“БАЛЛИ, ҚИЗЛАР” КЎРИК-ТАНЛОВИДА 22-СОНЛИ МТТНИНГ ЖАЖЖИ ҚИЗАЛОҚЛАРИ ЎЗ ИҚТИДОРЛАРИНИ КЎРСАТИШДИ

Баҳор келиши билан турли тантаналар, тадбирлар бошланади ва ҳар бир кун байрамга айланади. Она диёр узра кўклам насимлари эсиб турган кунларда байрамлар байрамларга уланади ва эл-юрт шодиёналарга бурканади. Амударё туманида ҳам барча овул ва маҳаллаларда, муассаса ва ташкилотларда бири-биридан файзли, чиройли байрам тадбирлари давом этмоқда.

7 март куни Қиличбой овулидаги 22-сонли мактабгача таълим ташкилотида ҳам гўзаллик ва нафосат байрами бўлган 8 март – Халқаро хотин-қизлар куни муносабати билан тарбияланувчилар ўртасида “Балли, қизлар!” кўрик-танлови ташкил этилди. Ушбу тадбирга тарбияланувчиларнинг ота-оналари, ҳудуд фуқаролар йиғини масъуллари ва бошқа меҳмонлар ташриф буюришди. Тадбирни ташкилот раҳбари Нилуфар Юсупова очиб берди ва оналарни, ташкилот ходималари, тарбияланаётган жажжи қизалоқларни байрам билан табриклади.

Байрам билан табриклаб сўзга чиққанлар ушбу мактабгача таълим ташкилотида таълим-тарбия сифатини ошириш мақсадида муҳим чора-тадбирлар йўлга қўйилганини таъкидлаб ўтишди. Ташкилот биноси 1975-80 йилларда 80 ўринга мўлжаллаб қурилгани, сўнгги даврларда аҳоли сони ортиб бораётгани туфайли 120 нафар кичкинтойларга тарбия берилаётгани сабабли қўшимча бинога эҳтиёж сезилгани, шунга кўра 2018 йилда “Обод қишлоқ” дастури доирасида 60 ўринга мўлжалланган қўшимча бино қурилиб, эски биноси ҳам қайта таъмирланганини тилга олишди.

Шундан сўнг, тадбирнинг асосий қисми бошланди ва танлов иштирокчилари бўлган жажжи қизалоқлар таништирилди. Танловда ташкилот тарбияланувчилари бўлган Дилобар Адамбоева, Осиё Мамаражабова, Мафтунахон Шавкатова, Мунисахон Шерифбоева, Рухшонахон Ўролова, Бонухон Маҳмудовалар 4 шарт бўйича ўз иқтидорларини намойиш этилди.

Қизалоқлар биринчи шартга кўра ўзларини шеърий усуллар билан таништиришди. Ҳакамлар ушбу шартни баҳолагунга қадар гуруҳ қизлари иштирокидаги “Томчи” қўшиғига рақс ижро этиб, томошабинларга хушкайфият улашилди. “Зукколар ва донолар” деб номланган иккинчи шарт давомида қизалоқлар берилган саволларга тўғри ва аниқ жавоб беришди.

Шарт оралиғида болажонлар оналарни мадҳ этувчи шеърлани ифодали ёд айтиб беришди. “Мен кичик пазанда” деб номланган учинчи шартга кўра эса қизалоқлар оналарига ёрдамчи эканлигини кўрсатиб, чиройли сомсалар тугишди. Ҳакамлар барча шартларни баҳолангунга қадар болажонлар ижросида яна шеърлар, “Ўзбек дўпписи” номли қўшиқ ва рақслар намойиш этилди.

Энг сўнгги “Эркин мавзу” деб номланган шарт бўйича иштирокчи қизалоқлар биргаликда “Она қизим” қўшиғига гуруҳ рақс ижро этиб, томошабинларга завқ улашишди. Латофатли, эпчил, чаққон, зукко, саранжому-саришта ва катталарга кўмакчи бўлиб улғаяётган қизалоқларнинг чиқишлари барчага жуда манзур бўлди.

Болажонларни эркин фикрлашга, гўзалликни ҳис қилиш, ўзларини эркин тутиш кабиларга ўргатиш ва уларни рағбатлантириш мақсадида ўтказилган “Балли, қизлар кўрик-танлови якунида ҳакамлар ҳайъати қарорига кўра, барча иштирокчи қизларга номинациялар бўйича ғолиблик берилди. “Жажжи гўзал”, “Энг зукко қиз”, “Энг оқила қиз”, “Энг иболи қиз”, “Энг малоҳатли қиз” ва “Энг билимдон қиз” номинациялари бўйича ғолиб бўлган қизалоқларга фахрий ёрлиқ ва совғалар топширилди.

Байрам муносабати билан 22-сонли мактабгача таълим ташкилотида бўлиб ўтган “Балли, қизлар” кўрик-танлови ҳаммада катта таассурот қолдирди ва байрамона кайфият улашди.

О.Худойберганова.