“MEN OʻQIGAN BADIIY ASAR” VIDEOROLIKLAR TANLOVI GʻOLIBLARI ANIQLANDI

Yoshlar maʼnaviyatini yuksaltirish, ular ongida Vatanga muhabbat, milliy va umuminsoniy qadriyatlarga sadoqat ruhini shakllantirish maqsadida Amudaryo televideniyesi ijodiy jamoasi tomonidan Oliy Majlis huzuridagi NNTlar va fuqarolik jamiyatining boshqa institutlarini qoʻllab-quvvatlash jamoat fondi tomonidan moliyalashtirilgan “Yuksak maʼnaviyatli va axloqli yoshlar – kelajak poydevori” loyihasi doirasida 2023-yilning yanvar-dekabr oylari davomida koʻplab maʼnaviy-maʼrifiy tadbirlar amalga oshirildi. Xususan, yoshlarning boʻsh vaqtlarini mazmunli oʻtkazish, ularni mafkura maydonining turli xurujlaridan himoya qilish, maʼnaviy dunyosini boyitish maqsadida yangi asarlar taqdimotlari, sayyor kutubxonalar, sayyor kitob karvonlari, kitobxonlik kechalari tashkil etilib, bu tadbirlarga Amudaryo tumanining eng chekka hududlaridagi qishloq yoshlari ham qamrab olindi.

“Jaholatga qarshi - maʼrifat” tamoyili asosida ijtimoiy-maʼnaviy muhitni sogʻlomlashtirishga qaratilgan davlat va jamoat tashkilotlari bilan hamkorlikda tashkil etilgan uchrashuv va davra suhbatlari, insholar, videoroliklar tanlovlarining tashkil etilishi yoshlar va oʻsmir-yoshlar tomonidan katta qiziqish bilan kutib olindi.

Joriy yilning dekabr oyida esa yoshlarni kitobxonlikka qiziqtirish orqali ularni maʼnaviy barkamol insonlar qilib tarbiyalashga, oilalarda maʼnaviy muhit barqarorligini taʼminlashga hissa qoʻshish maqsadida “Men oʻqigan badiiy asar” mavzusida videoroliklar tanlovi oʻtkazilgan edi. Mazkur tanlovda tumanimizning barcha hududlarida taʼlim-tarbiya olayotgan kitobxon oʻquvchi-yoshlar faol ishtirok  etishdi. Ularning koʻpchiligi Oʻzbekiston Qahramonlari Said Ahmad, Abdulla Oripov, Erkin Vohidov, Oʻzbekiston xalq yozuvchisi Oʻtkir Hoshimov, Qoraqalpoq adabiyotining zabardast namoyondalari Toʻlepbergen Qaipbergenov, Ibroyim Yusupov, shuningdek, oʻzbek mumtoz adabiyoti ustunlari Alisher Navoiy  Abdulla Qodiriy, Choʻlpon, Fitrat kabi shoir va yozuvchilar asarlari boʻyicha videoroliklar tayyorlab joʻnatishgan.

Tanlov tashkiliy hayʼati aʼzolari tomonidan barcha videoroliklar tasvir aniqligi, bayon etilgan fikrlar, kitobxonlarning dunyoqarashi, qolaversa, tanlovga qoʻyilgan talablar asosida oʻrganilib, eng yaxshi videoroliklar tanlab olindi.

Tanlov hayʼati aʼzolarining xulosasiga koʻra, 30-sonli maktabning 8-sinf oʻquvchisi Zilola Saʼdullayeva tayyorlagan videorolik 1-oʻringa munosib koʻrildi. 2-oʻrin ushbu maktabning 8-sinf oʻquvchisi Sarvara Farhodova hamda 11-sonli maktab filialining 7-sinf oʻquvchisi Mahfuza Maratovalarga nasib etdi. 30-sonli maktabning 11-sinf oʻquvchilari Dildora Jumamurodova va Rohatoy Bozorboyevalar tayyorlagan videoroliklar esa 3-oʻringa loyiq koʻrildi.

Videoroliklarni tanlab olishda muallifning oʻz doʻstlari orasida kitobxonlikni targʻib etishdagi shaxsiy fikrlari, oʻzi oʻqigan badiiy asarlardan olgan taassurotlari, hayotiy  xulosalari va kitob mutolaasi tufayli dunyoqarashining ijobiy tomonga oʻzgargani xususidagi mulohazalariga ustunlik  berildi.

Joriy yilning 26-dekabr sanasida  tanlov gʻoliblari Amudaryo televideniyesi tahririyati tomonidan ragʻbatlantirildi.

Robiya YOʻLDOShEVA.