Amir Temur nomli ovul aholisi chuqurlashtirilgan tibbiy koʻrikdan oʻtkazildi

Aholini muntazam tibbiy koʻrikdan oʻtkazish sogʻliqni saqlash tizimining asosiy faoliyat yoʻnalishlaridan biri hisoblanadi. Bu jarayon kasalliklarning oldini olish, erta aniqlash va samarali davolash imkonini beradi. Shuningdek, bu chora kelgusida aholining umumiy salomatlik darajasini yaxshilashga ham yordam beradi.

Muntazam tibbiy koʻriklar aholining turli kasalliklarga chalinish xavfini kamaytirishga, shuningdek, yuqumli kasalliklar tarqalishini oldini olishga ham yordam beradi. Bundan tashqari, tibbiy koʻriklar orqali aholining salomatligi holati haqida maʼlumot toʻplash va sogʻliqni saqlash resurslarini samarali boshqarish imkoniyati paydo boʻladi.

Amudaryo tumani Tibbiyot birlashmasi tomonidan ham hududlarda muntazam ravishda tibbiy koʻriklar tashkil qilib kelinmoqda. Yaqinda 2-sektor xududidagi Amir Temur nomli ovul fuqoralar yigʻini maʼmuriy binosida hudud aholisi tuman koʻp tarmoqli markaziy poliklinikasining tor doiradagi mutaxasislari hamda Respublika koʻz kasalliklar shifoxonasining okulist shifokori, mobil poliklinika mutaxassislari hamda Respublika Ftiziatriya va pulmonologiya markazining rentgenolog shifokorlari ishtirokida tibbiy koʻrikdan oʻtkazildi.

Chuqurlashtirilgan tibbiy koʻrikda tuman koʻp tarmoqli markaziy poliklinikasining jarroh, okulist, LOR, endokrinolog, terapevt, kardiolog, ftiziatr, UZI, lobarant shifokorlari ishtirok etdi.

Ushbu tibbiy tadbir mamlakatimizda aholi salomatligini saqlash borasida amalga oshirilayotgan islohotlarning yorqin ifodasi boʻldi. Zero, xalq sogʻligi – yurt boyligidir. Muntazam tibbiy koʻriklarni tashkil etish va oʻtkazish har bir insonning salomatligi va umrini uzaytirishda muhim ahamiyatga ega boʻlib, jamiyatning sogʻlom va barqaror rivojlanishi uchun juda zarurdir.

Amir Temur nomli ovulda oʻtkazilgan tibbiy koʻrik ham aholi oʻrtasida sogʻlom turmush tarzini targʻib qilish, tibbiy bilimlarini oshirish borasida muhim qadam boʻldi. Koʻrikdan oʻtkazilgan yurtdoshlarimizga toʻgʻri ovqatlanish, jismoniy faollik va zararli odatlardan voz kechish kabi sogʻlom turmush tarzi boʻyicha ham tavsiyalar berildi.

Bu tadbir mazkur jarayonlarda ishtirok etuvchi shifokorlar va tibbiy xodimlarning malakasini oshirish hamda ularning kasbiy koʻnikmalarini yangilashga imkoniyat yaratgani bilan ham ahamiyatli boʻldi.

Kun davomida 128 nafar aholi vakillari tibbiy koʻrikdan oʻtkazilgan boʻlsa, shularning 72 nafarida kasallik aniqlanib, kasallik aniqlangan fuqarolarning 10 nafariga statsionar sharoitda, 62 nafariga ambulator sharoitda muolajalar olish tavsiya qilindi. Jumladan, 5 nafar fuqaro Respublika koʻz kasalliklari shifoxonasida bepul davolanish uchun imtiyozli yoʻllanmaga tavsiya qilindi.

Bu kabi tibbiy koʻriklar tumanning boshqa ovul va mahallalarida ham belgilangan reja-grafik asosida, sektor rahbarlarining tavsiyasiga koʻra muntazam ravishda oʻtkazib boriladi. Koʻriklarga nafaqat tuman Tibbiyot birlashmasining, balki zaruratga qarab Respublikamizdagi nufuzli tibbiyot maskanlarining shifokorlari ham jalb qilinadi. Zero, kasallikni davolagandan koʻra uning oldini olgan afzal. Xastaliklarni barvaqt aniqlashda esa tibbiy koʻrik eng muhim vosita sanaladi. Shu bilan birga, bu kabi tibbiy koʻriklar aholining sogʻliqni saqlash tizimiga boʻlgan ishonchini oshirishga ham xizmat qiladi.

Jumaboy Yavkashev, Tuman tibbiyot birlashmasining tashkiliy-uslubiy boʻlimi mudiri