Туман ҳокими Собир Хўжаметов томонидан Тошёп овулида сайёр қабул ўтказилди

Амударё тумани ҳокими – 1-сектор раҳбари Собир Хўжаметов аҳоли билан яқиндан мулоқотда бўлиш, мавжуд муаммоларни ўрганиш ва уларнинг ҳал этилишига кўмаклашиш мақсадида 16 ноябрь куни Тошёп овули ҳудудидаги 5-сонли мактаб биносида сайёр қабул ўтказди.

Сайёр қабулда 1-сектор ҳудудига бириктирилган ишчи гуруҳи аъзолари, мутасадди ташкилотлар раҳбарлари ҳамда ҳудудда истиқомат қилувчи 20 нафардан ортиқ фуқаролар иштирок этди.

Аҳолининг турли қатламлари билан мулоқот қилиш, мавжуд долзарб муаммоларни аниқлаш, уларни бевосита жойида бартараф этиш юзасидан тезкор ва аниқ чоралар кўриш жойларда ташкил этилаётган сайёр қабулларнинг бош мақсади ҳисобланади. Зеро, барча соҳаларда амалга оширилаётган ислоҳот ва янгиланишлар аввало аҳоли манфаатларини таъминлашга қаратилган.

Сайёр қабулда сектор раҳбарига фуқаролардан бир қанча мурожаатлар келиб тушди. Мурожаатлар мазмуни овул ҳудудидаги баъзи кўчаларга тош ётқизиш, электр кучланиши паст бўлган ҳудудларга янги трансформатор ва бетон симёғочлар ўрнатиш, талабалар кантракт тўловининг бир қисмини тўлаб берилиши ва бошқа масалаларда бўлди. Ундан ташқари, ишсизлик, ижтимоий нафақалар, кадастр ва бошқа масалалар бўйича ҳам мурожаатлар келиб тушиб, мазкур мурожаатларга ҳуқуқий тушунтиришлар берилди.

Сектор раҳбари барча масалаларни бирма бир ўрганди. Мурожаатлар бўйича масъул ташкилот вакилларига шу ернинг ўзида зарур топшириқлар берилди. Муддат талаб этиладиган масалалар юзасидан эса тегишли соҳа мутасаддиларига кўрсатмалар берилиб, тез кунда ҳал этилишига келишиб олинди.

Дарҳақиқат, бугун ҳар бир фуқаро учун барча давлат органлари ва ташкилотларининг эшиклари очиқ. Давлат идоралари раҳбарлари фуқароларнинг мурожаатларини иш хоналарида эмас, балки жойига бориб, ҳақиқий ҳолатни кўрган ва ўрганган ҳолда кўриб чиқмоқдалар.

Туман бўйлаб ўтказилаётган бу каби сайёр қабуллар давлат органлари ва фуқаролар ўртасида мустаҳкам кўприк бўлибгина қолмасдан, аҳолининг ҳукумат раҳбарларига ва давлат идораларига бўлган ишочининг янада мустаҳкамланишига сабаб бўлмоқда.

Шунингдек, давлат идоралари масъулларининг халқ билан мулоқот қилиб, уларнинг муаммоларини ҳал қилиш, мурожаатларини тинглаш бўйича амалга ошираётган бу каби сайёр қабуллари халқимиз турмуш фаровонлигини янада юксалтиришга хизмат қилаётгани билан ҳам аҳамиятлидир.

Аҳоли муаммоларини жойида, тез ва самарали ҳал этиш имконини бераётган, ҳудудларда йиғилиб қолган муаммоларни аниқлаш ва бартараф этишда давлат органлари ва ташкилотлари олдига янги-янги вазифалар қўяётган бу каби сайёр қабуллар халқ фаровонлиги, жамият равнақи ва мамлакат тараққиётига ҳисса қўшмоқда.

Туман ҳокимлиги Ахборот хизмати