Хотира ва қадрлаш куни муносабати билан 65-сонли мактабда волейбол мусобақалари ўтказилди

9 май – Хотира ва қадрлаш куни муносабати билан мамлакатимизнинг барча жойларидаги таълим масканларида, меҳнат жамоаларида хотира кечалари, маънавий-маърифий тадбирлар ўтказилиб, ўтганлар хотираси ёдга олинмоқда ҳамда нуронийларга эҳтиром кўрсатилмоқда. Амударё туманидаги 65-сонли мактабда ҳам тажрибали ўқитувчи, марҳум Дурдибой Атабоевнинг хотирасига бағишлаб спортнинг волейбол тури бўйича мусобақа ташкил этилди.

Тадбирни 65-сонли мактаб дректори Шаҳноза Хўжамуротова очиб, хотира кечаси ҳамда мусобақа иштирокчиларини яқинлашиб келаётган байрам билан қутлади. Устоз Дурдибой Атабоевнинг қизи Боғдагул Атабоева, дўсти, курсдоши ва ҳамкасби Йўлдошбой Ўразимбетовлар йиғилганларга марҳумнинг ҳаёт йўли, ибратли ишлари ҳақида ўз хотираларини сўзлаб бердилар.

Айтиб ўтиш керакки, Дурдибой Атабоев 1939 йилда собиқ Қипчоқ туманининг Кўкчи маҳалласида оддий деҳқон оиласида дунёга келган. Унинг айни ёшлик даври Иккинчи жаҳон урушининг оғир ва суронли йилларига тўғри келади.

У ёшлик чоғида спортга қизиқиши туфайли 1959 йилда Нукус Давлат педагогика институтнинг жисмоний тарбия факультетига ўқишга кириб, ушбу даргоҳнинг спорт мусобақаларида фаол иштирок этди. Кейинчалик ўқишни олий баҳоларга муваффақиятли тамомлаб, 1963 йилда туманимиздаги собиқ Йўлдош Охунбобоев номли ўрта мактабига ишга кирди. Ўз фаолияти давомида ўқувчиларга қунт билан билим бериб, уларни спортга ошно қилди.

Дурдибой Атабоев ўзининг серқирра фаолияти давомида туманимизнинг 11-сонли ва 18-сонли мактабларида дарс бериб, юзлаб спортсевар ёшлар ҳамда шогирдлар тайёрлади ҳамда овул ёшларининг суюкли устозига айланди.

Ушбу хотира кечаси яна шу жиҳати билан аҳамиятлики, у мактаб жамоасининг ҳамжиҳатлиги, авлодлар ўртасидаги алоқаларни мустаҳкамлашда ҳам восита бўлди. Зеро, бу алоқалар нафақат ўқитувчилар ва ўқувчилар ўртасидаги муносабатларни мустаҳкамлайди, балки таълим сифатини ошириш ва мактабдаги ижтимоий-маънавий муҳитни яхшилашда ҳам муҳим роль ўйнайди. Бу каби ташаббуслар келгусида мактаб ўқитувчилари ва ўқувчилари ўртасидаги мулоқотни янада кучайтириш, улар ўртасида ўзаро ҳурмат ва қадрдонлик туйғуларини ривожлантириш, шунингдек, ёшларнинг ижтимоий фаоллигини ошириш орқали жамият ривожига ҳам ҳисса қўшади.

Мактаб маъмурияти ва иштирокчилар тадбир ташкилотчилари – 65-сонли мактабнинг жисмоний тарбия фани ўқитувчилари Санжарбек Уразбоев, Рустам Болтабоев, Ўктам Болтабоев ҳамда 24-сонли мактабнинг жисмоний тарбия фани ўқитувчиси Давлатёр Ражаповларга миннатдорчилик билдирдилар.

Муросасиз ва кескин баҳсларга бой бўлган волейбол мусобақалари эса нафақат иштирокчилар, томошабинларнинг ҳам спортга иштиёқини янада оширди. Зеро, спорт инсоннинг жисмоний ва маънавий камолотида муҳим роль ўйнайди. У нафақат соғлом турмуш тарзини шакллантиришга, балки шахснинг ижтимоийлашуви ва маънавий ривожланишига ҳам катта таъсир кўрсатади.

Спорт шунингдек, ёшларни соғлом ва баркамол қилиб тарбиялашда, уларнинг жисмоний ва психологик саломатлигини мустаҳкамлашда ҳам катта роль ўйнайди. Шу билан бирга, спорт орқали инсон ўзининг ички имкониятларини намоён қилиш ва шахсий мақсадларига эришиш учун керакли мотивация ва интилишни ривожлантириш имкониятига эга бўлади.

Ана шундай улкан маънавий ва ижтимоий аҳамиятга эга бўлган тадбир сўнгида ғолибларга ва иштирокчи жамоаларга диплом ҳамда эсдалик совғалари топширилди.