2-10 ёшли болалар орасида ичак гельминтози бўйича оммавий скрининглар ўтказилмоқда

Ўзбекистон Республикаси Президентининг 2021 йил 26 июлдаги “Аҳолига кўрсатилаётган тиббий ёрдам сифатини янада яхшилаш чора-тадбирлари тўғрисидаги”ги ва 2020 йил 10 ноябрдаги “Аҳолининг соғлом овқатланишини таъминлаш бўйича қўшимча чора-тадбирлар тўғрисида”ги қарорлари асосида 2-10 ёшдаги болаларнинг соғлиғини яхшилаш ҳамда ичак гельминтози билан касалланиш ҳолатларини камайтириш мақсадида Амударё тумани Санитария-эпидемиологик осойишталик ва жамоат саломатлиги бўлими томонидан қатор амалий ишлар қилинмоқда.

Шу мақсадда бўлим томонидан Ўзбекистон ва Қорақалпоғистон Республикалари Соғлиқни сақлаш вазирликларининг кўрсатма хатлари ҳамда Қорақалпоғистон Республикаси Санитария-эпидемиологик осойишталик ва жамоат саломатлиги бошқармасининг топшириқ хатига асосан белгиланган жадваллар бўйича жойларда лаборатор текшириш тадбирлари ташкил қилинмоқда.

Гельминтоз касалликларига лаборатор текширишлар бўлим бошлиғи томонидан тасдиқланган ҳамда Тиббиёт бирлашмаси, туман Мактабгача ва мактаб таълими бўлими билан келишилган режа-график бўйича тумандаги мактаб ва мактабгача таълим ташкилотларида ҳамда амбулатор ва стационар шароитда даволанаётган болалар орасида ўтказилмоқда.

Тадбирларга асосан мактабларнинг 1-4-синф ўқувчилари, мактабгача таълим ташкилотларида тарбияланаётган болалар жалб қилинаётган бўлиб, 2-10 ёшли уюшган ва уюшмаган болалар орасида оммавий скрининглар ўтказилмоқда. Скрининг натижасида гельминт тухумлари аниқланган ҳолатларда эса даволаш чоралари кўрилмоқда.

Жумладан, бундай тоифа болалар ва улар билан мулоқотда бўлган тенгдошларига яшаш манзилида ёки мактаб синфлари ҳамда мактабгача таълим ташкилотлари гуруҳларида “Вермокс” ёки “Альбендазол” дори препаратлари тарқатилмоқда.

Дегельминтизация тадбирларини ўтказиш ишларига етарли даражада тиббиёт ҳодимлари жалб қилинган бўлиб, ишлар махсус режа-график асосида ташкил қилинмоқда.

2023 йил 18 декабрь кунидан бошлаб жорий йилнинг 1-чораги якунига қадар Мактабгача ва мактаб таълими бўлимига қарашли жами 25та мактабдан 5134 нафар болалар гижжа касалликларига лаборатор текширилган бўлиб, шундан 21 мактабдан жами 352 нафар болаларда энтерабиоз гижжа касаллиги қайд этилди. 8та мактабгача таълим ташкилотларидан эса жами 965 нафар болалар гижжа касалликларига лаборатор текширилган бўлса, шундан 6 та муассасада жами 21 нафар болаларда энтерабиоз гижжа касаллиги қайд этилган.

Жорий йилнинг 1 апрель санасигача жами туман бўйича 12 минг 464та ҳолатда ушбу касалликдан даволанишга муҳтож бўлган, яъни ичак гельминтози аниқланган болалар ва улар билан алоқада бўлганлар рўйхатга олиниб, уларда дегельминтизация тадбирлари ўтказилди.

Бундан ташқари, тумандаги мактаб ва мактабгача таълим ташкилотларида болалар ва ота-оналар орасида ҳамда маҳаллаларда уйма-уй юриб гельминтоз касалликлари ва бошқа юқумли касалликлар профилактикаси бўйича ҳамда шахсий гигиена ва санитария-гигиена қоидаларига амал қилишни тушунтириш бўйича тарғибот ишлари олиб борилмоқда.

Бу ишлардан кўзланган мақсад – болалар саломатлигини сақлаш ва уларнинг соғлом бўлиб вояга етишларига замин яратишдир.

Жамол Камолов, Туман СЭО ва ЖС бўлими паразитология бўлинмаси ва лабораторияси мудири.

Тўлибой Атамуратов, Паразитология бўлими лабораторияси шифокори.