73-СОНЛИ МАКТАБНИНГ ТАЖРИБАЛИ ПЕДАГОГЛАРИ ТАНИҚЛИ ЁЗУВЧИ ВА ШОИРЛАР БИЛАН УЧРАШДИЛАР

Амударё туманининг “Тараққиёт кўзгуси” газетаси таҳририяти ижодий жамоаси ҳамиша халқ орасида, халқни янги марралар сари руҳлантириш, ўсиб келаётган ёш авлодни ҳар томонлама етук ва маънавиятли инсонлар қилиб тарбиялашдек шарафли вазифани адо этишда чинакам тарғиботчилар сифатида доимо фаол.

Айниқса, Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди томонидан эълон қилиниб келинаётган танловларда ғолибликни қўлга киритиб, турли йўналишлардаги лойиҳаларни муваффақиятли амалга ошириб келишмоқда.

Хусусан, ёшлар китобхонлигини ривожлантириш, ижодкор ёшларни қўллаб-қувватлаш, ўсиб келаётган ёш авлодни турли ёт оқимлардан ҳимоя қилишга қаратилган маънавий-маърифий тадбирларга энг чекка қишлоқлардаги ёшлар ҳам қамраб олиниб, улар билан самимий, дилдан суҳбат тадбирлари, ёзувчи ва шоирлар иштирокидаги давра суҳбатлари ҳам ўтказилаётгани ўзининг ижобий самарасини бермоқда.

Ёшларнинг бўш вақтларини мазмунли ўтказиш, мафкура майдонининг ҳар қандай хуружларидан ҳимоя қилиш, маънавий дунёсини бадиий етук асарларга сингдирилган ғоялар билан бойитиш мақсадида “Маънавият кунлари” доирасида ўтказилаётган ёзувчи ва шоирлар билан намунали умумтаълим мактабларининг тажрибали педагоглари, ижодкор ўқувчи-ёшлар иштирокидаги давра суҳбатлари ҳақиқий маънавият ва китобхонлик байрами каби иштирокчиларга кўтаринки руҳ бағишламоқда.

Амударё туманининг 2-сектори ҳудудидаги таълим-тарбия ишлари яхши йўлга қўйилган 73-сонли умумтаълим мактабида 10 январь санасида “Адабиёт ва шеърият – юксак маънавият сари етакловчи куч” шиори остида бўлиб ўтган давра суҳбати ҳам иштирокчиларга олам-олам завқ улашгани билан муҳим аҳамият касб этди.

“Тараққиёт кўзгуси” газетаси таҳририятининг “Билимли ва маънавиятли ёшлар билан – Учинчи Ренессанс сари” грант лойиҳаси доирасида ўтказилган “Маънавият куни”да 73-сонли умумтаълим мактабининг тажрибали педагоглар жамоаси, ижодкор ёшлари иштирокидаги давра суҳбатида грант лойиҳа ижодкорлари, “Жайхун илҳомлари” ННТ аъзоси, иқтидорли шоира Зуҳра Аҳмедова, Ўзбекистон Ёзувчилари ижодий Уюшмаси аъзоси, Қорақалпоғистон Республикасида хизмат кўрсатган журналист, шоира Робия Йўлдошевалар иштирок этишди.

Давра суҳбатини 73-сонли мактаб директорининг маънавий-маърифий ишлар бўйича ўринбосари Зарифбой Хўжаниёзов очди ва “Маънавият кунлари” доирасида “Тараққиёт кўзгуси” газетаси таҳририяти ижодий жамоаси томонидан амалга оширилаётган “Билимли ва маънавиятли ёшлар билан – Учинчи Ренессанс сари” лойиҳаси ва ушбу лойиҳа доирасидаги маънавий-маърифий тадбирларнинг ўсиб келаётган ёш авлод таълим-тарбиясидаги аҳамияти хусусида сўз юритди. Шундан сўнг, давра суҳбати иштирокчилари учун очиқ ва самимий мулоқот муҳити яратилди. Унга кўра, ёзувчи ва шоиралар билан мактабнинг тажрибали педагоглари маънавий-маърифий тарбия борасида ўзаро фикр алмашдилар.

Айниқса, Робия Йўлдошеванинг қадим Қиличбой заминининг тарихи, бу заминдан етишиб чиққан буюк тарихий шахслар, хусусан, холимбеглик иккинчи жаҳон уруши иштирокчиларининг қаҳрамонона ҳаётлари, холимбеглик ёшларнинг ифтихорига айланган Армия генерали Мадамин Ражабов, Қиличбой арна каналини бунёд этган Қиличниёзбой бобо, бу заминдан етишиб чиққан олимлар, давлат ва жамоат арбоблари, ёзувчи ва шоирлар ҳақидаги ҳикоялари иштирокчиларда ўз элдошларидан фахрланиш туйғуларини уйғотди.

Шунингдек, давра суҳбатида тажрибали тарих фани ўқитувчиси Насибахон Маташова, мактабнинг амалиётчи-психологи Дилфуза Султонова, мактаб директорининг маънавий-маърифий ишлар бўйича ўринбосари Зарифбой Хўжаниёзовлар ҳозирги замон ўзбек адабиётининг йирик намояндалари, ўзбек мумтоз адабиёти вакилларининг асарлари ва бу асарларнинг ёшлар таълим-тарбиясидаги аҳамияти хусусида қимматли фикрлар билдирдилар.

Давра суҳбати қизғин баҳс-мунозараларга ҳам бой бўлди. Ижодкор ёшлар ўзлари ўқиган асарлар мазмун-моҳияти юзасидан ўзаро фикрлашиб, китобхонликнинг ўз ҳаётларида тутган ўрни ҳақида тўлқинланиб сўзладилар.

Маънавий-маърифий, адабий суҳбатлар қизғин мушоирага уланиб кетди. Мушоирада ўқитувчилар ҳам, ижодкор ўқувчилар ҳам фаол иштирок этдилар. 73-сонли мактабнинг 11-синф ўқувчиси Севинчой Зарипова ўзининг қизиқарли саволлари билан, амалиётчи-психолог Дилфуза Султонова ўз ижодидан намуналар ўқиш орқали давра суҳбатига файз бағишладилар.

Шундан сўнг, “Жайхун илҳомлари” ННТ аъзоси, шоира Зуҳра Аҳмедова давра иштирокчиларига байрамона кайфият бағишловчи Янги йилни мадҳ этувчи шеърлар ўқиди.

Тадбир давомида таниқли журналист, ёзувчи ва шоира Робия Йўлдошева она Ватан, халқ бирдамлиги, дўстлик ва тинчлик, истиқлол ва ёшлар куч-қудрати мадҳидаги шеърларидан ўқиб берди.

Давра суҳбати иштирокчилари туманимизда яшаб ижод этаётган таниқли ижодкорлар билан учрашувдан олам-олам завқ олдилар.

Махсус мухбиримиздан