ЎҚУВЧИЛАР ЎРТАСИДА СПОРТ СИНОВЛАРИ ЎТКАЗИЛДИ

Мамлакатимизда жисмоний тарбия ва спортни янада ривожлантириш ҳамда оммавий ҳаракатга айлантириш, аҳолининг жисмоний қобилиятини аниқлаш ва рағбатлантириш, соғлом турмуш тарзи кўникмаларини шакллантириш мақсадида Президент Қарорига кўра 2021 йил 1 августдан бошлаб аҳолининг жисмоний тайёргарлик даражасини баҳолаш тизими жорий этилган эди.

Аҳолининг барча қатламлари ўртасида жисмоний тарбия ва спортни оммалаштириш орқали уларнинг жисмоний қобилияти ва ҳаракат фаоллигини такомиллаштиришда ҳамда зарарли одатлардан ҳимоя қилишда, ушбу қарор муҳим аҳамиятга эга. Ёшларда ирода, ўз кучи ва имкониятларига ишонч каби фазилатларни мустаҳкамлаш, уларда мардлик, жасорат, Ватанга муҳаббат туйғуларини шакллантиришга қаратилган бу чора-тадбирлар, яъни баҳолаш тизими бўйича спорт синовлари махсус ва ихтиёрий равишда аҳолининг етти ёшдан етмиш ёшгача бўлган қатлами ва ундан катталарнинг жисмоний тайёргарлигини аниқлайди.

Спорт синовлари поғона ва мураккаблик даражасидан келиб чиқиб, 15 турдаги машқлардан иборат бўлади. Улар узоқ ва қисқа масофаларга югуриш, сузиш, турникда тортилиш, анжомларни улоқтириш ва бошқаларни ўз ичига олади.

Аҳолининг жисмоний тайёргарлик даражасини баҳолаш тизими бўйича спорт синовларини ўтказиш тадбирлари Амударё туманида ҳам олиб борилаяпти.

17 ноябрь куни тумандаги 33- ва 40-сонли мактабларининг 9-, 11-синфлари ўқувчилари орасида ёш тоифаларига қараб, 7 хил машқларни бажариш бўйича ана шундай синовлар ўтказилди. Тадбирлар туман спорт мактаб тренерлари томонидан белгиланган мезонлар асосида ўтказилди. Спорт синовларини намунали ўтказишда мазкур мактабларнинг жисмоний тарбия ўқитувчилари ҳам фаоллик билан ҳаракат қилдилар.

Спорт синовлари давомида ўқувчилар белгиланган спорт нормативларини қунт билан ва бекаму кўст адо этишга ҳаракат қилдилар ва жисмоний тайёргарлигини намойиш қилдилар.

Спорт – соғлиқ гарови экинлиги, жисмоний фаоллик, спорт билан мунтазам шуғулланиш соғлом ва узоқ яшашга замин бўлиши барчага маълум. Аҳоли орасида спортни оммалаштириш, жисмоний фаол ҳаёт кечиришга даъват этиш борасида амалга оширилаётган бу каби саъй-ҳаракатлардан кўзланган мақсад ҳам одамларнинг узоқ ва соғлом ҳаёт кечиришига эришишдир.

Келгуси йилда бу борадаги тадбирлар яна давом эттирилади ва республикамизнинг 7 ёшдан 70 ёшгача бўлган ва ундан ҳам катта аҳолисининг жисмоний тайёргарлик даражасини баҳолаш мақсадида улар орасида спорт синовлари ўтказилиши режалаштирилмоқда.

Бунда энг аввало мактаблар ўқувчилари синовга қамраб олинади. Шунингдек, корхона, ташкилот ва муассасаларда ишлайдиган ходимлар, кейинчалик уй меҳнати билан шуғулланувчилар, пенсионерларнинг ҳам спорт синовлари орқали жисмоний тайёргарлик даражаси аниқланади. Бундан кўзланган мақсад эса аҳолини, айниқса ёшларни спорт билан мунтазам шуғулланишга жалб этиш орқали соғлом ва бахтиёр яшашига эришишдир.

Ойгул РАЖАБОВА.