SOGʻLOM MAʼNAVIY MUHIT – YuTUQLARGA ASOS BOʻLAYaPTI

 Mamlakatimizda barkamol avlodni voyaga yetkazish, yoshlarni maʼnaviy-axloqiy va jismonan sogʻlom etib tarbiyalash, ularni barcha sohalarda olib borilayotgan islohotlarning faol ishtirokchisiga aylantirishga doir keng koʻlamli chora-tadbirlar amalga oshirilmoqda. Jumladan, yoshlarning zamonaviy ilm-fanni chuqur egallashiga, salohiyatini rivojlantirishiga barcha sharoitlar yaratilgan. Ayniqsa oʻsmir-yoshlar koʻnglida milliy va umuminsoniy qadriyatlarga sodiqlik, ekstremizm, terrorizm kabi buzgʻunchi gʻoyalarga nisbatan murosasizlikni shakllantirishga, yot gʻoyalarga nisbatan mafkuraviy immunitetni tarbiyalashga eʼtibor qaratilayotir.

Buningdek dolzarb vazifalar ijrosiga hissa qoʻshish maqsadida Amudaryo televideniyesi tahririyati Oliy Majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash Jamoat fondi taʼsis etgan “Yoshlarning maʼnaviy ruhiy va intellektual salohiyatini oshirish” mavzusidagi tanlovida “Yuksak maʼnaviyatli va axloqli yoshlar – kelajak poydevori” nomli loyihasi bilan qatnashib, gʻolib boʻlgan edi hamda muvaffaqiyatli amalga oshirib kelmoqda.

Loyiha rejasiga muvofiq taʼlim muassasalarida taʼlim-tarbiya ishlariga munosib hissa qoʻshayotgan direktorlarning maʼnaviy-maʼrifiy ishlar boʻyicha oʻrinbosarlari faoliyati haqida “Faol maʼnaviyat targʻibotchisi” rukni ostida maqolalar berib borilmoqda. Loyiha ijodkorlari aynan shu mavzuda koʻrsatuv tayyorlash maqsadida tumanimizdagi 52-sonli maktabda boʻlishdi va maktab direktorining maʼnaviy-maʼrifiy ishlar boʻyicha oʻrinbosari Zarifboy Eshniyozov faoliyati bilan yaqindan tanishishdi.

310 oʻquvchi oʻrniga ega mazkur maktabda ayni kunda 39 nafar pedagoglar oʻquvchi-yoshlarga taʼlim-tarbiya berishmoqda. Ularning uch nafari oliy, 11 nafari birinchi, 14 nafari ikkinchi toifali oʻqituvchilardir. Shuningdek, 3 nafari milliy, 3 nafari xalqaro sertifikatga ega.

Muassasa direktorining maʼnaviy-maʼrifiy ishlar boʻyicha oʻrinbosari Zarifboy Eshniyozov oʻqituvchilar orasida sogʻlom muhit yaratib, ularni darslar samaradorligiga erishishga ragʻbatlantira olgani, talabchanligi bois, erishilayotgan natijalar ham quvonarli boʻlayapti. Oʻquvchilarning intillektual salohiyatini rivojlantirish, ularning fan asoslarini puxta oʻzlashtirishiga erishish borasida sogʻlom raqobat muhiti yaratilganligi oʻzining ijobiy samaralarini berayapti.

 2022-2023 oʻquv yilida fanlar olimpiadasining tuman bosqichida Mahliyo Bozorboyeva, Ozoda Shomurodovalar 1-oʻrinni egallashdi, 2023-2024 oʻquv yilida esa Mahliyo Bozorboyeva 3-oʻrinni, Sevinch Davlatboyeva 1-oʻrinni yengib oldi. Shuningdek, “Umid nihollari - 2022” sport musobaqalarida maktabning qizlar jamoasi basketbol boʻyicha Qoraqalpogʻistonda uchinchi, oʻgʻil bolalar jamoasi 1-oʻrinni egalladi. 2023-yil 4-may kuni 2006-2007-yilda tugʻilgan qizlar oʻrtasida basketbol boʻyicha oʻtkazilgan respublika musobaqasida maktab oʻquvchi-qizlari Qoraqalpogʻiston bosqichida 2-oʻrinni oldilar. Oʻquvchilar orasida xorijiy tilni oʻrganish borasida “V-2” sertifikatini olishga muvofiq boʻlganlari ham bor.

Erishayotgan natijalar maktab oʻqituvchilarining hamjihatlikda ezgu maqsadlar yoʻlida taʼlim-tarbiya ishlarini yaxshi olib borayotgani, jamoada sogʻlom maʼnaviy muhit barqaror boʻlganligi samarasi desak, adashmagan boʻlamiz. Ha, asli jismoniy tarbiya fani mutaxassisi, oʻquvchilarini sport bilan muntazam shugʻullanishga jalb etib, ular orasidan nufuzli sport musobaqalari gʻoliblarini tarbiyalab yetishtirgani uchun “Oʻzbekiston xalq taʼlimi aʼlochisi” koʻkrak nishoniga sazovor boʻlgan Zarifboy Eshniyozov avvalo oʻqituvchilar oʻzlariga yaratilgan bugungidek munosib mehnat sharoitlariga loyiq ishlashi kerak, oʻquvchilarni ham maʼnan, ham jismonan barkamol, ilmli qilib ulgʻaytirishi lozim, deya hisoblaydi. Har doim oʻzi ham shunga intiladi, shaxsiy namuna boʻlishga harakat qiladi.

Biz Zarifboy Eshniyozovning bundan keyingi ishlariga ham muvaffaqiyatlar tilab qolamiz.

Oygul RAJABOVA.