30-СОНЛИ МАКТАБДА “ҲИЛПИРАЙВЕР, БАЙРОҒИМ!” НОМЛИ АДАБИЙ-МУСИҚИЙ ТАДБИР ЎТКАЗИЛДИ

Байроқ ҳар бир давлатнинг муқаддас рамзларидан бири, халқнинг ғурур ва ифтихоридир. Шу боис, 18 ноябрь – давлатимиз байроғи қабул қилинган кун юртимизнинг барча гўшаларида кенг нишонланади.

Ушбу сана муносабати билан Амударё туманидаги 30-сонли мактабда ҳам “Ҳилпирайвер, байроғим!” мавзусида тадбир ўтказилди. Мазкур тадбирдан олдин мактабнинг она тили ва адабиёт фани ўқитувчиси Умида Раҳимбоева 8-“в” синфнинг маънавият соатида давлат рамзимиз бўлмиш байроғимиз ҳақида давра суҳбати ўтказиб, ўқувчилар билан давлат рамзлари ҳақидаги тушунчаларини ривожлантирувчи фикр алмашувлар ташкил этди. Назарий маълумотлар асосида ушбу тушунчаларни тўлиқтирди. Шунингдек, ўқувчиларни қизиқтирган саволларга ҳам жавоб бериб, байроғимизни улуғловчи тақдимотни намойиш этди.

Шундан сўнг, ўқувчилар давлатимизнинг муқаддас рамзлари билан безатилган мактаб саҳнасида ўз иқтидорларини намоён этишди. Хусусан, Ўзбекистон байроғи қабул қилинган сана, ўзбек давлатчилиги тарихи, олис ўтмишда халқпарвар, ватанпарвар аждодларимиз давлат байроғини қандай асраганлари, байроқнинг халқни буюк марралар сари руҳлантиришдаги беқиёс катта аҳамияти ҳақида маърузалар қилишди. Чунончи, улуғ жанҳонгашта бобомиз Амир Темур давлатчилиги давридаги байроқ, ундан олдин Жалолиддин Мангуберди бобомизни боши узра баланд кўтариб ўз она юртини ҳимоя қилишга ундаган давлат байроқларининг тарихий аҳамияти хусусида ўзаро фикр алмашдилар.

Тадбирда ўқувчилар ватанпарварлик руҳидаги, шунингдек, байроғимизни мадҳ этувчи шеърлардан намуналар айтишди, миллий мусиқаларга рақслар ижро этишди.

Бундан ташқари, тадбир давомида “Билимдонлик баҳси” ҳам ўтказилиб, бунда байроқ бўлакчаларидан яхлит расм ҳосил қилиш, берилган байроқ расмлари қайси давлатга тегишли эканлиги ҳақидаги ўқувчиларнинг билимлари синовдан ўтказилди. Беллашувда ўқувчилар ўзларининг билимларини синаш билан биргаликда жамоа бўлиб ҳаракат қилиш, ўзаро дўстона муносабат туйғуларини ҳам ривожлантирдилар.

Бу каби тадбирлар орқали ўқувчиларга давлат рамзлари ҳақида кенгроқ тушунча бериш, бу рамзларга нисбатан ҳурмат туйғусини ошириш асосий мақсад қилиб қўйилган.

Чунки давлат байроғига нисбатан ҳурмат – она Ватанга, халқимизга ҳурмат ва эҳтиром намунасидир. Буни спортда, илм-фан, адабиёт ва санъат йўналишлари бўйича халқаро мусобақаларда иштирок этиб, юқори натижаларга эришган ёшларимиз боши узра давлатимиз байроғи кўтарилган лаҳзаларда чуқур ҳис этамиз ва қалбларимиз ғурур ва ифтихорга тўлади. Албатта, халқаро майдонда давлатимиз рамзи – байроғимизнинг ҳилпираши жонажон Ўзбекистонимизга нисбатан хайрихоҳлик ва ҳурмат-эътиборнинг ошиб бораётганидан далолатдир.

Тадбир якунида ўқувчи-ёшлар Ўзбекистон байроғини бошлари узра баланд кўтариб, мустақил Ватанимизга содиқ фарзандлар бўлишга, она Ватанимизнинг янада гуллаб-яшнаши учун хизмат қилишга қодир инсонлар бўлиб вояга етишга сўз бердилар. Тадбир барчага завқ-шавқ, ғурур бағишлади.

Равшан Баҳромов.