Ўзбекистон Республикаси Соғликни сақлаш вазири ўринбосари иштирокида семинар ўтказилди
17 апрель куни Амударё туман тиббиёт бирлашмаси мажлислар залида Ўзбекистон Республикаси Соғликни сақлаш вазири ўринбосари Фаррух Шарипов, Қорақалпоғистон Республикаси Соғликни сақлаш вазири Мурод Қурбановлар иштирокида тиббиёт ходимлари ва соҳа маъсуллари учун семинар ўтказилди.
Маълумки, Ўзбекистон Республикаси Соғликни сақлаш вазирининг 2023 йил 13 октябрдаги буйруғи билан Ўзбекистон Республикаси давлат бюджети маблағлари ҳисобидан қопланадиган, туман даражасида амбулатор ва стационар шароитда кўрсатиладиган тиббий ёрдамнинг кафолатланган ҳажмлари рўйхати тасдиқланган эди. Шунингдек, вазирнинг 2024 йил 23 январдаги буйруғига мувофиқ 2024 йилда Тошкент шаҳри ва Қорақалпоғистон Республикасида, 2025-2026 йилларда босқичма-босқич қолган ҳудудларда давлат тиббий суғурта механизмлари жорий этилиши ҳамда молиялаштиришнинг янги моделига ўтилиши муносабати билан тегишли чора-тадбирлар белгиланган эди.
Семинарда тиббиёт соҳаси масъулларига ушбу буйруқларнинг мазмун-моҳияти ва уларда топширилган вазифаларнинг ижро механизмлари ҳақида батафсил тушунчалар берилди.
Ўзбекистон Республикаси Соғликни сақлаш вазирининг ўринбосари Фаррух Шарипов семинар иштирокчиларига давлат бюджети маблағлари ҳисобидан копланадиган, туман даражасида амбулатор ва стационар шароитда кўрсатиладиган тиббий ёрдамнинг кафолатланган хажмлари рўйхати ҳақида, давлат тиббий суғурта механизмларини жорий этиш ҳамда молиялаштиришнинг янги моделига ўтилиши жараёнига тайёргарлик кўриш, бу борада тиббиёт ходимлари томонидан қилиниши лозим бўлган функционал вазифалар, аҳоли ўртасида ўтказиладиган тушунтириш-тарғибот ишларининг аҳамияти ҳақида тўхталди.
Вазир ўринбосари тумандаги марказий шифохона, кўп тармоқли марказий поликлиника, оилавий поликлиникалар, оилавий шифокорлик пунктларида аҳолини тиббий бригадаларга бириктириш ва хавф гуруҳларига ажратиш, шифокор олди кўриги хонасида амалиётчи ҳамшира қабулини ташкил қилиш борасида тавсиялар берди. Шунингдек, семинар иштирокчилари билан кафолатланган тиббий ёрдам ҳажмлари, дори воситалари пакети, диагностика учун ажратиладиган реактив ва сарфлов материаллари, электрон тиббий карта, электрон навбатга ёзилиш тартиби, оилавий шифокор йўлланмаси асосида кўрсатиладиган бепул тиббий ёрдам турлари, тиббий хизматлар учун норасмий тўловларни бартараф этиш йўллари борасида фикр алмашилди.
Туман тиббиёт бирлашмаси масъуллари ва тиббиёт ходимларига давлат тиббий суғурта тизимини жорий этиш бўйича аҳолини бирламчи тиббий-санитария ёрдами муассасаларига бириктириш тартиби, оилавий шифокор томонидан беморга кафолатланган пакет доирасида тиббий ёрдам олиши учун бериладиган йўлланма шакли, шифохонадан ёки руҳий касалликлар шифохонасидан чиқарилганларнинг статистик картаси шакли, оилавий поликлиникалар, оилавий шифокорлик пунктлари ва аҳоли бириктирилган кўп тармоқли марказий поликлиникаларни молиялаштириш ҳажмини шакллантириш мақсадида қўлланиладиган ҳамда ушбу муассасаларга бириктирилган аҳоли ёши ва жинси коэффициентлари ҳақида батафсил тушунчалар берилди.
Семинардан кейин масъуллар туманнинг “Бердах”, “Қангли” оилавий шифокорлик пунктларида бўлиб, ушбу тиббиёт муассасаларида давлат тиббий суғуртаси механизларини амалга оширишга кўрилаётган тайёргарлик ишлари билан яқиндан танишдилар ва масъулларга керакли тавсия ҳамда маслаҳатлар бердилар.
Ж.Явқашев, туман тиббиёт бирлашмасининг ташкилий-услубий бўлими мудири
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
