КАСБИМИЗ МАШАҚҚАТЛИ, АММО ШАРАФЛИ
Халқ саломатлиги йўлида, фидойилик билан меҳнат қилаётган тиббиёт ходимлари ҳар қанча эъзозга, эътирофга муносиб. Беморларга шифо улашиб келаётган шифокор, ҳамширалар Қипчоқ оилавий шифокорлик пунктида ҳам талайгина.
Мамлакатимизда аҳоли соғлиғини муҳофаза қилишга давлат томонидан берилаётган эътибор, аҳолига тиббий хизмат кўрсатиш сифатини ошириш борасида амалга оширилаётган кенг қамровли ишлар мазкур тиббий муассасада ҳам ўзининг яққол ифодасини топмоқда.
Мен ўз қизиқишларимга кўра Элликқалъадаги тиббиёт билим юртига ўқишга кирдим ва 2003 йилда битириб чиқдим. Қипчоқ шаҳарчасидаги касалхонанинг терапия бўлимида меҳнат фаолиятимни бошладим. Ҳозирги кунда 1-сонли оилавий поликлиникадаги тиббий бригадада патронаж ҳамшираси бўлиб ишлайман. Менинг зиммамга Бештом маҳалласи ҳудудида истиқомат қилувчи 208 та хонадондаги 1 минг 30 нафар аҳолига сифатли тиббий хизмат кўрсатишдек масъулиятли вазифа юкланган. Бир ёшгача бўлган 31 нафар болажонлардан ҳар ойда бир марта хабар олиб, саломатлигини назорат қилиш, вазнини ўлчаш, уларни кўкрак сути билан овқатлантиришни тарғиб этиш, 14 нафар ногиронлиги бўлган фуқароларнинг соғлиғини мунтазам назорат қилиб бориш, зарур ҳолларда даволанишга тавсиялар бериб боришдан ташқари, аҳоли орасида соғлом турмуш тарзи афзалликларини тушунтириб, соғлом яшашларига эришиш осон эмас. Бундан ташқари, туғиш ёшидаги аёллардан хабар олиб туриш, туғруқ оралиқларини тўғри режалаштиришга ўргатиш, ҳовли-жойларни озода, ораста сақлаб, санитария-гигиена қоидалари асосида ҳаёт кечиришга тарғиб этиш ҳам масъулиятли вазифа ҳисобланади. Булар бир қарашда жуда мураккабдек туюлса-да, сидқидилдан ишлаган одамга завқли ва шарафли. Хонадонларга кириб борганимда одамларнинг очиқ чеҳра билан қарши олиб, тавсияларимга қулоқ солишлари, амал қилишлари, нуроний кексаларнинг соғлиғини текшириб, ширин сўзлар билан тасалли берганимда кўнгиллари кўтарилиб, миннатдор бўлишлари менга куч–ғайрат бағишлайди. Хизмат ҳудудимдаги ҳар бир хонадон аъзолари кўнглимга яқин, қадрдон. Шу боисдан ҳам ҳар куни хизмат вазифамга хуш кайфиятда отланаман.
Юртимизда ноябрь ойининг иккинчи якшанбаси Тиббиёт ходимлари куни сифатида нишонланиши бизнинг соҳамизга, машаққатли меҳнатимизга ҳурмат-эҳтиром рамзидир. Барча тиббиёт ходимларини касб байрамлари билан қизғин қутлаб, узоқ умр тилайман.
Мастура ТЎРАБОЕВА, 1-сонли оилавий поликлиника патронаж ҳамшираси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
