СОҒЛОМ ҲАЁТ СОҒЛОМ МУҲИТДА ШАКЛЛАНАДИ

Юртимиз маҳаллаларида ижтимоий-маънавий муҳит барқарорлигини таъминлаш, оилаларнинг ўзаро аҳил-иноқ бўлиб яшашига эришиш, ёш авлодни соғлом ва баркамол қилиб вояга етказиш, уларга миллий қадрият ва урф-одатларимизни кенг тарғиб этиш бугунги куннинг асосий вазифаларидандир. Боиси, ҳудудларда ижтимоий-маънавий муҳит соғлом бўлса, ёшларнинг диний ақидапарастлик, турли таҳдидлар, ёт ғоялар таъсирига тушиб қолишининг олди олинади, соғлом муҳитда соғлом ҳаёт тарзи шаклланади.

Бунингдек хайрли ишга ҳисса қўшиш мақсадида Амударё туманида фаолият юритаётган amunews.uz веб-сайти таҳририяти Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди таъсис этган грант танловида “Соғлом муҳит – соғлом ҳаёт” номли лойиҳаси билан қатнашиб, ғолиб бўлган эди. Айни кунларда мазкур давлат гранти лойиҳаси муваффақиятли амалга оширилмоқда.

18 апрель куни мазкур лойиҳа иш режасига мувофиқ туманимизнинг Дўрман овулида бир гуруҳ ижодкорларнинг овул аҳолиси билан учрашуви ўтказилди. Унда овул фуқаролар йиғини масъуллари, аҳоли вакиллари, таълим ходимлари ва фахрийлар иштирок этдилар.

Тадбирни веб-сайт мухбири, лойиҳа координатори Ойгул Ражабова очди ва олиб борди. У ўз сўзида грант лойиҳаси режасига мувофиқ амалга оширилаётган ишлар, мазкур тадбирни ўтказишдан кутилаётган натижаларга тўхталди.

Инсон зоти доимо маънавий озуқа олишга интилади. Бунда оммавий ахборот воситаларининг, бадиий асарларнинг ўрни алоҳида. Ҳа, бадиий асарлар мутолааси ҳар биримизга бетакрор таассуротлар ҳадя этади, шууримизни ойдинлаштиради, дунёқарашимизни кенгайтиради, яшаш, тириклик қадрини янада чуқурроқ англашга ўргатади.

Ана шундай китоблар муаллифлари билан юзма-юз учрашув, уларнинг ижод намуналарини ўзларидан эшитишнинг эса завқи ўзгача. Бу – грант лойиҳаси доирасида ўтказилган навбатдаги тадбирда ҳам яққол акс этиб турди. Шу сабабли ҳам бутун Амударё туманидагина эмас, республикада танилган, қатор китоблар муаллифи, оддий ва самимий тилда ёзилган шеърлари билан ўз мухлисларига эга бўлган ижодкор, асли дўрманлик, айни кунда Манғит шаҳрида яшаб, ижод этаётган Шомурод Хўжановнинг, иқтидорли ижодкор Зуҳра Аҳмедоваларнинг ўқиган ҳар бир шеърини йиғилганлар берилиб тингладилар ва қарсаклар билан олқишлаб турдилар.

Шеърхонлик тугагач, ҳудуддаги 84-сонли мактаб директори Эркин Қурбонбоев, овул нуронийларидан бири, халқ таълими фахрийси Фарҳод Ўрозбоевлар сўзга чиқиб, тадбирдан барча улкан таассуротлар олганлигини таъкидлаб, овул аҳолиси билан учрашувга ташриф буюрган ижодкорларга чексиз миннатдорчилик билдирдилар.

“Соғлом ҳаёт – соғлом муҳит” номли грант лойиҳаси доирасида ўтказилган ижодкорлар билан учрашув дўрманликларда улкан таассуротлар қолдирди, уларни янада кўпроқ китоблар мутолаа қилишга ундади.

Севара ИСМОИЛОВА.