Туманимизда “Болаларни эрта ёшдан ривожлантиришни такомиллаштириш” мавзусида семинар бўлиб ўтди

Мактабгача таълим ташкилотларида таълим-тарбия сифати ва самарадорлигини ошириш кўп жиҳатдан у ерда фаолият олиб бораётган педагог-ходимлар, тарбиячиларнинг билим, малака ва тажрибасига боғлиқ. Шу боис ҳам, уларнинг билим ва малакасини ошириб бориш муҳим вазифалардан бири ҳисобланади. Шуларни инобатга олган ҳолда Мактабгача ва мактаб таълими вазирлиги томонидан мактабгача таълим ташкилотлари педагог-ходимларининг малакасини ошириш бўйича қисқа муддатли курслар ташкил этилиб, ўқув машғулотлари, семинарлар ўтказилмоқда.

Амударё туманида ҳам туман Мактабгача ва мактаб таълими бўлимига қарашли Мактабгача таълим ташкилотларида жорий йилнинг 20 ноябрдан 24 ноябри оралиғида қисқа муддатли малака ошириш курслари ташкил этилди.

Мактабгача таълим ташкилотлари ходимларининг билим ва малакаларини ошириш мақсадида қисқа муддатли ўқув курслари Ўзбекистон Республикаси Мактабгача ва мактаб таълими вазирлиги ҳузуридаги Мактабгача таълим агентлиги ҳамда Жаҳон банки билан ҳамкорлигидаги “Болаларни эрта ёшдан такомиллаштириш” инвестицион лойиҳасининг 1-компоненти – “Мактабгача таълим сифатини ошириш” дастури доирасида бўлиб ўтди.

Ушбу дастур 40 соатга мўлжалланган бўлиб, унда тумандаги 52та мактабгача таълим ташкилотларидан жами 90 нафар педагог ходимлар иштирок этдилар. Қисқа муддатли малака ошириш курсларига хорижий мутахассислар ҳам жалб этилиб, машғулотлар уч босқичда ўтказилди.

Кейинги йилларда давлатимиз раҳбарининг ташаббуси билан мактабгача таълим тизимини ривожлантиришга алоҳида эътибор қаратилмоқда. Жумладан, мактабгача таълим тизимини тубдан ислоҳ қилиш, янги муассасалар барпо этиш, мавжудларини реконструкция қилиш, уларнинг моддий-техник базасини мустаҳкамлаш устувор масала сифатида қаралмоқда. Болаларни мактаб таълимига тайёрлаш даражасини тубдан яхшилаш, таълим-тарбия жараёнига замонавий дастур ва технологияларни татбиқ этиш, болажонларнинг интеллектуал салоҳиятини юксалтириш, ҳар жиҳатдан баркамол этиб тарбиялаш борасида ҳам кенг кўламли ишлар амалга оширилмоқда.

Машғулотлар давомида мамлакатимизда ўсиб келаётган авлодни ҳар томонлама етук қилиб вояга етказиш, таълим-тарбия жараёнига таълимнинг самарали шакллари ва усулларини жорий этиш мактабгача таълим ташкилотлари зиммасига улкан масъулият юклаши яна бир бора эътироф этилди. Узлуксиз таълимнинг бош бўғини ҳисобланмиш мактабгача таълим ташкилотларининг асосий вазифаси болани соғлом, ҳар томонлама ривожланган ва эркин шахс сифатида шакллантириш, болаларнинг қобилиятларини аниқлаб, ривожлантириш, таълим олишга бўлган интилишини тарбиялашдан иборат экани алоҳида таъкидланди.

Семинар якунида иштирокчиларга махсус сертификатлар топширилди.

Кўп йиллик тажрибага эга соҳа ходимлари шунингдек, хорижий мутахассислар томонидан болаларнинг билим ва интеллектуал салоҳиятини, фикрлаш қобилиятини эрта ёшдан ривожлантиришдаги замонавий методикалар, илғор хорижий тажрибалар ва психологик ёндашувларнинг узвийлиги бўйича қизиқарли маърузалар ўқилган ушбу семинарда бу борадаги илғор хорижий тажрибалар ҳақида ҳам маълумотлар берилди.

Иштирокчилар томонидан маърузалар ҳамда мазкур йўналишдаги ишларни янада юқори босқичга кўтариш юзасидан таклиф, фикр ва мулоҳазалар билдирилди.

Машғулотларда иштирокчилар ўзларининг фаолиятига доир кўпгина билимларга эга бўлдилар ҳамда ўзларини қизиқтирган саволларга мутахассислар томонидан батафсил жавоб олдилар.

Туман ҳокимлиги Ахборот хизмати