31-сонли мактабда “Миллийлигим – ғурурим” деб номланган кўргазмали тадбир бўлиб ўтди
Қадриятлар – ҳар бир миллатнинг маънавий қиёфасини намоён этади. Буюк мутафаккирлар ҳам қадриятлар миллат маънавиятининг кўзгуси, деб бежиз эътироф этишмаган. Миллий қадриятлар ҳар бир миллатнинг тили, урф-одатлари, тарихи, маданияти, анъаналарини, барча моддий ва маънавий бойликларини, иқтисодий, ижтимоий-сиёсий ҳаётининг барча томонларини ўз ичига қамраб олади. Уларни ўқувчи-ёшларга етказиш бугунги куннинг асосий вазифаларидандир.
2023 йил 25 ноябрь куни Амударё туманидаги 31-сонли мактабда “Миллийлигим – ғурурим” деб номланган кўргазмали тадбир бўлиб ўтди. Унда мактабнинг ўқитувчилари ҳамда 3- ва 9-синф ўқувчилари иштирок этдилар.
Тадбирни мактаб директорининг маънавий-маърифий ишлар бўйича ўринбосари Дилбар Ўрозалиева очиб берди ҳамда ўқувчиларни миллий қадриятларимиз ва анъаналаримизга ҳурмат руҳида тарбиялаш, ёшлар ўртасидаги миллий қадриятларимизга бўлган эътиборни янада кучайтириш ҳамда тарғиб қилиш борасида олиб борилаётган чора-тадбирлар ҳақида тщхталиб ўтди.
Мазкур тадбир ёшлар тарбиясида ўзбек миллий қадриятларининг тутган ўрнини ошириш, мустаҳкамлаш ҳамда буюк аждодларимиздан мерос бўлган бебаҳо, асл миллий қадриятларимизни тарғиб қилиш мақсадида ўтказилди.
Тадбирда миллий қўл ҳунармандчилиги буюмлари ва ўзбек миллатининг урф-одатлари ҳамда анъаналарини тарғиб этувчи кўргазмалар намойиш этилди.
Халқимизнинг асрлар синовларидан ўтиб келаётган бой маданий ва маънавий мероси, миллий қадриятлари, урф-одат ва анъаналари, қўшиқлари, ота-боболаримизнинг мустақиллик йўлида кўрсатган жасорати, бунёдкорлик ишлари ушбу тадбирда яна бир бор тарғиб қилинди. Шунингдек, миллий анъаналарни ўзида мужассам этган миллий кийимлар намойиш этилиб, миллий таомлар тайёрланди ва қадим-қадимдан бизгача етиб келаётган миллий ўйинларимиз ўйналди. Ўқувчилар томонидан ўзбек миллий лапарлари ҳамда аллалар куйланди.
Тадбирда “Миллий либос”, “Миллий қўшиқ” ва “Миллий рақс” йўналишларида ўқувчи-қизлар томонидан миллий қадриятларимиз ҳамда анъаналаримиз акс этган жамоавий саҳна кўринишлар намойиш этилди.
Тадбирда сўзга чиққанлар томонидан қадриятлар ҳар бир миллатнинг ўтмиши, бугуни ва келажагини ойнадек кўрсатиб турувчи энг муҳим омиллардан бири эканлиги таъкидланди.
Мактаб ўқитувчиси Саним Узақбоева ҳар бир миллат фақат унинг ўзига хос бўлган анъана ва қадриятлари билан алоҳида ажралиб туришини алоҳида таъкидлади. Табиийки, ҳар қайси халқнинг бебаҳо бойлиги бўлган қадрият ва анъаналари бир-икки кунда пайдо бўлиб қолмайди, инсониятнинг неча минг йиллик тарихий тажрибасида синовдан ўтиб, сайқал топиб боради.
Ўтказилган ушбу тадбир ҳам ўқувчи-ёшларни юрт тарихи, миллий анъана ва қадриятларимиз, урф-одатларимиз ҳамда анъаналаримиз билан яқиндан таништириш, уларни кенг тарғиб қилиш билан бирга ёшларда миллий ифтихор туйғусини шакллантириш, уларнинг ижтимоий-маънавий билимларини янада ошириш, келажагимиз эгаларини она Ватанга садоқат руҳида тарбиялашга хизмат қилади.
Туман ҳокимлиги Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
