"Дарё тошқин, сувлар тўлқин..." Ижод эса қайноқ. Ёҳуд Тўлқинда ижодкорлар ва ўқувчилар учрашуви қандай ўтди?
Шеърият – кўнгил торларини чертгувчи сеҳрли тилсим. Шеър – маржон гўё, унга туйғулар шода. Умрида шеър ўқимаган, тингламаган, ёшликдаги илк муҳаббатдан таъсирланиб қаторлар битмаган кимса бўлмаса керак дунёда. Сабаби, инсон яралар экан, у билган ва таниган илк шеър она алласи бўлиб қалбига жойланади.
Она юртимизда барча соҳалар сингари бадиий ижодга ва китобхонликка ҳам алоҳида эътибор қаратилмоқда. Мунтазам равишда ҳудудлардаги зиё масканларида яъни таълим даргоҳларида ўтказилиб келинаётган китобхонлик кечалари, мушоиралар ва истеъдодли шоир ва ёзувчилар билан бирга ўтказилаётган турли хил тадбирлар сўзимиз исботидир. Албатта бундай тадбирлар ўқувчиларнинг нафақат маънавий оламини бойитади, балки, уларнинг орасидан ҳам қалами ўткир ижодкорлар адабиётга, китоблар оламига кириб келишига туртки бўлади. Янги янги истеъдодларни кашф этади.
Яқинда amunews.uz веб сайти таҳририяти маҳаллаларда, оилаларда ижтимоий-маънавий муҳит барқарорлигини таъминлашга ҳисса қўшиш мақсадида "Жаҳун илҳомлари" ННТ билан ҳамкорликда туманимизнинг Тўлқин овулида жойлашган 33-сонли мактабда ижодкорлар, шоир ва ёзувчиларнинг ҳудуд аҳолиси билан учрашувини ташкил қилди.
Тадбир amunews.uz сайти таҳририятининг "Соғлом муҳит – соғлом ҳаёт" номли грант лойиҳаси доирасида ўтказилди. Учрашувда amunews.uz веб сайти мухбири, лойиҳа координатори Маҳмуд Шомуродов, Ўзбекистон ёзувчилар уюшмаси аъзоси, туманимизнинг кўзга кўринган шоираси Зулфия Оллоёрова, шоир Шомурод Хўжанов, 33-сонли мактаб ўқувчилари ва ҳудуд аҳолиси иштирок этди.
Учрашувда ижодкорлар ўзларининг Ватан, ёшлик, муҳаббат ва яна қатор мавзулардаги ижод намуналарини тадбир меҳмонларига ўқиб бердилар.
Шунингдек, иштирокчилар "Жайҳун илҳомлари" ННТ кутубхонасидан ўрин олган, янги нашрдаги китоблар кўргазмаси билан танишдилар. Учрашув ҳақиқий шеърхонлик кечасига айланиб кетди. Тадбир ўқувчиларнинг ижод, адабиёт ҳақидаги савол-жавоблари, баҳс мунозаралари билан давом этди.
Учрашув ўқувчиларда ва тадбир иштирокчиларида ўчмас таассурот қолдирди.
Азиза МАДРАҲИМОВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
