Давлат байроғи қабул қилинган кун муносабати билан тадбир ўтказилди
Мамлакатимизнинг давлат рамзи бўлган байроғимиз қабул қилинган 18 ноябрь санаси ҳар йили байрам сифатида кенг нишонланиб келинади. Сана муносабати билан таълим-тарбия масканларида ўқувчи ёшларимизни истиқлолнинг қадрига етишга даъват қилиш, ёшлар онгида давлат размларига нисбатан ҳурмат туйғусини шакллантириш, уларни миллий ва умуминсоний қадриятларга ҳурмат руҳида тарбиялашга йўналтирилган турли тадбирлар ташкил қилинади.
17 ноябрь куни Ихтисослаштирилган таълим муассасалари агентлиги тизимидаги Амударё тумани ихтисослаштирилган мактабида Ўзбекистон Республикаси давлат байроғи қабул қилинганининг 32 йиллиги муносабати билан “Муқаддасдир Ватан байроғи” шиори остида маънавий-маърифий тадбир бўлиб ўтди.
Тадбирда ихтисослаштирилган мактабнинг ўқитувчи ва мураббийлари ҳамда ўқувчилар иштирок этди.
Давлат байроғи юртимизнинг миллий тимсоли ҳисобланади. Байроғимиз халқимизнинг шонли тарихи ва эзгу интилишларини ўзида мужассам этиб, тинч ва осойишта, эркин ҳаётимиз, ёруғ келажагимизга бўлган ишончимизнинг маёғидир.
Тадбир аввалида Ихтисослаштирилган таълим муассасалари агентлиги тизимидаги Амударё тумани ихтисослаштирилган мактаби директорининг ўқув ишлари бўйича ўринбосари Равшан Холмуродов ўқувчиларни мамлакатимиз байроғи қабул қилинганининг 32 йиллиги билан муборакбод этди.
Таъкидланганидек, давлат байроғи миллатнинг бирлиги, мустақиллик тимсоли сифатида ўша халқнинг орзу-истакларини, умидларини, келажакка бўлган ишончини ўзида ифода этади. Мамлакатимизнинг барча ҳудудида кенг нишонланаётган давлатимиз байроғи қабул қилинган кун мустақиллигимизни мустаҳкамлашда, ўз тараққиёт йўлимизни танлашда муҳим сана бўлиши билан бирга, ота-боболаримизнинг эркин ва озод, бахтли ва фаровон ҳаётни таъминлашдаги асрий орзу-умидлари, армонлари ушалган, буюк келажак сари етаклаган кун сифатида тарихга муҳрланган.
Тадбир давомида ушбу муҳим сананинг тарихи ҳамда байроғимизда миллий-тарихий анъаналаримиз, узоқ ўтмишга бориб тақаладиган бой маданиятимиз, поклик беғуборлик, яхшилик, донишмандлик ва садоқат каби буюк фазилатларимиз ўз ифодасини топгани хусусида сўз юритилди.
“Муқаддасдир Ватан байроғи” дея номланган мазкур тадбирда мактабнинг 6-7-8-синфлар ўқувчилари фаол иштирок этдилар. Ўқувчилар томонидан давлат рамзлари, мустақиллик, Ватан ҳақида ажойиб шеърлар айтилди. 5-синф ўқувчилари ўртасида расмлар танлови ўтказилди. Унда ўқувчилар ўзларининг истеъдод ва қобилиятларини синовдан ўтказдилар.
Тадбирда тарих фани ўқитувчиси Бегзод Тўрабоев Ўзбекистон Республикасининг давлат байроғи фақатгина давлат рамзи эмас, у шу юртда туғилиб, шу заминда яшаётган барча миллат ва элатларнинг ғурури, тинчлик ва аҳиллик тимсоли эканлиги, қалбларни қалбларга яқинлаштирадиган, дилларни дилларга улайдиган воситага айланганлиги, дунёнинг қайси бурчагида бўлманг, бу байроқ қадрдон она Ватанни ёдга солиши алоҳида таъкидланди.
Мамлакат ва жамият тараққиёти ҳамда унинг барқарорлигида давлат рамзларининг алоҳида ўрни бор. Шу маънода, миллий байроғимиз давлат ва жамият ҳаёти, унинг жаҳон ҳамжамиятидаги ўрни ҳамда ролини кўрсатишда муҳим аҳамиятга эга бўлиб, ҳар биримиз учун ифтихор тимсоли ҳисобланади.
Қадим-қадимдан халқимиз учун мустақиллик, ҳурлик, тинчлик ва барқарорлик тимсоли бўлиб келган, аждодларимиз ҳам муқаддас билиб, кўз қорачиғидек асраган Ватан байроғи келгуси авлодлар учун ҳам қадрли ва азиз бўлиб қолаверади.
Туман ҳокимлиги Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
