СОҒЛОМ МАЪНАВИЙ МУҲИТ – ЮТУҚЛАРГА АСОС БЎЛАЯПТИ
Мамлакатимизда баркамол авлодни вояга етказиш, ёшларни маънавий-ахлоқий ва жисмонан соғлом этиб тарбиялаш, уларни барча соҳаларда олиб борилаётган ислоҳотларнинг фаол иштирокчисига айлантиришга доир кенг кўламли чора-тадбирлар амалга оширилмоқда. Жумладан, ёшларнинг замонавий илм-фанни чуқур эгаллашига, салоҳиятини ривожлантиришига барча шароитлар яратилган. Айниқса ўсмир-ёшлар кўнглида миллий ва умуминсоний қадриятларга содиқлик, экстремизм, терроризм каби бузғунчи ғояларга нисбатан муросасизликни шакллантиришга, ёт ғояларга нисбатан мафкуравий иммунитетни тарбиялашга эътибор қаратилаётир.
Бунингдек долзарб вазифалар ижросига ҳисса қўшиш мақсадида Амударё телевидениеси таҳририяти Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш Жамоат фонди таъсис этган “Ёшларнинг маънавий руҳий ва интеллектуал салоҳиятини ошириш” мавзусидаги танловида “Юксак маънавиятли ва ахлоқли ёшлар – келажак пойдевори” номли лойиҳаси билан қатнашиб, ғолиб бўлган эди ҳамда муваффақиятли амалга ошириб келмоқда.
Лойиҳа режасига мувофиқ таълим муассасаларида таълим-тарбия ишларига муносиб ҳисса қўшаётган директорларнинг маънавий-маърифий ишлар бўйича ўринбосарлари фаолияти ҳақида “Фаол маънавият тарғиботчиси” рукни остида мақолалар бериб борилмоқда. Лойиҳа ижодкорлари айнан шу мавзуда кўрсатув тайёрлаш мақсадида туманимиздаги 52-сонли мактабда бўлишди ва мактаб директорининг маънавий-маърифий ишлар бўйича ўринбосари Зарифбой Эшниёзов фаолияти билан яқиндан танишишди.
310 ўқувчи ўрнига эга мазкур мактабда айни кунда 39 нафар педагоглар ўқувчи-ёшларга таълим-тарбия беришмоқда. Уларнинг уч нафари олий, 11 нафари биринчи, 14 нафари иккинчи тоифали ўқитувчилардир. Шунингдек, 3 нафари миллий, 3 нафари халқаро сертификатга эга.
Муассаса директорининг маънавий-маърифий ишлар бўйича ўринбосари Зарифбой Эшниёзов ўқитувчилар орасида соғлом муҳит яратиб, уларни дарслар самарадорлигига эришишга рағбатлантира олгани, талабчанлиги боис, эришилаётган натижалар ҳам қувонарли бўлаяпти. Ўқувчиларнинг интиллектуал салоҳиятини ривожлантириш, уларнинг фан асосларини пухта ўзлаштиришига эришиш борасида соғлом рақобат муҳити яратилганлиги ўзининг ижобий самараларини бераяпти.
2022-2023 ўқув йилида фанлар олимпиадасининг туман босқичида Маҳлиё Бозорбоева, Озода Шомуродовалар 1-ўринни эгаллашди, 2023-2024 ўқув йилида эса Маҳлиё Бозорбоева 3-ўринни, Севинч Давлатбоева 1-ўринни енгиб олди. Шунингдек, “Умид ниҳоллари - 2022” спорт мусобақаларида мактабнинг қизлар жамоаси баскетбол бўйича Қорақалпоғистонда учинчи, ўғил болалар жамоаси 1-ўринни эгаллади. 2023 йил 4 май куни 2006-2007 йилда туғилган қизлар ўртасида баскетбол бўйича ўтказилган республика мусобақасида мактаб ўқувчи-қизлари Қорақалпоғистон босқичида 2-ўринни олдилар. Ўқувчилар орасида хорижий тилни ўрганиш борасида “В-2” сертификатини олишга мувофиқ бўлганлари ҳам бор.
Эришаётган натижалар мактаб ўқитувчиларининг ҳамжиҳатликда эзгу мақсадлар йўлида таълим-тарбия ишларини яхши олиб бораётгани, жамоада соғлом маънавий муҳит барқарор бўлганлиги самараси десак, адашмаган бўламиз. Ҳа, асли жисмоний тарбия фани мутахассиси, ўқувчиларини спорт билан мунтазам шуғулланишга жалб этиб, улар орасидан нуфузли спорт мусобақалари ғолибларини тарбиялаб етиштиргани учун “Ўзбекистон халқ таълими аълочиси” кўкрак нишонига сазовор бўлган Зарифбой Эшниёзов аввало ўқитувчилар ўзларига яратилган бугунгидек муносиб меҳнат шароитларига лойиқ ишлаши керак, ўқувчиларни ҳам маънан, ҳам жисмонан баркамол, илмли қилиб улғайтириши лозим, дея ҳисоблайди. Ҳар доим ўзи ҳам шунга интилади, шахсий намуна бўлишга ҳаракат қилади.
Биз Зарифбой Эшниёзовнинг бундан кейинги ишларига ҳам муваффақиятлар тилаб қоламиз.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
