AMUDARYoLIK 13 YoShLI OʻQUVChI ChET TILINI BILISh DARAJASI BOʻYIChA V2 SERTIFIKATINI QOʻLGA KIRITDI

Zamon shiddat bilan rivojlanayotgan, kun sayin taraqqiyot sari ilgarilayotgan ayni davrda xorijiy tillarni mukammal bilish juda katta ahamiyat kasb etadi. Davr bilan hamnafas boʻlish uchun esa yoshlarimiz bilim olish bilan birga chet tillarini ham oʻrganishlari va shunga harakat qilishlari kerak. Shunga koʻra yurtimizda yosh avlodning mukammal bilim olishlari, ilmda yuqori choʻqqilarni zabt etishlari uchun yetarli sharoit va imkoniyat yaratishga alohida eʼtibor qaratilmoqda. Bunday imkoniyatlardan unumli foydalanayotgan va munosib yutuqlarni qoʻlga kiritayotgan bilimdon yoshlar Amudaryo tumanida ham koʻpchilikni tashkil qiladi.

Tumandagi Ixtisoslashtirilgan maktabning 7-sinfida taʼlim-tarbiya olayotgan Aslbek Toʻliboyev kelajakka munosib avlod boʻlib kamolga yetishga intilayotgan ana shunday yoshlardan biri. Yaqinda u oʻz bilimini sinab koʻrish maqsadida Oʻzbekiston Respublikasi Oliy taʼlim, fan va innovatsiyalar vazirligi huzuridagi bilim va malakalarni baholash agentligi tomonidan oʻtkaziladigan imtihonlarda ishtirok etdi hamda endi 13 yoshga kirgan boʻlishiga qaramasdan, chet tilini bilish darajasi boʻyicha V2 sertifikatini qoʻlga kiritishga erishdi.

Aslbek Toʻliboyev 2010-yil 11-dekabrda ziyoli oilada dunyoga kelgan. Uning otasi Mansur Allayarov Nukus Davlat Agrar Universitetini tamomlagan. Hozirgi kunda chet elda. Onasi Dilnura Boboniyozova esa Nukus Davlat Pedagogika institutini tamomlagan boʻlib, hozirgi kunda 36-sonli maktabda ingliz tili fanidan dars berib kelmoqda.

Aslbek 3 yoshidan Mangʻit shahridagi 3-sonli Maktabgacha taʼlim tashkilotida tarbiyalana boshladi. Ingliz tilidan MTTdagi mashgʻulotlar davomida koʻnikmalarini rivojlantirdi. Ota-onasi ham farzandining chuqur bilim olishiga yetarli ahamiyat berishga, sharoit yaratishga harakat qilishdi. Bu, albatta, oʻzining ijobiy samarasini berdi va kichik bilimdon maktabgacha tarbiya davridanoq iqtidorliligi bilan tengdoshlariga namuna boʻla boshladi. U 2017-yildan 36-sonli maktabning 1-sinfida oʻqiy boshladi. Birinchi ustozi Alisher Yoʻldoshevdan alifbeni oʻqishni, son-sanoqlarni va boshqa koʻplab boshlangʻich bilimlarni juda qiziqib oʻrgandi. Bilimi yaxshi boʻlgani sababli 5-sinfni tamomlab, tumandagi Ixtisoslashgan maktabga test topshirdi va yuqori ball bilan maktab oʻquvchilari safidan oʻrin oldi. Hozirgi kunda shu maktabda 7-sinfda taʼlim olmoqda.

Otabek Yoʻldoshev rahbarlik qilayotgan mazkur maktabda taʼlim-tarbiya ishlari yaxshi yoʻlga qoʻyilgani oʻquvchilarning yutuqlarida namomyon boʻlmoqda. Aslbekning sinf rahbari Gulasal Yodgorova ham undagi matematikaga boʻlgan qiziqishni koʻrib,  matematika fanidan Al Xorazmiy olimpiadasida qatnashishiga imkoniyat yaratdi. U olimpiadada yuqori ballni qoʻlga kiritdi va Respublikada 7-oʻrinni egallab, kuchli 10 talikka kirdi. Hozirgi kunda ustozlari bilan kelgusi bosqichga qattiq tayyorgarliklar koʻrmoqda. Shaxmat, shashka oʻyinlariga, kitobxonlikka qiziqadigan Aslbek boʻsh vaqtlarida dona surish yoki kitob oʻqish bilan band boʻladi.

Maktabning ingliz tili fan oʻqituvchisi Muhayyo Toirova ham uning til oʻrganishga boʻlgan qiziqishini koʻrib, yanda koʻproq oʻrgatishga harakat qiladi. Aslbek ushbu tilni yanada mukammalroq oʻrganish maqsadida “BRIGHTON SCHOOL” oʻquv markazida qoʻshimcha mashgʻulotlarda qatnashdi. Oʻquv markazdagi ustozi Nurbek Jumaniyozovdan grammatikani oʻrgandi. Keyinchalik “ADVANCE” oʻquv markazida Asadbek Yusupovning toʻgaraklariga qatnashdi va oʻz bilimlarini sinab koʻrish maqsadida imtihonlarda qatnashib, chet tilini bilish darajasi boʻyicha B2 sertifikatini qoʻlga kiritdi.

Yosh bilimdon Aslbekning taʼlim olish bilan bogʻliq rejalari koʻp. U katta boʻlgach, xorijdagi nufuzli oliygohlarda taʼlim olib, yetuk, har tomonlama bilimli, kelajak bunyodkori boʻlishni maqsad qilmoqda. Ayni paytda kelgusida IELTS sertifikatiga ega boʻlish uchun ingliz tilini yanada mukammal oʻrganishni davom ettirmoqda.

Biz ham iqtidorli oʻquvchi Aslbek Toʻliboyevga kelgusi oʻqish va ishlarida omad va muavaffaqiyat tilab qolamiz!

Ozoda Xudoyberganova.