Амир Темур номли овул аҳолиси чуқурлаштирилган тиббий кўрикдан ўтказилди

Аҳолини мунтазам тиббий кўрикдан ўтказиш соғлиқни сақлаш тизимининг асосий фаолият йўналишларидан бири ҳисобланади. Бу жараён касалликларнинг олдини олиш, эрта аниқлаш ва самарали даволаш имконини беради. Шунингдек, бу чора келгусида аҳолининг умумий саломатлик даражасини яхшилашга ҳам ёрдам беради.

Мунтазам тиббий кўриклар аҳолининг турли касалликларга чалиниш хавфини камайтиришга, шунингдек, юқумли касалликлар тарқалишини олдини олишга ҳам ёрдам беради. Бундан ташқари, тиббий кўриклар орқали аҳолининг саломатлиги ҳолати ҳақида маълумот тўплаш ва соғлиқни сақлаш ресурсларини самарали бошқариш имконияти пайдо бўлади.

Амударё тумани Тиббиёт бирлашмаси томонидан ҳам ҳудудларда мунтазам равишда тиббий кўриклар ташкил қилиб келинмоқда. Яқинда 2-сектор худудидаги Амир Темур номли овул фуқоралар йиғини маъмурий биносида ҳудуд аҳолиси туман кўп тармоқли марказий поликлиникасининг тор доирадаги мутахасислари ҳамда Республика кўз касалликлар шифохонасининг окулист шифокори, мобиль поликлиника мутахассислари ҳамда Республика Фтизиатрия ва пульмонология марказининг рентгенолог шифокорлари иштирокида тиббий кўрикдан ўтказилди.

Чуқурлаштирилган тиббий кўрикда туман кўп тармоқли марказий поликлиникасининг жарроҳ, окулист, ЛОР, эндокринолог, терапевт, кардиолог, фтизиатр, УЗИ, лобарант шифокорлари иштирок этди.

Ушбу тиббий тадбир мамлакатимизда аҳоли саломатлигини сақлаш борасида амалга оширилаётган ислоҳотларнинг ёрқин ифодаси бўлди. Зеро, халқ соғлиги – юрт бойлигидир. Мунтазам тиббий кўрикларни ташкил этиш ва ўтказиш ҳар бир инсоннинг саломатлиги ва умрини узайтиришда муҳим аҳамиятга эга бўлиб, жамиятнинг соғлом ва барқарор ривожланиши учун жуда зарурдир.

Амир Темур номли овулда ўтказилган тиббий кўрик ҳам аҳоли ўртасида соғлом турмуш тарзини тарғиб қилиш, тиббий билимларини ошириш борасида муҳим қадам бўлди. Кўрикдан ўтказилган юртдошларимизга тўғри овқатланиш, жисмоний фаоллик ва зарарли одатлардан воз кечиш каби соғлом турмуш тарзи бўйича ҳам тавсиялар берилди.

Бу тадбир мазкур жараёнларда иштирок этувчи шифокорлар ва тиббий ходимларнинг малакасини ошириш ҳамда уларнинг касбий кўникмаларини янгилашга имконият яратгани билан ҳам аҳамиятли бўлди.

Кун давомида 128 нафар аҳоли вакиллари тиббий кўрикдан ўтказилган бўлса, шуларнинг 72 нафарида касаллик аниқланиб, касаллик аниқланган фуқароларнинг 10 нафарига стационар шароитда, 62 нафарига амбулатор шароитда муолажалар олиш тавсия қилинди. Жумладан, 5 нафар фуқаро Республика кўз касалликлари шифохонасида бепул даволаниш учун имтиёзли йўлланмага тавсия қилинди.

Бу каби тиббий кўриклар туманнинг бошқа овул ва маҳаллаларида ҳам белгиланган режа-график асосида, сектор раҳбарларининг тавсиясига кўра мунтазам равишда ўтказиб борилади. Кўрикларга нафақат туман Тиббиёт бирлашмасининг, балки заруратга қараб Республикамиздаги нуфузли тиббиёт масканларининг шифокорлари ҳам жалб қилинади. Зеро, касалликни даволагандан кўра унинг олдини олган афзал. Хасталикларни барвақт аниқлашда эса тиббий кўрик энг муҳим восита саналади. Шу билан бирга, бу каби тиббий кўриклар аҳолининг соғлиқни сақлаш тизимига бўлган ишончини оширишга ҳам хизмат қилади.

Жумабой Явкашев, Туман тиббиёт бирлашмасининг ташкилий-услубий бўлими мудири