31-sonli maktabda “Milliyligim – gʻururim” deb nomlangan koʻrgazmali tadbir boʻlib oʻtdi

Qadriyatlar – har bir millatning maʼnaviy qiyofasini namoyon etadi. Buyuk mutafakkirlar ham qadriyatlar millat maʼnaviyatining koʻzgusi, deb bejiz eʼtirof etishmagan. Milliy qadriyatlar har bir millatning tili, urf-odatlari, tarixi, madaniyati, anʼanalarini, barcha moddiy va maʼnaviy boyliklarini, iqtisodiy, ijtimoiy-siyosiy hayotining barcha tomonlarini oʻz ichiga qamrab oladi. Ularni oʻquvchi-yoshlarga yetkazish bugungi kunning asosiy vazifalaridandir.

2023-yil 25-noyabr kuni Amudaryo tumanidagi 31-sonli maktabda “Milliyligim – gʻururim” deb nomlangan koʻrgazmali tadbir boʻlib oʻtdi. Unda maktabning oʻqituvchilari hamda 3- va 9-sinf oʻquvchilari ishtirok etdilar.

Tadbirni maktab direktorining maʼnaviy-maʼrifiy ishlar boʻyicha oʻrinbosari Dilbar Oʻrozaliyeva ochib berdi hamda oʻquvchilarni milliy qadriyatlarimiz va anʼanalarimizga hurmat ruhida tarbiyalash, yoshlar oʻrtasidagi milliy qadriyatlarimizga boʻlgan eʼtiborni yanada kuchaytirish hamda targʻib qilish borasida olib borilayotgan chora-tadbirlar haqida tshxtalib oʻtdi.

Mazkur tadbir yoshlar tarbiyasida oʻzbek milliy qadriyatlarining tutgan oʻrnini oshirish, mustahkamlash hamda buyuk ajdodlarimizdan meros boʻlgan bebaho, asl milliy qadriyatlarimizni targʻib qilish maqsadida oʻtkazildi.

Tadbirda milliy qoʻl hunarmandchiligi buyumlari va oʻzbek millatining urf-odatlari hamda anʼanalarini targʻib etuvchi koʻrgazmalar namoyish etildi.

Xalqimizning asrlar sinovlaridan oʻtib kelayotgan boy madaniy va maʼnaviy merosi, milliy qadriyatlari, urf-odat va anʼanalari, qoʻshiqlari, ota-bobolarimizning mustaqillik yoʻlida koʻrsatgan jasorati, bunyodkorlik ishlari ushbu tadbirda yana bir bor targʻib qilindi. Shuningdek, milliy anʼanalarni oʻzida mujassam etgan milliy kiyimlar namoyish etilib, milliy taomlar tayyorlandi va qadim-qadimdan bizgacha yetib kelayotgan milliy oʻyinlarimiz oʻynaldi. Oʻquvchilar tomonidan oʻzbek milliy laparlari hamda allalar kuylandi.

Tadbirda “Milliy libos”, “Milliy qoʻshiq” va “Milliy raqs” yoʻnalishlarida oʻquvchi-qizlar tomonidan milliy qadriyatlarimiz hamda anʼanalarimiz aks etgan jamoaviy sahna koʻrinishlar namoyish etildi.

Tadbirda soʻzga chiqqanlar tomonidan qadriyatlar har bir millatning oʻtmishi, buguni va kelajagini oynadek koʻrsatib turuvchi eng muhim omillardan biri ekanligi taʼkidlandi.

Maktab oʻqituvchisi Sanim Uzaqboyeva har bir millat faqat uning oʻziga xos boʻlgan anʼana va qadriyatlari bilan alohida ajralib turishini alohida taʼkidladi. Tabiiyki, har qaysi xalqning bebaho boyligi boʻlgan qadriyat va anʼanalari bir-ikki kunda paydo boʻlib qolmaydi, insoniyatning necha ming yillik tarixiy tajribasida sinovdan oʻtib, sayqal topib boradi.

Oʻtkazilgan ushbu tadbir ham oʻquvchi-yoshlarni yurt tarixi, milliy anʼana va qadriyatlarimiz, urf-odatlarimiz hamda anʼanalarimiz bilan yaqindan tanishtirish, ularni keng targʻib qilish bilan birga yoshlarda milliy iftixor tuygʻusini shakllantirish, ularning ijtimoiy-maʼnaviy bilimlarini yanada oshirish, kelajagimiz egalarini ona Vatanga sadoqat ruhida tarbiyalashga xizmat qiladi.

Tuman hokimligi Axborot xizmati