ФЕРМЕР ХЎЖАЛИГИ БОШЛИҒИНИ ЎЗГАРТИРИШ ВА РАСМИЙЛАШТИРИШ ТАРТИБ-ҚОИДАЛАРИ ХУСУСИДА ДАВРА СУҲБАТИ ЎТКАЗИЛДИ

Амударё тумани Адлия бўлими Давлат хизматлари маркази ходимлари томонидан аҳоли ва тадбиркорларнинг ҳуқуқий саводхонлигини ошириш, мамлакатимизда тадбиркорлар учун яратилаётган имкониятлар, солиқ тўловлари бўйича енгилликлар, шунингдек, фермер хўжаликлари ва бошқа тадбиркорлик субъектларининг расмий ҳужжатларини юритиш тартиб-қоидалари юзасидан тадбиркорлар иштирокидаги давра суҳбатлари, очиқ ва самимий мулоқот тадбирлари ўтказилиб келинмоқда.

Жорий йилнинг 7 ноябрь санасида Амударё тумани Адлия бўлими давлат хизматлари маркази биносида “Тадбиркорларга ҳуқуқий маслаҳат” доирасида ўтказилган давра суҳбатида ҳам айнан ана шу мазмундаги масалалар бўйича тадбиркорларга кенг тушунча ва тавсиялар берилди.

Давра суҳбатида Амударё туман ҳокимлиги мутахассислари, фермер хўжаликлари раҳбарлари, туман фермер, деҳқон ва томорқа хўжаликлари Кенгаши масъуллари ҳамда Адлия бўлими ДХМ етакчи мутахассислари иштирок этишди.

Ўзбекистон Республикаси Адлия вазирлиги томонидан ишлаб чиқилиб, амалиётга татбиқ этилган илмий-назарий ва услубий қўлланмаларнинг мазмун-моҳияти юзасидан тушунчалар бериш ва амалиётда қўллаш бўйича белгиланган режага мувофиқ ўтказилган мазкур давра суҳбатида “Фермер хўжалигининг бошлиғини ўзгартириш ва расмийлаштириш тартиби” тўғрисида соҳа масъуллари томонидан зарур тушунтиришлар олиб борилди. Унда Амударё туман Адлия бўлими ДХМ етакчи мутахассиси Ҳусниддин Ибодуллаев давра суҳбати иштирокчиларига фермер хўжалигининг бошлиғини ўзгартириш асослари, талаблари ва шартлари бўйича батафсил маълумотлар берди.

Хусусан, фермер хўжалигининг бошлиғи вафот этганлиги муносабати билан ер ижара шартномасига ўзгартириш киритиш бўйича туман ҳокимлигига бериладиган ариза намунаси, ер ижара шартномасига ўзгартириш киритиш бўйича келишувнинг намунавий лойиҳаси, фермер хўжалигининг бошлиғи алмашганлиги муносабати билан ер ижара шартномасига ўзгартириш киритиш бўйича туман ҳокимлигига бериладиган ариза намунаси, ер ижара шартномасига ўзгартириш киритиш бўйича уч томонлама келишувнинг намунавий лойиҳалари кўрсатиб берилди.

Шунингдек, Ҳусниддин Ибодуллаев фермер хўжалигининг бошлиғини ўзгартириш – бу мажбурият эмас, балки бевосита фермер хўжалигининг бошлиғи ва фермер хўжалигини бошқаришни ўз зиммасига олаётган оила аъзоларидан бирининг ҳуқуқи эканлигини мисоллар орқали тушунтириб, бу борадаги зарурий ҳужжатлар ҳақида тавсиялар берди.

Давра суҳбати давомида масъуллар томонидан “Фермер хўжалиги тўғрисида”ги Ўзбекистон Республикаси Қонунининг тегишли моддалари хусусида ҳам иштирокчиларга зарур тушунчалар берилди. Яъни, Ўзбекистон Республикаси “Фермер хўжалиги тўғрисида”ги Қонуннинг 13-моддасига кўра, фермер хўжалиги бошлиғи вафот этган тақдирда, ер участкасини ижарага олиш ҳуқуқи қонунчиликка мувофиқ ижарага олиш шартномасининг амал қилиш муддатига мерос бўйича ўтиши ва бу тегишли тартибда расмийлаштирилиши, шунингдек, мазкур 13-моддага мувофиқ, ер участкасини фермерлик фаолияти билан шуғулланиш учун ижарага олиш ҳуқуқини ер ижара шартномасига ўзгартиришлар киритиш орқали ўз оила аъзоларидан бирига ер ижара шартномаси амал қиладиган муддатга бериш учун асос бўладиган ҳолатлар, хусусан, пенсия ёшига тўлганлиги, меҳнат қобилиятини йўқотганлиги, муддатли ҳарбий хизматга чақирилганлиги, олий таълим муассасаларига кундузги ўқишга қабул қилинганлиги, сайлаб қўйиладиган лавозимларга сайланганлиги каби ҳолатлардан бири юз берганда фермер хўжалиги бошлиғи хоҳишига кўра, оила аъзоларидан бирига фермер хўжалиги бошлиғи вазифасини ўтказиши мумкинлиги бўйича керакли маълумотлар тақдим этилди.

Робия ЙЎЛДОШЕВА.