АМУДАРЁ ТУМАНИ СПОРТ МАКТАБИДА “СОҒЛОМ ОИЛА – ЯНГИ ЎЗБЕКИСТОН ТАЯНЧИ” ШИОРИ ОСТИДА АЁЛЛАР ЎРТАСИДА ВОЛЕЙБОЛ МУСОБАҚАЛАРИ ЎТКАЗИЛДИ

Оилаларда маънавий муҳит барқарорлигини таъминлашда аёлларнинг ўрни алоҳида. Аёл соғлом бўлган оилада тинчлик-хотиржамлик, бахт-саодат ҳамда барака бўлади. Шу боис ҳам аёллар саломатлигини сақлаш, уларни спортга жалб қилиш борасида қатор амалий ишлар қилинмоқда. Чунки аёлнинг бирор бир спорт тури билан шуғулланиши, энг аввало оилада соғлом, ҳар томонлама етук инсонлар камол топиши учун шароит яратади. Мамлакатимизда деярли ҳар йили “Ота-онам ва мен – спортчи”, “Саломатлик учун 5000 қадам”, “Гимнатстрада – оиламиз учун қувонч бағишлайди” мавзуларидаги оилавий спортни ривожлантиришга қаратилган тадбирлар шу боисдан ҳам тобора кенг қамров касб этмоқда.

Амударё туманида “Ёшлар ва бизнесни қўллаб-қувватлаш йили” муносабати билан “Соғлом оила – Янги Ўзбекистон таянчи” шиори остида ўтказилаётган спорт-соғломлаштириш тадбирларида турли меҳнат жамоаларида фаолият юритаётган аёллар ҳамда туманнинг энг чекка ҳудудларидаги ишсиз, уюшмаган хотин-қизлар ҳам фаол иштирок этишмоқда. Шуниси эътиборлики, ўтказилаётган спорт-соғломлаштириш тадбирлари ва спортнинг турли йўналишларидаги мусобақалар иштирокчиларга кўтаринки кайфият, жўшқинлик бахш этмоқда.

Жорий йилнинг 23-24 февраль саналарида Амударё Болалар ва ўсмирлар спорт мактабининг спорт майдонида бўлиб ўтган волейбол мусобақалари ҳам “Ёшлар ва бизнесни қўллаб-қувватлаш йили”га бағишланди ва мазкур мусобақада тумандаги турли меҳнат жамоаларида фаолият юритаётган хотин-қизлардан иборат 12та жамоа иштирок этди.

“Соғлом оила – Янги Ўзбекистон таянчи” шиори остида бўлиб ўтган мусобақалар ниҳоятда қизғин баҳсларга бой, қизиқарли тарзда ўтказилди. Икки кун давом этган қизғин беллашувлар ҳалоллик ва шаффофлик асосида амалга оширилиши учун мусобақа ташкилотчилари томонидан иштирокчи жамоалар аъзолари мусобақа шартлари билан олдиндан таништирилди. Унга кўра кишлоқ ва маҳаллаларда энг яхши, чаққон ва эпчил хотин-қизлардан иборат жамоалар шакллантирилиб, мусобақага олдиндан пухта ҳозирлик кўрилди.

Волейбол спортидаги асосий қоидалар, волейбол майдончасида ўйинчиларнинг жойлашиш тартиби, бир жамоа билан иккинчи жамоа аъзолари ўртасида ўзаро эътибор ва ҳурмат тушунчалари хусусида зарур маълумот ва тавсиялар берилди. Натижада мусобақалар шаффофлик асосида, дўстона вазиятда ўтди.

Икки кун давом этган қизиқарли баҳслар натижаларига кўра, Амударё спорт мактабининг аёллар жамоаси фахрли 1-ўринни эгалладилар. Иккинчи ўрин эса 63-сонли умумтаълим мактабининг педагог аёллар жамоасига насиб этди. Учинчи ўрин учун даъвогарлар кўп бўлди. Ҳалоллик ва шаффофлик тамойилига кўра, жамоаларнинг волейбол спорти қоидаларига мувофиқ кўрсатган қизиқарли ўйинлари, спортчи маданиятини сақлаш бўйича ҳатти-ҳаракатлари эътиборга олиниб, намунали жамоа сифатида 19-сонли умумтаълим мактаби ходимларидан иборат хотин-қизлар жамоаси учинчи ўринга лойиқ кўрилди.

Жамиятимизда соғлом маънавий муҳитни шакллантириш, соғлом оилалар сафини янада ошириш, ҳар томонлама етук ва баркамол инсонни тарбиялаб, вояга етказишга қаратилган мазкур тадбир иштирокчиларда ўзаро дўстлик, ватанпарварлик ва оилапарварлик туйғуларини янада мустаҳкамлаб, жисмоний фаолликка ундагани билан муҳим аҳамият касб этди.

Робия ЙЎЛДОШЕВА.