ҲАЙВОНОТ ДУНЁСИГА ЗАРАР ЕТКАЗГАН ФУҚАРОГА ЖАЗО ТАЙИНЛАНДИ

Дўстлик маҳалласи фуқаролар йиғини биносида Жиноят ишлари бўйича Амударё туман суди томонидан ўтказилган навбатдаги сайёр суд мажлисида Ўзбекистон Республикаси ЖКнинг 202-моддасида кўрсатилган, яъни ҳайвонот ёки ўсимлик дунёсидан фойдаланиш тартибини бузиш жиноятини содир этган шахсга оид иш кўриб чиқилди.

Суд мажлисида маълум бўлишича, судланувчи В.С. (исм ўзгартирилган) шу йил 11 июнь куни тунги пайтда Қуйи Амударё давлат биосфера резерватининг Жумуртоғ бўлими 8-айланмаси ҳудудининг ўтиш зонасида жойлашган фермер хўжаликларидан биридаги боғда ўзига тегишли бўлган ов милтиқларидан фойдаланган ҳолда ноқонуний ов қилиб, Ўзбекистон Республикаси Қизил китобига киритилган 1 дона Бухоро буғусини отиб ўлдирган. Буғуни ўзига тегишли бўлган автомашинага юклаб, қўшни фермер хўжаликнинг дала шийпонига олиб борган. Шундан кейин буғунинг гўштларини бўлаклаб, бош ва туёқлари билан бирга автомашина юкхонасига жойлаштириб олиб кетган. Фуқаро В.С. ўзининг яшаш уйига етиб келганида резерват ходимлари томонидан ушланган ҳамда ҳайвонот дунёсидан фойдаланиш тартибини бузиб,  99 млн. сўмлик моддий зарар етказганликда айбланган.

Суд иши давомида фуқаро В.С. қаршисига тўпланган далиллар ва бошқа тегишли ҳужжатлар ўрганилди, ҳимоячи ва тарафларнинг сўзлари тингланди. Шундан келиб чиқиб, В.С. Ўзбекистон Республикаси Жиноят кодекси 202-моддасининг 3-қисмининг “ж” банди билан айбли деб топилди ва унга ушбу модда билан 3 йил озодликни чеклаш жазоси тайинланди. Ҳайвонот дунёсига етказилган зарарни қоплаш учун 99 млн. сўм пуллар Қуйи Амударё давлат биосфера резервати фойдасига ўтказиб берилди. Жиноят қуроли деб деб топилиб, Амударё туман ИИБда сақланаётган 2 дона ов милтиқлари Қорақалпоғистон Республикаси ИИВ Хўжалик бўлимига ўтказилди.

Асқар Сафаров, Жиноят ишлари бўйича Амударё туман суди раиси.

(Иллюстратив фото)