73-SONLI MAKTABNING TAJRIBALI PEDAGOGLARI TANIQLI YoZUVChI VA ShOIRLAR BILAN UChRAShDILAR

Amudaryo tumanining “Taraqqiyot koʻzgusi” gazetasi tahririyati ijodiy jamoasi hamisha xalq orasida, xalqni yangi marralar sari ruhlantirish, oʻsib kelayotgan yosh avlodni har tomonlama yetuk va maʼnaviyatli insonlar qilib tarbiyalashdek sharafli vazifani ado etishda chinakam targʻibotchilar sifatida doimo faol.

Ayniqsa, Oliy Majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi tomonidan eʼlon qilinib kelinayotgan tanlovlarda gʻoliblikni qoʻlga kiritib, turli yoʻnalishlardagi loyihalarni muvaffaqiyatli amalga oshirib kelishmoqda.

Xususan, yoshlar kitobxonligini rivojlantirish, ijodkor yoshlarni qoʻllab-quvvatlash, oʻsib kelayotgan yosh avlodni turli yot oqimlardan himoya qilishga qaratilgan maʼnaviy-maʼrifiy tadbirlarga eng chekka qishloqlardagi yoshlar ham qamrab olinib, ular bilan samimiy, dildan suhbat tadbirlari, yozuvchi va shoirlar ishtirokidagi davra suhbatlari ham oʻtkazilayotgani oʻzining ijobiy samarasini bermoqda.

Yoshlarning boʻsh vaqtlarini mazmunli oʻtkazish, mafkura maydonining har qanday xurujlaridan himoya qilish, maʼnaviy dunyosini badiiy yetuk asarlarga singdirilgan gʻoyalar bilan boyitish maqsadida “Maʼnaviyat kunlari” doirasida oʻtkazilayotgan yozuvchi va shoirlar bilan namunali umumtaʼlim maktablarining tajribali pedagoglari, ijodkor oʻquvchi-yoshlar ishtirokidagi davra suhbatlari haqiqiy maʼnaviyat va kitobxonlik bayrami kabi ishtirokchilarga koʻtarinki ruh bagʻishlamoqda.

Amudaryo tumanining 2-sektori hududidagi taʼlim-tarbiya ishlari yaxshi yoʻlga qoʻyilgan 73-sonli umumtaʼlim maktabida 10-yanvar sanasida “Adabiyot va sheʼriyat – yuksak maʼnaviyat sari yetaklovchi kuch” shiori ostida boʻlib oʻtgan davra suhbati ham ishtirokchilarga olam-olam zavq ulashgani bilan muhim ahamiyat kasb etdi.

“Taraqqiyot koʻzgusi” gazetasi tahririyatining “Bilimli va maʼnaviyatli yoshlar bilan – Uchinchi Renessans sari” grant loyihasi doirasida oʻtkazilgan “Maʼnaviyat kuni”da 73-sonli umumtaʼlim maktabining tajribali pedagoglar jamoasi, ijodkor yoshlari ishtirokidagi davra suhbatida grant loyiha ijodkorlari, “Jayxun ilhomlari” NNT aʼzosi, iqtidorli shoira Zuhra Ahmedova, Oʻzbekiston Yozuvchilari ijodiy Uyushmasi aʼzosi, Qoraqalpogʻiston Respublikasida xizmat koʻrsatgan jurnalist, shoira Robiya Yoʻldoshevalar ishtirok etishdi.

Davra suhbatini 73-sonli maktab direktorining maʼnaviy-maʼrifiy ishlar boʻyicha oʻrinbosari Zarifboy Xoʻjaniyozov ochdi va “Maʼnaviyat kunlari” doirasida “Taraqqiyot koʻzgusi” gazetasi tahririyati ijodiy jamoasi tomonidan amalga oshirilayotgan “Bilimli va maʼnaviyatli yoshlar bilan – Uchinchi Renessans sari” loyihasi va ushbu loyiha doirasidagi maʼnaviy-maʼrifiy tadbirlarning oʻsib kelayotgan yosh avlod taʼlim-tarbiyasidagi ahamiyati xususida soʻz yuritdi. Shundan soʻng, davra suhbati ishtirokchilari uchun ochiq va samimiy muloqot muhiti yaratildi. Unga koʻra, yozuvchi va shoiralar bilan maktabning tajribali pedagoglari maʼnaviy-maʼrifiy tarbiya borasida oʻzaro fikr almashdilar.

Ayniqsa, Robiya Yoʻldoshevaning qadim Qilichboy zaminining tarixi, bu zamindan yetishib chiqqan buyuk tarixiy shaxslar, xususan, xolimbeglik ikkinchi jahon urushi ishtirokchilarining qahramonona hayotlari, xolimbeglik yoshlarning iftixoriga aylangan Armiya generali Madamin Rajabov, Qilichboy arna kanalini bunyod etgan Qilichniyozboy bobo, bu zamindan yetishib chiqqan olimlar, davlat va jamoat arboblari, yozuvchi va shoirlar haqidagi hikoyalari ishtirokchilarda oʻz eldoshlaridan faxrlanish tuygʻularini uygʻotdi.

Shuningdek, davra suhbatida tajribali tarix fani oʻqituvchisi Nasibaxon Matashova, maktabning amaliyotchi-psixologi Dilfuza Sultonova, maktab direktorining maʼnaviy-maʼrifiy ishlar boʻyicha oʻrinbosari Zarifboy Xoʻjaniyozovlar hozirgi zamon oʻzbek adabiyotining yirik namoyandalari, oʻzbek mumtoz adabiyoti vakillarining asarlari va bu asarlarning yoshlar taʼlim-tarbiyasidagi ahamiyati xususida qimmatli fikrlar bildirdilar.

Davra suhbati qizgʻin bahs-munozaralarga ham boy boʻldi. Ijodkor yoshlar oʻzlari oʻqigan asarlar mazmun-mohiyati yuzasidan oʻzaro fikrlashib, kitobxonlikning oʻz hayotlarida tutgan oʻrni haqida toʻlqinlanib soʻzladilar.

Maʼnaviy-maʼrifiy, adabiy suhbatlar qizgʻin mushoiraga ulanib ketdi. Mushoirada oʻqituvchilar ham, ijodkor oʻquvchilar ham faol ishtirok etdilar. 73-sonli maktabning 11-sinf oʻquvchisi Sevinchoy Zaripova oʻzining qiziqarli savollari bilan, amaliyotchi-psixolog Dilfuza Sultonova oʻz ijodidan namunalar oʻqish orqali davra suhbatiga fayz bagʻishladilar.

Shundan soʻng, “Jayxun ilhomlari” NNT aʼzosi, shoira Zuhra Ahmedova davra ishtirokchilariga bayramona kayfiyat bagʻishlovchi Yangi yilni madh etuvchi sheʼrlar oʻqidi.

Tadbir davomida taniqli jurnalist, yozuvchi va shoira Robiya Yoʻldosheva ona Vatan, xalq birdamligi, doʻstlik va tinchlik, istiqlol va yoshlar kuch-qudrati madhidagi sheʼrlaridan oʻqib berdi.

Davra suhbati ishtirokchilari tumanimizda yashab ijod etayotgan taniqli ijodkorlar bilan uchrashuvdan olam-olam zavq oldilar.

Maxsus muxbirimizdan