АМУДАРЁЛИК 13 ЁШЛИ ЎҚУВЧИ ЧЕТ ТИЛИНИ БИЛИШ ДАРАЖАСИ БЎЙИЧА В2 СЕРТИФИКАТИНИ ҚЎЛГА КИРИТДИ
Замон шиддат билан ривожланаётган, кун сайин тараққиёт сари илгарилаётган айни даврда хорижий тилларни мукаммал билиш жуда катта аҳамият касб этади. Давр билан ҳамнафас бўлиш учун эса ёшларимиз билим олиш билан бирга чет тилларини ҳам ўрганишлари ва шунга ҳаракат қилишлари керак. Шунга кўра юртимизда ёш авлоднинг мукаммал билим олишлари, илмда юқори чўққиларни забт этишлари учун етарли шароит ва имконият яратишга алоҳида эътибор қаратилмоқда. Бундай имкониятлардан унумли фойдаланаётган ва муносиб ютуқларни қўлга киритаётган билимдон ёшлар Амударё туманида ҳам кўпчиликни ташкил қилади.
Тумандаги Ихтисослаштирилган мактабнинг 7-синфида таълим-тарбия олаётган Аслбек Тўлибоев келажакка муносиб авлод бўлиб камолга етишга интилаётган ана шундай ёшлардан бири. Яқинда у ўз билимини синаб кўриш мақсадида Ўзбекистон Республикаси Олий таълим, фан ва инновациялар вазирлиги ҳузуридаги билим ва малакаларни баҳолаш агентлиги томонидан ўтказиладиган имтиҳонларда иштирок этди ҳамда энди 13 ёшга кирган бўлишига қарамасдан, чет тилини билиш даражаси бўйича В2 сертификатини қўлга киритишга эришди.
Аслбек Тўлибоев 2010 йил 11 декабрда зиёли оилада дунёга келган. Унинг отаси Мансур Аллаяров Нукус Давлат Аграр Университетини тамомлаган. Ҳозирги кунда чет элда. Онаси Дилнура Бобониёзова эса Нукус Давлат Педагогика институтини тамомлаган бўлиб, ҳозирги кунда 36-сонли мактабда инглиз тили фанидан дарс бериб келмоқда.
Аслбек 3 ёшидан Манғит шаҳридаги 3-сонли Мактабгача таълим ташкилотида тарбиялана бошлади. Инглиз тилидан МТТдаги машғулотлар давомида кўникмаларини ривожлантирди. Ота-онаси ҳам фарзандининг чуқур билим олишига етарли аҳамият беришга, шароит яратишга ҳаракат қилишди. Бу, албатта, ўзининг ижобий самарасини берди ва кичик билимдон мактабгача тарбия давриданоқ иқтидорлилиги билан тенгдошларига намуна бўла бошлади. У 2017 йилдан 36-сонли мактабнинг 1-синфида ўқий бошлади. Биринчи устози Алишер Йўлдошевдан алифбени ўқишни, сон-саноқларни ва бошқа кўплаб бошланғич билимларни жуда қизиқиб ўрганди. Билими яхши бўлгани сабабли 5-синфни тамомлаб, тумандаги Ихтисослашган мактабга тест топширди ва юқори балл билан мактаб ўқувчилари сафидан ўрин олди. Ҳозирги кунда шу мактабда 7-синфда таълим олмоқда.
Отабек Йўлдошев раҳбарлик қилаётган мазкур мактабда таълим-тарбия ишлари яхши йўлга қўйилгани ўқувчиларнинг ютуқларида намомён бўлмоқда. Аслбекнинг синф раҳбари Гуласал Ёдгорова ҳам ундаги математикага бўлган қизиқишни кўриб, математика фанидан Ал Хоразмий олимпиадасида қатнашишига имконият яратди. У олимпиадада юқори баллни қўлга киритди ва Республикада 7-ўринни эгаллаб, кучли 10 таликка кирди. Ҳозирги кунда устозлари билан келгуси босқичга қаттиқ тайёргарликлар кўрмоқда. Шахмат, шашка ўйинларига, китобхонликка қизиқадиган Аслбек бўш вақтларида дона суриш ёки китоб ўқиш билан банд бўлади.
Мактабнинг инглиз тили фан ўқитувчиси Муҳайё Тоирова ҳам унинг тил ўрганишга бўлган қизиқишини кўриб, янда кўпроқ ўргатишга ҳаракат қилади. Аслбек ушбу тилни янада мукаммалроқ ўрганиш мақсадида “BRIGHTON SCHOOL” ўқув марказида қўшимча машғулотларда қатнашди. Ўқув марказдаги устози Нурбек Жуманиёзовдан грамматикани ўрганди. Кейинчалик “ADVANCE” ўқув марказида Асадбек Юсуповнинг тўгаракларига қатнашди ва ўз билимларини синаб кўриш мақсадида имтиҳонларда қатнашиб, чет тилини билиш даражаси бўйича B2 сертификатини қўлга киритди.
Ёш билимдон Аслбекнинг таълим олиш билан боғлиқ режалари кўп. У катта бўлгач, хориждаги нуфузли олийгоҳларда таълим олиб, етук, ҳар томонлама билимли, келажак бунёдкори бўлишни мақсад қилмоқда. Айни пайтда келгусида IELTS сертификатига эга бўлиш учун инглиз тилини янада мукаммал ўрганишни давом эттирмоқда.
Биз ҳам иқтидорли ўқувчи Аслбек Тўлибоевга келгуси ўқиш ва ишларида омад ва муаваффақият тилаб қоламиз!
Озода Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
