш мақсадида мазкур шахслар даволаниш муассасаларига ётқизилди. Шунингдек, ўтган 9 ой давомида профилактика инспекторлари томонидан ҳуқуқбузарлик содир этган шахсларга нисбатан жами 4846та маъмурий баённомалар расмийлаштирилган бўлса, шундан 136 нафарига маъмурий қамоқ жазоси қўлланилган.

Шу ўринда айтиш жоизки, кейинги йилларда ички ишлар тизимини ислоҳ қилишга устувор эътибор қаратилмоқда. Бу борада барча ҳудудларимизда хавфсиз шароит яратиш, тинчлик ва осойишталикка қарши таҳдидларга тўлиқ барҳам бериш мақсадида ишлаб чиқилган Ўзбекистон Республикасининг Жамоат хавфсизлиги концепцияси ҳамда 2022-2025 йилларда жамоат хавфсизлигини таъминлаш тизимини ривожлантириш стратегияси изчил амалга оширилмоқда.

Юртимизда аҳолининг осойишта умр кечириши йўлида жамиятда қонун устуворлигини, жамоат хавфсизлигини таъминлаш тизимида кенг кўламли ислоҳотлар амалга оширилмоқда. Зеро, юрт тараққиёти ва барқарор ривожланишимизнинг асоси бўлган тинчликни асраб-авайлаш ички ишлар органлари ходимларининг зиммасидаги шарафли бурч ва масъулиятли вазифа саналади.

Биз – соҳа ходимлари элимизда тинчлик-осойишталик барқарорлиги, жамиятимизда қонун устуворлигини таъминлашга барча куч ва имкониятларимизни сафарбар этамиз.

Фурсатдан фойдаланиб, Ватанимиз ва халқимизга садоқат билан хизмат қилиб келаётган ички ишлар органлари ходимлари, барча ҳамкасбларимни 25 октябрь – Ўзбекистон Республикаси ички ишлар органлари ходимлари куни билан табриклайман. Ўз хизмат вазифаларига сидқидилдан ёндашиб, жиноятчиликка қарши курашиш ва унинг олдини олиш, жамоат тартибини сақлашда фидойилик кўрсатиб келаётган осойишталик ҳимоячиларига энг аввало мустаҳкам соғлик, оилаларига файзу-барака, шарафли ишларида улкан ютуқ ва муваффақиятлар тилаб қоламан.

Жамоладдин Юсупов, Амударё тумани Ички ишлар бўлими бошлиғи.