ТЎҚСОНБОСТИ УСУЛИДА ЭКИЛГАН ЭКИНЛАР ХАЛҚИМИЗ ДАСТУРХОНИ ТЎКИН БЎЛИШИГА ХИЗМАТ ҚИЛАДИ

Деҳқонларимиз учун йилнинг барча фасллари ҳам синовли. Гоҳ сув камлигидан, гоҳ табиат инжиқликларидан, баҳор-у кузнинг бемаврид ёғин-сочинлари-ю изғиринларидан азият чекадиган асл деҳқонлар қишлоқ хўжалигидаги муаммоларни омилкорлик билан енгиб ўтишнинг сирларини яхши билишади. Бу борада қиличбойлик деҳқонларнинг тажрибаси кўпларга ўрнак.

Кейинги йилларда Амударё туманида озиқ-овқат хавфсизлигини таъминлаш, аҳолининг кундалик эҳтиёжлари учун зарур бўлган сабзавот маҳсулотлари етиштиришни кўпайтириш мақсадида тўқсонбости усулида пиёз, саримсоқпиёз, сабзи ва кичик сиғимли иссиқхоналарда турли ошкўклар етиштиришга алоҳида эътибор қаратилмоқда. Шу мақсадда тумандаги  барча тоифа хўжаликларда жами  1777 гектар майдонга тўқсонбости усулида сабзавот экинлари экилди. Шундан фермер хўжаликларида 110 гектар, деҳқон хўжаликларида 791 гектар ва аҳоли томорқаларида 876 гектар майдонга пиёз ва саримсоқпиёз экинлари сифатли қилиб экилди.

Тўқсонбости усулида сабзавот экинларини экиш ишларига Тошқалъа маҳалласи ҳудудидаги фермер хўжаликларида барвақт киришилди. Айниқса, ҳудуддаги “Нуримбетов Хурсандбек”, “Эркинбой Қўзибоевич”, “Хурсандбек Хўжаков” фермер хўжаликлари далаларида август ойининг охири ва сентябрь ойида экилган пиёз ва саримсоқпиёз аллақачон униб чиқиб, яшил майдонлар ҳосил қилган. Хусусан, “Хурсанд Нурумбетов” фермер хўжалигида 30 сотих пиёз, 10 сотих саримсоқпиёз, “Эркинбой Қўзибоевич” фермер хўжалигида 30 сотих пиёз ва 10 сотих саримсоқпиёз, “Хурсандбек Хўжаков” фермер хўжалигида эса 25 сотих пиёз ва 10 сотих майдонга экилган саримсоқпиёз майсалари баравж ривожланмоқда.

Бундан ташқари, тошқалъаликлар  маҳалла ҳудудини  обод ва кўкаламзор гўшага айлантириш мақсадида туман ҳокимлиги ва МФЙ томонидан етказиб берилган кўчатларни белгиланган ҳудудларга ўтқазишиб, “Яшил макон” умуммиллий лойиҳасида фаол иштирок этишмоқда.

Шунингдек, маҳалла ҳудудида истиқомат қилувчи аҳоли томорқаларида ҳам тўқсонбости усулида сабзавот маҳсулотларини етиштиришга алоҳида эътибор қаратилади. Улар эрта баҳорданоқ барра пиёз, сабзи ва саримсоқпиёз маҳсулотларини бозорга олиб чиқишади. Раҳимбой оға Ражабов ана шундай моҳир томорқачилардан. У оила аъзолари билан баҳамжиҳат ўз томорқа ерида бунёд этган иссиқхонасида эртаги сабзавотларни барвақт етиштиришда ўзига хос иш тажрибасига эга томорқа ер эгаларидан.

Айни пайтда Раҳимбой оғанинг томорқа ерида тўқсонбости усулида экилган 2 сотих  пиёз, иссиқхонасида эса 2 сотих ошкўк, 1 сотих редиска ва 2 сотих булғор қалампири кўзни қувонтирадиган даражада  ривожланмоқда. Иссиқхонага экилган редиска ва булғор қалампирининг ҳосили эса пишиб етилмоқда. Ошкўклар аллақачон бозор растасини безаганидан томорқачи хурсанд. Тўқсонбости экини пиёз ва саримсоқпиёз майсаларини бегона ўтлардан тозалаб, кузги озиқлантириш ишлари олиб борилгани боис, баравж ўсмоқда.

– Эрта баҳорда бозорга биринчи олиб чиқадиган маҳсулотимиз барра пиёз бўлади, – дейди моҳир томорқачи. – Витаминга бой, иштаҳа очувчи кўкпиёзнинг иссиқхона шароитида  етиштирилганидан очиқ далада, тўқсонбости усулида экиб, етиштирилгани жуда фойдали.

Ҳақиқатан ҳам очиқ далада етиштирилган тўқсонбости экинлари эрта баҳорда барвақт униб чиқади ва қуёш нурига тўйиниб, тез етилади.

Шу кунларда Амударё туманининг барча фермер ва деҳқон хўжаликлари, томорқа хўжаликларида экилган тўқсонбости экинларини кузги суғориш, озиқлантириш ишлари ниҳоясига етказилган ва экинлар ям-яшил майсалар ҳосил қилган. Бу эса халқимиз дастурхонини эрта баҳорданоқ эртаги сабзавотлар билан тўлдириш имконини беради.

Робия ЙЎЛДОШЕВА.