“МЕН ЎҚИГАН БАДИИЙ АСАР” ВИДЕОРОЛИКЛАР ТАНЛОВИ ҒОЛИБЛАРИ АНИҚЛАНДИ
Ёшлар маънавиятини юксалтириш, улар онгида Ватанга муҳаббат, миллий ва умуминсоний қадриятларга садоқат руҳини шакллантириш мақсадида Амударё телевидениеси ижодий жамоаси томонидан Олий Мажлис ҳузуридаги ННТлар ва фуқаролик жамиятининг бошқа институтларини қўллаб-қувватлаш жамоат фонди томонидан молиялаштирилган “Юксак маънавиятли ва ахлоқли ёшлар – келажак пойдевори” лойиҳаси доирасида 2023 йилнинг январь-декабрь ойлари давомида кўплаб маънавий-маърифий тадбирлар амалга оширилди. Хусусан, ёшларнинг бўш вақтларини мазмунли ўтказиш, уларни мафкура майдонининг турли хуружларидан ҳимоя қилиш, маънавий дунёсини бойитиш мақсадида янги асарлар тақдимотлари, сайёр кутубхоналар, сайёр китоб карвонлари, китобхонлик кечалари ташкил этилиб, бу тадбирларга Амударё туманининг энг чекка ҳудудларидаги қишлоқ ёшлари ҳам қамраб олинди.
“Жаҳолатга қарши - маърифат” тамойили асосида ижтимоий-маънавий муҳитни соғломлаштиришга қаратилган давлат ва жамоат ташкилотлари билан ҳамкорликда ташкил этилган учрашув ва давра суҳбатлари, иншолар, видеороликлар танловларининг ташкил этилиши ёшлар ва ўсмир-ёшлар томонидан катта қизиқиш билан кутиб олинди.
Жорий йилнинг декабрь ойида эса ёшларни китобхонликка қизиқтириш орқали уларни маънавий баркамол инсонлар қилиб тарбиялашга, оилаларда маънавий муҳит барқарорлигини таъминлашга ҳисса қўшиш мақсадида “Мен ўқиган бадиий асар” мавзусида видеороликлар танлови ўтказилган эди. Мазкур танловда туманимизнинг барча ҳудудларида таълим-тарбия олаётган китобхон ўқувчи-ёшлар фаол иштирок этишди. Уларнинг кўпчилиги Ўзбекистон Қаҳрамонлари Саид Аҳмад, Абдулла Орипов, Эркин Воҳидов, Ўзбекистон халқ ёзувчиси Ўткир Ҳошимов, Қорақалпоқ адабиётининг забардаст намоёндалари Тўлепберген Қаипбергенов, Ибройим Юсупов, шунингдек, ўзбек мумтоз адабиёти устунлари Алишер Навоий Абдулла Қодирий, Чўлпон, Фитрат каби шоир ва ёзувчилар асарлари бўйича видеороликлар тайёрлаб жўнатишган.
Танлов ташкилий ҳайъати аъзолари томонидан барча видеороликлар тасвир аниқлиги, баён этилган фикрлар, китобхонларнинг дунёқараши, қолаверса, танловга қўйилган талаблар асосида ўрганилиб, энг яхши видеороликлар танлаб олинди.
Танлов ҳайъати аъзоларининг хулосасига кўра, 30-сонли мактабнинг 8-синф ўқувчиси Зилола Саъдуллаева тайёрлаган видеоролик 1-ўринга муносиб кўрилди. 2-ўрин ушбу мактабнинг 8-синф ўқувчиси Сарвара Фарҳодова ҳамда 11-сонли мактаб филиалининг 7-синф ўқувчиси Маҳфуза Маратоваларга насиб этди. 30-сонли мактабнинг 11-синф ўқувчилари Дилдора Жумамуродова ва Роҳатой Бозорбоевалар тайёрлаган видеороликлар эса 3-ўринга лойиқ кўрилди.
Видеороликларни танлаб олишда муаллифнинг ўз дўстлари орасида китобхонликни тарғиб этишдаги шахсий фикрлари, ўзи ўқиган бадиий асарлардан олган таассуротлари, ҳаётий хулосалари ва китоб мутолааси туфайли дунёқарашининг ижобий томонга ўзгаргани хусусидаги мулоҳазаларига устунлик берилди.
Жорий йилнинг 26 декабрь санасида танлов ғолиблари Амударё телевидениеси таҳририяти томонидан рағбатлантирилди.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
