36-СОНЛИ МАКТАБДА “WE LOVE ENGLISH” ДЕБ НОМЛАНГАН ТАДБИР ЎТКАЗИЛДИ

Хорижий тиллар, айниқса, инглиз тилини ўрганиш бугунги даврда ривожланиш ва тараққиётнинг асосий шартларидан биридир. Шу сабабли умумтаълим мактабларида ёш авлоднинг ушбу фанга бўлган қизиқишини ошириш, тил ўрганишларига имконият яратишга алоҳида эътибор қаратилмоқда.

Давр талабига кўра мактабларда устоз-муаллимлар интерфаол, инновацион ва қизиқарли усуллардан фойдаланиб, дарсларни мазмунли ўтишга, таълим жараёнига замонавий ахборот-коммуникация технологияларини олиб кириб, улардан мақсадли ва тўғри фойдаланишга, шу орқали ўқувчида чет тилларга бўлган қизиқишни ошириш, ўқитиш самарадорлигини яхшилашга ҳаракат қилишмоқда.

27 ноябрь куни Амударё туманидаги 36-сонли мактабда ҳам “We love English” деб номланган тадбир ўтказилди. Тадбир бошланишида мос тарзда безатилган мактаб фойесида ўқувчилар билан ўйин тарзидаги машғулотлар ўтказилди. Ўқувчилар инглиз ва рус тили фанларидан керакли сўзларни топиб, кроссвордлар ечишди ва ўзларининг ушбу фанларни мукаммал ўзлаштиришганини намоён этишди.

Мактабнинг инглиз ва рус тиллари ўқитувчилари томонидан ташкил этилган ушбу тадбирда директор ўринбосарлари Сарвар Қутлимуродов ҳамда Баҳром Хўжамуродовлар иштирок этдилар ва кечани очиб бердилар. Улар ўз сўзларида сўнгги йилларда юртимизда халқ таълими тизимида чет тилларини ўқитишда янги давр бошлангани, талаблар, методика ўзгаргани, бунда илғор педагогик технологиялар, интерфаол, инновацион усуллардан фойдаланиш талаб этилишини таъкидлаб ўтишди. Мактабларда инглиз тили фани 1-синфлардан бошлаб ўтилаётгани, билимга чанқоқ ўқувчиларнинг тил ўрганишга бўлган қизиқишларини ошириш, уларни инглиз тилининг бой оламига олиб кириш ўқитувчилардан катта меҳнат талаб қилишини эътироф этишди.

Тадбир ўқувчиларнинг инглиз ва рус тилидаги шеърлари, қўшиқлари билан давом эттирилди. Инглиз тилини мукаммал ўрганишга ҳаракат қилаётган ўғил-қизлар рус ва инглиз тилидаги қўшиқларга рақсга тушишди. Мактабнинг 4-синф ўқувчилари “Rain, rain go away”, 7-синф ўқувчилари “Do you want to take” қўшиқларини куйлашди, 8-синф ўқувчилари “Катюша” қўшиғига ва испанча куйга рақс тушишди. Шунингдек, мактабнинг 2-, 5-, 6-, 10-11-синф ўқувчилари ҳам тадбир давомида фаол иштирок этишди.

Мазкур мактабда рус ва инглиз тили фанлари бўйича ўтказилган диктант, иншо, ижодий ишлар танловлари ўзининг ижобий самарасини бермоқда. Очиқ дарс машғулотлари жараёнида ҳам асосий эътибор янги инновацион усуллардан фойдаланиб, ўқувчиларнинг билимини ошириш, улардаги кўникмаларни ривожлантириш, аниқланган бўшлиқларни бартараф этишга қаратилмоқда. Инглиз тили фани ўқитувчилари Хосият Ражабова, Райҳон Ўразбоева, Замира Отажонова, Дилдор Холменова, Дилнура Бабаниёзова, Шаҳло Искандарова, Нилуфар Шомуродова, Дилфуза Давлетова, Мадина Файзуллаева, Муҳтарам Ҳабибуллаевалар ўқув дастурлари доирасидаги дарслардан ташқари, мактаб қошида қўшимча тўгарак машғулотлари ҳам ташкил қилиб, ўқувчи-ёшларнинг тил ўрганишга бўлган қизиқишларини янада оширишмоқда.

Ўқитувчи ва ўқувчилар иштирокида ўтказилган “We love English” номли тадбир ниҳоятда қизиқарли ўтди. Ўқувчилар дарслардаги самарадорлик натижасини, ўзларининг ўзлаштириш даражаларини, хорижий тилларни ўрганишга бўлган интилишларини тадбир давомида яққол кўрсатдилар.

Райҳон Ўрозбоева, 36-сонли мактабнинг инглиз тили фани ўқитувчиси.