«ЁШ КИТОБХОН» ТАНЛОВИНИНГ ТУМАН ҒОЛИБЛАРИ АНИҚЛАНДИ

Ўзбекистон Республикаси Ёшлар ишлари агентлиги томонидан мутасадди вазирлик ва идоралар ҳамкорлигида анънавий тарзда ўтказилиб келинаётган “Ёш китобхон” танлови тобора кенг қамров касб этмоқда. 3та ёш тоифасида, 5 босқичда ўтказиладиган мазкур маънавий-маърифий тадбир доирасида айни пайтга қадар 3,6 миллион нафардан ортиқ ёшлар иштирок этишиб, улардан 14 нафари танловнинг мутлақ ғолиблари бўлишди ва Президент совғаси – “Спарк” автомобиллари билан мукофотландилар.

Ёшлар маънавиятини юксалтириш, улар ўртасида китобхонликни кенг тарғиб қилиш, 5та муҳим ташаббус доирасидаги тадбирларга ёшларни кенг жалб қилиш орқали уларнинг интеллектуал салоҳиятини юксалтиришга қаратилган мазкур танлов йил сайин кўпроқ ёшларни жалб қилмоқда.

Диёримиздан етишиб чиққан буюк аллома, адиб ва мутафаккирларимизнинг бой маънавий меросини, умумбашарий цивилазацияга, маданият, дунёвий ва диний илм-фан тараққиётига улкан ҳисса қўшган улуғ аждодларимизнинг ноёб асарларини асраб-авайлаш, келгуси авлодларга безавол етказиш, уларнинг нодир меросини, ибратли ҳаёти ва ижтимоий фаолиятини ҳар томонлама чуқур ўрганиш ва тарғиб этиш, ёшларимизни ўзликни англаш, умуминсоний қадриятларга ҳурмат руҳида тарбиялаш мақсадида Республика миқёсида ташкиллаштирилаётган “Ёш китобхон” кўрик-танлови ҳар йили юксак иқтидор эгалари бўлган билимдон ёшларни кашф этмоқда.

Амударё туманида ҳам ҳар йили “Ёш китобхон” танлови юксак уюшқоқлик билан, кўтаринки руҳда ўтказилади. Танлов иштирокчилари орасида Президент совғаси – “Спарк” автомобили совриндорларининг ҳам борлиги амударёлик ёшларнинг интиллектуал салоҳияти юксаклигидан далолатдир.

Жорий йилнинг 27 октябрь санасида бўлиб ўтган “Ёш китобхон” танловининг Амударё туман босқичи ҳам маънавиятга ошно, ахлоқан етук, билимдон ёшлар сафи тобора ошиб бораётганининг амалий исботи сифатида эътироф этилди. Унда 3та ёш тоифасидаги, яъни, 10-14, 15-19, 20-30 ёш тоифаларидаги танловнинг ҳудудий босқичлари ғолиблари бўлган 36 нафар китобхон ёшлар иштирок этдилар.

Манғит шаҳрининг Ойбек номли маҳалласида ўтказилган танловнинг адолатли ва шаффоф ўтказилишини таъминлаш мақсадида Ёшлар ишлари агентлиги Амударё туман бўлими ҳамда Республика Маънавият ва маърифат марказининг туман бўлими масъуллари раҳбарлигида нуфузли ҳакамлар ҳайъати томонидан танлов Низомига мувофиқ китобхонлар билими одилона баҳолаб борилди.

Танлов Низомига кўра, иштирокчилар 4та саволга тезкор жавоб беришлари талаб этилди ва саволлар билет танлаш орқали танлаб олинди, жавоб бериш учун эса 2 дақиқа вақт ажратилди. Иштирокчиларнинг билимдонлик савияси 100 баллгача бўлган баҳолаш тизими орқали баҳолаб борилди.

Ҳаяжонли дақиқаларга бой, қизиқарли савол-жавоблар асосида ўтказилган “Ёш китобхон” танловининг Амударё туман босқичи якунларига кўра, 10-14 ёшли китобхонлар орасида Чаросхон Сафарбоева, 15-19 ёш тоифасида Света Худоёрова, 15-19 ёш тоифасида Омонгул Жўллибоевалар юқори балл тўплаб, “Ёш китобхон” танловининг Қорақалпоғистон Республикаси босқичига йўлланма олдилар.

Танлов ғолиблари ташкилотчилар томонидан муносиб рағбатлантирилдилар.

Робия ЙЎЛДОШЕВА.