36-SONLI MAKTABDA “WE LOVE ENGLISH” DEB NOMLANGAN TADBIR OʻTKAZILDI

Xorijiy tillar, ayniqsa, ingliz tilini oʻrganish bugungi davrda rivojlanish va taraqqiyotning asosiy shartlaridan biridir. Shu sababli umumtaʼlim maktablarida yosh avlodning ushbu fanga boʻlgan qiziqishini oshirish, til oʻrganishlariga imkoniyat yaratishga alohida eʼtibor qaratilmoqda.

Davr talabiga koʻra maktablarda ustoz-muallimlar interfaol, innovatsion va qiziqarli usullardan foydalanib, darslarni mazmunli oʻtishga, taʼlim jarayoniga zamonaviy axborot-kommunikatsiya texnologiyalarini olib kirib, ulardan maqsadli va toʻgʻri foydalanishga, shu orqali oʻquvchida chet tillarga boʻlgan qiziqishni oshirish, oʻqitish samaradorligini yaxshilashga harakat qilishmoqda.

27-noyabr kuni Amudaryo tumanidagi 36-sonli maktabda ham “We love English” deb nomlangan tadbir oʻtkazildi. Tadbir boshlanishida mos tarzda bezatilgan maktab foyesida oʻquvchilar bilan oʻyin tarzidagi mashgʻulotlar oʻtkazildi. Oʻquvchilar ingliz va rus tili fanlaridan kerakli soʻzlarni topib, krossvordlar yechishdi va oʻzlarining ushbu fanlarni mukammal oʻzlashtirishganini namoyon etishdi.

Maktabning ingliz va rus tillari oʻqituvchilari tomonidan tashkil etilgan ushbu tadbirda direktor oʻrinbosarlari Sarvar Qutlimurodov hamda Bahrom Xoʻjamurodovlar ishtirok etdilar va kechani ochib berdilar. Ular oʻz soʻzlarida soʻnggi yillarda yurtimizda xalq taʼlimi tizimida chet tillarini oʻqitishda yangi davr boshlangani, talablar, metodika oʻzgargani, bunda ilgʻor pedagogik texnologiyalar, interfaol, innovatsion usullardan foydalanish talab etilishini taʼkidlab oʻtishdi. Maktablarda ingliz tili fani 1-sinflardan boshlab oʻtilayotgani, bilimga chanqoq oʻquvchilarning til oʻrganishga boʻlgan qiziqishlarini oshirish, ularni ingliz tilining boy olamiga olib kirish oʻqituvchilardan katta mehnat talab qilishini eʼtirof etishdi.

Tadbir oʻquvchilarning ingliz va rus tilidagi sheʼrlari, qoʻshiqlari bilan davom ettirildi. Ingliz tilini mukammal oʻrganishga harakat qilayotgan oʻgʻil-qizlar rus va ingliz tilidagi qoʻshiqlarga raqsga tushishdi. Maktabning 4-sinf oʻquvchilari “Rain, rain go away”, 7-sinf oʻquvchilari “Do you want to take” qoʻshiqlarini kuylashdi, 8-sinf oʻquvchilari “Katyusha” qoʻshigʻiga va ispancha kuyga raqs tushishdi. Shuningdek, maktabning 2-, 5-, 6-, 10-11-sinf oʻquvchilari ham tadbir davomida faol ishtirok etishdi.

Mazkur maktabda rus va ingliz tili fanlari boʻyicha oʻtkazilgan diktant, insho, ijodiy ishlar tanlovlari oʻzining ijobiy samarasini bermoqda. Ochiq dars mashgʻulotlari jarayonida ham asosiy eʼtibor yangi innovatsion usullardan foydalanib, oʻquvchilarning bilimini oshirish, ulardagi koʻnikmalarni rivojlantirish, aniqlangan boʻshliqlarni bartaraf etishga qaratilmoqda. Ingliz tili fani oʻqituvchilari Xosiyat Rajabova, Rayhon Oʻrazboyeva, Zamira Otajonova, Dildor Xolmenova, Dilnura Babaniyozova, Shahlo Iskandarova, Nilufar Shomurodova, Dilfuza Davletova, Madina Fayzullayeva, Muhtaram Habibullayevalar oʻquv dasturlari doirasidagi darslardan tashqari, maktab qoshida qoʻshimcha toʻgarak mashgʻulotlari ham tashkil qilib, oʻquvchi-yoshlarning til oʻrganishga boʻlgan qiziqishlarini yanada oshirishmoqda.

Oʻqituvchi va oʻquvchilar ishtirokida oʻtkazilgan “We love English” nomli tadbir nihoyatda qiziqarli oʻtdi. Oʻquvchilar darslardagi samaradorlik natijasini, oʻzlarining oʻzlashtirish darajalarini, xorijiy tillarni oʻrganishga boʻlgan intilishlarini tadbir davomida yaqqol koʻrsatdilar.

Rayhon Oʻrozboyeva, 36-sonli maktabning ingliz tili fani oʻqituvchisi.