35-СОНЛИ МАКТАБДА УЧИНЧИ РЕНЕССАНСНИНГ БЎЛҒУСИ БУНЁДКОРЛАРИ ТАЪЛИМ-ТАРБИЯ ОЛИШМОҚДА

Амударё туман мактабгача ва мактаб таълими бўлими тасарруфидаги 35-сонли умумтаълим мактаби туманнинг энг чекка ҳудуди – қардош Туркманистон Республикаси билан чегарадош Холимбег қишлоғидаги таълим-тарбия ишлари яхши йўлга қўйилган намунали ўқув масканларидан бири саналади.

Мазкур мактабга ўқув-тарбия жараёнларини самарали  ташкил этиш борасидаги муаммоларини ҳал қилиш мақсадида 2008 йилда давлат умуммиллий дастури асосида 889 млн. сўм маблағ ҳисобига 315 ўринли янги бино қуриб берилди. Таълим муассасаси қамровидаги аҳоли сонининг ошиб бориши муносабати билан 2021 йилда инвестиция дастури доирасида лойиҳа қиймати, 3 млрд. 957 млн. сўм бўлган 330 ўринли қўшимча бино ҳам қурилиб, фойдаланишга топширилди. Натижада холимбеглик ота-оналар ва уларнинг фарзандлари дилидаги орзулари ушалиб, мактаб замонавий қиёфа касб этди. Шу билан бирга кимё, биология, физика хоналари лаборатория машғулотлари олиб бориш имконини берувчи замонавий мактаб лабораториялари жиҳозлари билан таъминланди.

Айни пайтда 688 нафар ўқувчи-ёшлар таълим-тарбия олаётган мазкур ўқув даргоҳи ҳудуди тўлиқ интернет билан қамраб олинди. Бу эса ўқувчи-ёшларга янада самарали ва сифатли таълим-тарбия бериш имконини яратди.

Аҳил ва ташаббускор 67 нафар педагогика жамоаси фаолият юритаётган муассасада 4 нафар олий, 9 нафар 1- ва 22 нафар 2-тоифага эга, шунингдек, 32 нафар мутахассис билимдон ўқитувчилар ўқувчи-ёшларнинг  фан асосларини пухта ўзлаштиришларини таъминлаш йўлида фидойилик билан меҳнат қилишмоқда. Шу боис, мактаб ўқувчилари таълимда, маънавий-маърифий йўналишлардаги турли кўрик-танловларда, спортда юқори натижаларга эришмоқдалар.

Хусусан, “Маҳаллаларда ёшларни оммавий спортга жалб қилишни янги босқичга олиб чиқиш чора-тадбирлари тўғрисида”ги 2022 йил 11 апрелда эълон қилинган Президент Қарорига мувофиқ ташкил этилган “Беш ташаббус олимпиадаси” мусобақаларида спортнинг енгил атлетика тури бўйича мактабнинг қизлар жамоаси Ўзбекистонда 1-ўринни эгаллашди. Эришилган бу ютуқ эвазига Президентнинг юқоридаги Қарори, 5-бандида кўрсатилган “Беш ташаббус олимпиадаси” доирасидаги мусобақаларда ғолиб бўлган, ҳудудида спорт инфратузилмаси мавжуд бўлмаган мактаб терма жамоалари учун стритбол, воркаут ва универсал спорт майдончаларини қуриш кўзда тутилгани боис, 2023 йилда 35-сонли мактабга универсал спорт майдончаси қуриб берилди.

Ўтган 2022-2023 ўқув йили 35-сонли мактаб ўқитувчи ва ўқувчи-ёшлари учун қувончли муваффақиятлар йили бўлди. Мактабнинг  11-синф ўқувчиси Барно Самандарова Президент Қарорига кўра, Зулфия номидаги Давлат мукофоти билан тақдирланди, спортнинг минифутбол тури бўйича қизлар жамоаси Қорақалпоғистонда 1-ўринни эгаллашди, ўқувчиларнинг ОТМга ўқишга қабул қилиниш даражаси ошди. 2023-2024 ўқув йилини янада эзгу орзулар билан бошлаган ўқувчи-ёшлар фанлар олимпиадасининг туман ва республика босқичларида ҳам муваффақиятли иштирок этишди. Хусусан, 10-синф ўқувчиси Лобар Зиёдбоева кимё фанидан, 11-синф ўқувчиси Шаҳриёр Каримбоев география фанидан ғолибликни қўлга киритишди. Мактабнинг ўғил болалар футбол жамоаси умумтаълим мактаблари ўқувчилари ўртасида ўтказилган мусобақаларда  1-2-ўринларни эгаллашди.

Эришилаётган ютуқларда инглиз тили фани ўқитувчиси Севара Жуманиёзова, она тили ва адабиёт фани ўқитувчилари  Мафтуна Ўрозбоева, Сайёра Розумовалар, жисмоний тарбия фани ўқитувчиси Шавкат Саидмуродовларнинг муносиб ҳиссалари бор.

Мактабгача ва мактаб таълими вазирлигининг “Умумий ўрта таълим муассасалари ўқувчиларини иккинчи  хорижий тил ва битта касб-ҳунарга ўргатиш амалиётини йўлга қўйишнинг қўшимча чора-тадбирлари тўғрисида”ги буйруғига кўра, мактабда инглиз тилидан ташқари, иккинчи хорижий тил – немис тилини ўргатиш бўйича 7-синфларда машғулотлар бошлаб юборилди. Шунингдек, қиз болаларга чеварлик, ўғил болаларга дурадгорлик ҳунарларини ўргатиш  йўлга қўйилди.

Мактаб педагогика жамоасининг мақсади эса битта – ўсиб келаётган ёш авлодни замон талаблари даражасидаги билим билан қуроллантириш. Чунки ана шундай талаблар даражасидаги билимга эга ёшларгина Учинчи Ренессансни бунёд этадилар.

Робия ЙЎЛДОШЕВА.