Масъулиятли, ижодкор ёш тарбиячи
Тарбиячилик касби келажак авлодни ҳар томонлама етук, баркамол бўлиб етишишида жуда катта аҳамиятга эга бўлган касб ҳисобланади. Фарзандларимиз қалбида Ватанга бўлган меҳрни уйғотишда, уларнинг қобилият ва ўзига хос фазилатларини юзага чиқаришда, иқтидорларини намоён этишда тарбиячиларнинг, уларда дастлабки билим ва кўникмаларни шакллантиришдаги ўрни ва аҳамияти беқиёсдир.
Ўз касбига, болажонларга меҳри-муҳаббати юқори бўлган ҳамда тарбиячиликнинг юқори масъулиятга эга бўлган касб эканлиги чуқур англаб етган, ёш бўлишига қарамай, доим ўз устида ишлаб, шижоат ва ғайрат билан меҳнат қилаётган Нафиса Собирова туманимизда таълим-тарбия соҳасига муносиб ҳисса қўшиб келаётган тарбиячилардан бири саналади.
22 ёшли ижодкор, иқтидорли тарбиячи Нафиса Собирова туманимиздаги “Зебо” давлат хусусий шерикчилик асосидаги мактабгача таълим ташкилотида болажонларда дастлабки билим ва кўникмаларни шакллантириб, уларга таълим-тарбия бериб келмоқда.
Туманимиздаги Бўстон маҳалласи яшовчи Нафиса Собирова оиласида кенжа фарзанд. Отаси Рустам Ибрагимов 2019 йилда оғир ҳасталик туфайли оламдан ўтган. Онаси Насиба Жуматова туман Бандликка кўмаклашиш ва аҳолини ижтимоий муҳофаза қилиш марказида ижтимоий ходим бўлиб фаолият юритиб келмоқда. Оиланинг тўнғич фарзанди, акаси Темур Собиров туман Спорт мактабида мураббий бўлиб болажонларга спорт сирларини ўргатиб келмоқда.
Нафиса Собирова 38-сонли умумтаълим мактабида 2008-2019 йиллар мобайнида таҳсил олган. 2020-2022 йилларда Тахиатош туманида жойлашган Педогогика коллежида мактабгача таълим йўналишида ўқиди ҳамда мактабгача таълим ташкилоти тарбиячиси мутахассислиги сифатида ўрта профессионал диплом соҳиби бўлди. 2023 йилда ўзининг тарбиячилик фаолиятини “Зебо” МТТда давом эттирган Нафиса Собирова тарбия масканидаги энг фаол, масъулиятли, ижодкор ходимлардан бири ҳисобланади.
Айни пайтда ташкилотда Нафиса фаолият олиб бораётган ўрта гуруҳда тарбияланувчи 3-4 ёшлар орасидаги болажонлар сони 30 нафар бўлиб, гуруҳда Мардона Йўлдашева ёрдамчи тарбиячи сифатида ишлаб келмоқда.
Нафиса Собирова болажонларга турли қизиқарли ўйинлар асосида ҳар хил машғулотларни ташкил этиб келмоқда. Хусусан, “Беш бурчак” методи асосида ҳамда “Илк қадам” дастури доирасидаги қизиқарли ва фойдали методлар асосида ҳамда ўз устида ишлаш орқали интернет материалларидан фойдаланган ҳолда янги ўйин машғулотларини олиб боради.
Нафиса таълим-тарбия бераётган гуруҳдаги тарбияланувчи болажонлар рангларни, шаклларни осон ажрата олади. Уй ҳайвонлари, сабзавотлар номларини айта оладилар ҳамда 1 дан 20 гача бўлган сонларни бемалол санай олишади. Шунингдек, гуруҳ тарбиянувчилари туман миқёсида ўтказиладиган байрам тадбирларида фаол иштирок этиб келмоқдалар.
Нафисанинг келажакдаги орзу-мақсадлари талайгина. У бу йил олий ўқув юрти талабаси бўлишга астойдил ҳаракат қилмоқда. Келажакда тарбиячилик касбининг етук мутахассиси бўлиш ҳамда ўзининг хусусий боқчасини ташкил этиб, талим-тарбия соҳасида самарали ишларни амалга оширишни мақсад қилган.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
