2-10 yoshli bolalar orasida ichak gelmintozi boʻyicha ommaviy skrininglar oʻtkazilmoqda

Oʻzbekiston Respublikasi Prezidentining 2021-yil 26-iyuldagi “Aholiga koʻrsatilayotgan tibbiy yordam sifatini yanada yaxshilash chora-tadbirlari toʻgʻrisidagi”gi va 2020-yil 10-noyabrdagi “Aholining sogʻlom ovqatlanishini taʼminlash boʻyicha qoʻshimcha chora-tadbirlar toʻgʻrisida”gi qarorlari asosida 2-10 yoshdagi bolalarning sogʻligʻini yaxshilash hamda ichak gelmintozi bilan kasallanish holatlarini kamaytirish maqsadida Amudaryo tumani Sanitariya-epidemiologik osoyishtalik va jamoat salomatligi boʻlimi tomonidan qator amaliy ishlar qilinmoqda.

Shu maqsadda boʻlim tomonidan Oʻzbekiston va Qoraqalpogʻiston Respublikalari Sogʻliqni saqlash vazirliklarining koʻrsatma xatlari hamda Qoraqalpogʻiston Respublikasi Sanitariya-epidemiologik osoyishtalik va jamoat salomatligi boshqarmasining topshiriq xatiga asosan belgilangan jadvallar boʻyicha joylarda laborator tekshirish tadbirlari tashkil qilinmoqda.

Gelmintoz kasalliklariga laborator tekshirishlar boʻlim boshligʻi tomonidan tasdiqlangan hamda Tibbiyot birlashmasi, tuman Maktabgacha va maktab taʼlimi boʻlimi bilan kelishilgan reja-grafik boʻyicha tumandagi maktab va maktabgacha taʼlim tashkilotlarida hamda ambulator va statsionar sharoitda davolanayotgan bolalar orasida oʻtkazilmoqda.

Tadbirlarga asosan maktablarning 1-4-sinf oʻquvchilari, maktabgacha taʼlim tashkilotlarida tarbiyalanayotgan bolalar jalb qilinayotgan boʻlib, 2-10 yoshli uyushgan va uyushmagan bolalar orasida ommaviy skrininglar oʻtkazilmoqda. Skrining natijasida gelmint tuxumlari aniqlangan holatlarda esa davolash choralari koʻrilmoqda.

Jumladan, bunday toifa bolalar va ular bilan muloqotda boʻlgan tengdoshlariga yashash manzilida yoki maktab sinflari hamda maktabgacha taʼlim tashkilotlari guruhlarida “Vermoks” yoki “Albendazol” dori preparatlari tarqatilmoqda.

Degelmintizatsiya tadbirlarini oʻtkazish ishlariga yetarli darajada tibbiyot hodimlari jalb qilingan boʻlib, ishlar maxsus reja-grafik asosida tashkil qilinmoqda.

2023-yil 18-dekabr kunidan boshlab joriy yilning 1-choragi yakuniga qadar Maktabgacha va maktab taʼlimi boʻlimiga qarashli jami 25ta maktabdan 5134 nafar bolalar gijja kasalliklariga laborator tekshirilgan boʻlib, shundan 21 maktabdan jami 352 nafar bolalarda enterabioz gijja kasalligi qayd etildi. 8ta maktabgacha taʼlim tashkilotlaridan esa jami 965 nafar bolalar gijja kasalliklariga laborator tekshirilgan boʻlsa, shundan 6 ta muassasada jami 21 nafar bolalarda enterabioz gijja kasalligi qayd etilgan.

Joriy yilning 1-aprel sanasigacha jami tuman boʻyicha 12 ming 464ta holatda ushbu kasallikdan davolanishga muhtoj boʻlgan, yaʼni ichak gelmintozi aniqlangan bolalar va ular bilan aloqada boʻlganlar roʻyxatga olinib, ularda degelmintizatsiya tadbirlari oʻtkazildi.

Bundan tashqari, tumandagi maktab va maktabgacha taʼlim tashkilotlarida bolalar va ota-onalar orasida hamda mahallalarda uyma-uy yurib gelmintoz kasalliklari va boshqa yuqumli kasalliklar profilaktikasi boʻyicha hamda shaxsiy gigiyena va sanitariya-gigiyena qoidalariga amal qilishni tushuntirish boʻyicha targʻibot ishlari olib borilmoqda.

Bu ishlardan koʻzlangan maqsad – bolalar salomatligini saqlash va ularning sogʻlom boʻlib voyaga yetishlariga zamin yaratishdir.

Jamol Kamolov, Tuman SEO va JS boʻlimi parazitologiya boʻlinmasi va laboratoriyasi mudiri.

Toʻliboy Atamuratov, Parazitologiya boʻlimi laboratoriyasi shifokori.