35-SONLI MAKTABDA UChINChI RENESSANSNING BOʻLGʻUSI BUNYoDKORLARI TAʼLIM-TARBIYa OLIShMOQDA

Amudaryo tuman maktabgacha va maktab taʼlimi boʻlimi tasarrufidagi 35-sonli umumtaʼlim maktabi tumanning eng chekka hududi – qardosh Turkmaniston Respublikasi bilan chegaradosh Xolimbeg qishlogʻidagi taʼlim-tarbiya ishlari yaxshi yoʻlga qoʻyilgan namunali oʻquv maskanlaridan biri sanaladi.

Mazkur maktabga oʻquv-tarbiya jarayonlarini samarali  tashkil etish borasidagi muammolarini hal qilish maqsadida 2008-yilda davlat umummilliy dasturi asosida 889 mln. soʻm mablagʻ hisobiga 315-oʻrinli yangi bino qurib berildi. Taʼlim muassasasi qamrovidagi aholi sonining oshib borishi munosabati bilan 2021-yilda investitsiya dasturi doirasida loyiha qiymati, 3 mlrd. 957 mln. soʻm boʻlgan 330-oʻrinli qoʻshimcha bino ham qurilib, foydalanishga topshirildi. Natijada xolimbeglik ota-onalar va ularning farzandlari dilidagi orzulari ushalib, maktab zamonaviy qiyofa kasb etdi. Shu bilan birga kimyo, biologiya, fizika xonalari laboratoriya mashgʻulotlari olib borish imkonini beruvchi zamonaviy maktab laboratoriyalari jihozlari bilan taʼminlandi.

Ayni paytda 688 nafar oʻquvchi-yoshlar taʼlim-tarbiya olayotgan mazkur oʻquv dargohi hududi toʻliq internet bilan qamrab olindi. Bu esa oʻquvchi-yoshlarga yanada samarali va sifatli taʼlim-tarbiya berish imkonini yaratdi.

Ahil va tashabbuskor 67 nafar pedagogika jamoasi faoliyat yuritayotgan muassasada 4 nafar oliy, 9 nafar 1- va 22 nafar 2-toifaga ega, shuningdek, 32 nafar mutaxassis bilimdon oʻqituvchilar oʻquvchi-yoshlarning  fan asoslarini puxta oʻzlashtirishlarini taʼminlash yoʻlida fidoyilik bilan mehnat qilishmoqda. Shu bois, maktab oʻquvchilari taʼlimda, maʼnaviy-maʼrifiy yoʻnalishlardagi turli koʻrik-tanlovlarda, sportda yuqori natijalarga erishmoqdalar.

Xususan, “Mahallalarda yoshlarni ommaviy sportga jalb qilishni yangi bosqichga olib chiqish chora-tadbirlari toʻgʻrisida”gi 2022-yil 11-aprelda eʼlon qilingan Prezident Qaroriga muvofiq tashkil etilgan “Besh tashabbus olimpiadasi” musobaqalarida sportning yengil atletika turi boʻyicha maktabning qizlar jamoasi Oʻzbekistonda 1-oʻrinni egallashdi. Erishilgan bu yutuq evaziga Prezidentning yuqoridagi Qarori, 5-bandida koʻrsatilgan “Besh tashabbus olimpiadasi” doirasidagi musobaqalarda gʻolib boʻlgan, hududida sport infratuzilmasi mavjud boʻlmagan maktab terma jamoalari uchun stritbol, vorkaut va universal sport maydonchalarini qurish koʻzda tutilgani bois, 2023-yilda 35-sonli maktabga universal sport maydonchasi qurib berildi.

Oʻtgan 2022-2023 oʻquv yili 35-sonli maktab oʻqituvchi va oʻquvchi-yoshlari uchun quvonchli muvaffaqiyatlar yili boʻldi. Maktabning  11-sinf oʻquvchisi Barno Samandarova Prezident Qaroriga koʻra, Zulfiya nomidagi Davlat mukofoti bilan taqdirlandi, sportning minifutbol turi boʻyicha qizlar jamoasi Qoraqalpogʻistonda 1-oʻrinni egallashdi, oʻquvchilarning OTMga oʻqishga qabul qilinish darajasi oshdi. 2023-2024 oʻquv yilini yanada ezgu orzular bilan boshlagan oʻquvchi-yoshlar fanlar olimpiadasining tuman va respublika bosqichlarida ham muvaffaqiyatli ishtirok etishdi. Xususan, 10-sinf oʻquvchisi Lobar Ziyodboyeva kimyo fanidan, 11-sinf oʻquvchisi Shahriyor Karimboyev geografiya fanidan gʻoliblikni qoʻlga kiritishdi. Maktabning oʻgʻil bolalar futbol jamoasi umumtaʼlim maktablari oʻquvchilari oʻrtasida oʻtkazilgan musobaqalarda  1-2-oʻrinlarni egallashdi.

Erishilayotgan yutuqlarda ingliz tili fani oʻqituvchisi Sevara Jumaniyozova, ona tili va adabiyot fani oʻqituvchilari  Maftuna Oʻrozboyeva, Sayyora Rozumovalar, jismoniy tarbiya fani oʻqituvchisi Shavkat Saidmurodovlarning munosib hissalari bor.

Maktabgacha va maktab taʼlimi vazirligining “Umumiy oʻrta taʼlim muassasalari oʻquvchilarini ikkinchi  xorijiy til va bitta kasb-hunarga oʻrgatish amaliyotini yoʻlga qoʻyishning qoʻshimcha chora-tadbirlari toʻgʻrisida”gi buyrugʻiga koʻra, maktabda ingliz tilidan tashqari, ikkinchi xorijiy til – nemis tilini oʻrgatish boʻyicha 7-sinflarda mashgʻulotlar boshlab yuborildi. Shuningdek, qiz bolalarga chevarlik, oʻgʻil bolalarga duradgorlik hunarlarini oʻrgatish  yoʻlga qoʻyildi.

Maktab pedagogika jamoasining maqsadi esa bitta – oʻsib kelayotgan yosh avlodni zamon talablari darajasidagi bilim bilan qurollantirish. Chunki ana shunday talablar darajasidagi bilimga ega yoshlargina Uchinchi Renessansni bunyod etadilar.

Robiya YOʻLDOShEVA.