Ғўза қатор ораларига ишлов бериш бўйича кўргазмали семинар ўтказилди
18 апрель куни Амударё туманининг Дўрман овулидаги “Пирназаров Тўрабой” фермер хўжалиги даласида ғўза қатор ораларига ишлов бериш ҳамда ғўза тарбиясидаги бошқа агротехник тадбирлар бўйича кўргазмали семинар ўтказилди.
Семинарда Қорақалпоғистон Републикаси Вазирлар Кенгаши Раиси Фарҳод Эрмонов, Жўқорғи Кенгес қўмитаси масъул ходими Анвар Жуманазаров, туман ҳокими Собир Хўжаметов, қишлоқ хўжалиги соҳаси масъуллари ва фермерлар иштирок этишди.
Иштирокчилар дастлаб фермер хўжалиги даласида ғўза қатор ораларига дастлабки ишлов бериш жараёни билан яқиндан танишдилар. Қайд этилганидек, ғўза қатор ораларига ишлов бериш жараёни тупроқнинг механик ва биологик хусусиятларини яхшилайди. Тупроқнинг юмшатилиши, тупроқда микроорганизмларнинг фаолиятини яхшилайди, бу эса тупроқнинг озиқ моддалари билан бойишига ёрдам беради.
Семинарда сўзга чиққанлар томонидан таъкидланганидек, ғўза тарбиясида қатор ораларига ишлов бериш ва культивация, яганалаш жараёнлари ўта муҳим тадбирлар сирасига киради. Қатор ораларига дастлабки ишлов бериш, яъни ғўза қаторлари орасини ҳайдаш ёки юмшатиш, тупроқнинг ҳаво ва сув ўтказиш хусусиятларини яхшилайди, бу эса ўсимлик илдизларининг нафас олишини ва озиқланишини яхшилайди.
Культивация ғўза қаторлари атрофидаги бегона ўтларни йўқотиш орқали ғўзага кўпроқ ёруғлик ва озиқ моддалар етиб боришига ҳам ёрдам беради. Яганалаш эса ғўзанинг ҳар бир метрга тўғри келадиган ниҳоллари сонини оптималлаштириш орқали ғўза ўсимликларининг бир-бирига тенг шароитда ўсишини таъминлайди. Бу ишловларнинг барчаси ғўза далаларининг умумий ҳолатини яхшилашга ва ҳосилдорликни оширишга хизмат қилади.
Айтиш жоизки, жорий йилда Амударё тумани бўйича жами 13900 гектар майдонга чигит экилган. Айни кунларда чигитлар ниш уриб, униб чиқмоқда ва далалардан текис ниҳол олинмоқда.
Семинарда сўзга чиққан масъуллар ва мутахассислар ғўза қатор ораларига дастлабки ишлов бериш пахта етиштиришнинг муҳим босқичларидан бири ҳисобланишини алоҳида қайд этишди.
Бу жараён ўсимликларнинг тўғри ва соғлом ўсиши учун зарур бўлган шароитларни яратишга ёрдам беради. Шунингдек, бу ишлов бегона ўтларнинг ўсишини чеклайди ва тупроқнинг қатқалоқ қаватини йўқотишга ёрдам беради, натижада ўсимликлар ўсиши ва ривожланиши учун қулай муҳит вужудга келади. Ушбу жараёнда тупроқнинг физик ва биологик хусусиятлари яхшиланади, бу эса ўсимликларнинг сув ва озиқ моддалардан самарали фойдаланишига имкон беради. Ишлов бериш жараёнидан кейин тупроқнинг юқори қавати юмшаб, ўсимлик илдизларининг кенгайиши ва чуқурроққа ўсишига имкон яратилади.
Ғўза қатор ораларига ишлов бериш ўсимликларнинг касалликларга чалиниш хавфини ҳам камайтиради ва илдиз чириш касалликларининг олдини олишда муҳим омил саналади.
Масъуллар ушбу агротехник жараённи сифатли амалга ошириш орқали сувдан самарали фойдаланишга ҳам замин яратиш лозимлигини алоҳида қайд этдилар. Зеро, тупроқнинг юмшатилиши сувнинг тупроққа кириб боришини ва ундан тенг тарқалишини таъминлайди, бу эса сувнинг бекорга сарфланишининг олдини олади. Бундан ташқари, тупроқнинг юмшатилиши сувнинг буғланиб кетишини камайтиради, бу эса сув ресурсларини тежашга ёрдам беради.
Семинарда қишлоқ хўжалиги соҳаси мутахассислари айни кунларда ғўза тарбиясида долзарб ҳисобланадиган агротехник тадбирларни ўз вақтида ва сифатли амалга ошириш бўйича тавсиялар бериб, иштирокчиларнинг саволларига батафсил жавоблар қайтарди.
Ғ.Ешниёзов
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
